上周六(19日)，余思敏到商台做節目。對於將復出有線主持親子活動，她沒有否認，還笑說只要是適合的工作，她都會做。
與鄭中基閃電撻着的有線娛樂台前主播余思敏（Sammie），去年7月生完寶貝女Emma，專心做幸福少奶奶。不過湊女生活始終唔及幕前精彩，近月她蠢蠢欲動，想復出做有線《怪談》主持，不過奶奶say no，余只好乖乖聽話。錫老婆的鄭中基隨即加入游說行動，成功掂鄭老太。據知余將與有線簽部頭約，主持一個度身訂做的親子節目。今時唔同往日，妻憑夫貴身價十級跳，以往收幾千蚊主持一個騷，依家冇5萬，都請唔到中基嫂。

中基餅印女
鄭中基與余思敏的愛情結晶品Emma已經十個月大，單眼皮的Emma，與爸爸成個餅印。鄭中基最近更為兩母女影咗唔少靚相放上微博，母女合照warm爆。

 
余思敏（Sammie）被鄭中基收為己用，懷孕後即與有線解約，不過雙方關係一直保持良好。眨吓眼女兒已十個月大， 余思敏湊女湊到悶，突萌復出念頭，有線當然無任歡迎，不過先要過鄭老太一關。這兩年來余思敏一直安份守己做個好老婆、好媽媽，閒時除照顧女兒，亦會約有線其他主播好友茶醌，知情者透露：「Sammie同Ronald（鄭中基）一齊後已經修心養性，生完後將時間同成副心機放喺個女度。個女就快一歲，Sammie最近多咗同班舊拍檔見面，眼見主播好友鄭文生完女復出不知幾happy，佢都想試吓！佢講明唔想做主播，要做主持，仲提議做《怪談》。咁大件事，當然要同鄭生一家商量，點知鄭老太一聽到主持《怪談》就即時反對。」

舊拍檔情未變
雖然已做幸福少奶奶，但余思敏與一班有線主播仍有緊密聯繫。今年3月她返有線接受訪問，好友更為她慶祝32歲生日。

與奶奶約法三章
過唔到鄭老太一關，余思敏本來打消復出念頭，但最後由老公出馬，為她爭取成功。「Ronald近年成日返大陸做嘢，好少時間陪Sammie，佢都好想老婆有自己事業，唔使淨係湊女咁悶。所以Ronald亦幫口，講咗好多好說話，鄭老太終於肯讓步，不過有條件㗎！鬼怪節目一定唔可以，Sammie唔可以做全職主持，工作時間要定時，唔可以捱夜，仲話如果有咗就即時要停工，因為鄭老太想再抱孫。」獲奶奶讓步，余思敏隨即向有線開出條件，五月初她返有線接受好友衞志豪專訪，順道與高層傾約。據知雙方已傾妥合作形式，有線更為她度身訂做一個全新的親子活動，內容圍繞湊B心得、女人扮靚及產婦補身等，每集會由她親自邀請嘉賓助陣，細節已度好，只差動筆簽約。

未有樓揸手
日前余思敏接受訪問，坦言她與鄭中基的關係從來不涉及金錢與物質。雖然兩人已秘密註冊結婚，她至今仍未有樓揸手。老公唔過水唔緊要，今日已成中基嫂，身價大不同，賺錢話咁易。據知當年只是娛樂台主播的余思敏，接一個商業活動的主持工作，酬勞約三千至五千，不過現時騷價已升到近5萬。
未正式復出做主持，余思敏近月已頻頻接騷，雖然與有線已無經理人合約，但有線方面仍出面為她接job。上周六（19日），余思敏任商台節目嘉賓，對於復出為有線主持全新親子節目，她說：「有適合我嘅工作，我都會做。」由小主播變成明星太太，她連回應都變得好官腔。

5月18日為女奔波
上周五(18日)，鄭中基與太太親身去陽明山莊的柏基國際幼稚園排隊，為寶貝女拎入學報名表，之後更由鄭中基親自駕車接老婆離開(上圖)。其後余思敏承認正為女兒報學校，仲話好後悔依家先開始搵：「原來依家搵已經好遲，應該喺BB兩個月大就報名。」

小主播變身記
余思敏於香港樹仁學院新聞及傳播系畢業，參加有線第一屆主播招募入行，主要工作是採訪和報道娛樂新聞，早年與有米男模陳朗拍拖，更達談婚論嫁地步，最後因男友花心忍痛分手。遇上鄭中基，改寫了她的一生。

04年嫩口期
當年做有線娛樂台主播，二十歲出頭的余思敏唔識化妝同打扮，娘味甚重。

07年搏殺期
她參演過多部電影如《甜絲絲》和《這個阿爸真爆炸》等，07年更主持《怪談》，遠赴台灣探靈，仲現場食師傅濟公上身搓出來嘅老泥丸，真係好搏。

09年上岸期
在公開活動上認識鄭中基。翌年3月鄭中基宣布與阿Sa離婚，不久已傳鄭余二人拍拖，同年余大肚唔撈有線，7月為鄭中基誕下愛女。 ####

 


我要復出。(設計對白) 撐硬你。(設計對白) 向來感情事低調處理的鄭中基，今年4月首度拖老婆余思敏行金像獎紅地氈，以行動肯定老婆地位。《蘋果日報》圖片


09年主持價 5千


今年出騷價 5萬
09年的余思敏仍是主播身份，為商業活動做主持只收5千左右。依家搖身一變做咗鄭中基太太，身份變成活動嘉賓，出騷價暴漲十倍。


《蘋果日報》圖片


《蘋果日報》圖片



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄