楊受成造王者霆鋒祖兒爭氣

人生事業堪回味，英皇七十憑爭氣！

容祖兒、謝霆鋒經歷重重挫折，百般艱難，終攀上天后、影帝高峰，贏盡回報。背後是以「義本無言」來力撐他們的英皇集團老闆楊受成，此兩千里馬也以「爭氣」來報答這位深具慧眼的伯樂，成就兩個傳奇。楊受成以一本自傳，記錄了他過去六十多年的甜、酸、苦、辣，在他努力下，不僅在珠寶鐘錶、地產、金融證券領域等各領風騷，在娛樂事業上能捧出容祖兒、謝霆鋒，亦全憑一句：「爭氣」！

楊受成馴霆鋒唔輸得

謝霆鋒的叛逆性格，楊受成坦言「搞唔掂」，笑指霆鋒是「頂心杉」之餘卻處處維護和包容，兩人感情從吵架中建立，拂袖離去，更如家常便飯。

搞唔掂叛逆霆鋒

「好多人以為我係謝賢個仔好風光，但事實總唔可以講出口。99年我為咗風格路向，唔想唱《壞習慣》呢啲歌、着咩衫呢啲嘢同老闆吵過好多大鑊。返咗加拿大之後，George（已故高層葉崇仁）隔日打嚟：『老闆好錫你，咪咁硬頸啦！』諗番當年我真係幾硬頸。直至有一日，我喺屋企睇住嫲嫲同妹妹，自己無所事事又冇收入，父母又冇拍戲，但仲要開支，點算？於是打電話畀老闆，希望佢畀個機會我。」未把吵架放心上的楊受成自是既往不咎，為霆鋒重新打造星途。

但霆鋒沒有改變包拗頸的性格，有一次更激到楊受成拂袖而去，霆鋒就連百萬元生日禮物都不要：「有一年我生日，老闆約我食飯慶祝，但一見面我哋又嘈，結果老闆嬲到走咗，事後Mani（霍汶希）話老闆原本準備咗份過百萬嘅禮物，就放喺餐枱底，但我話：『我唔要呀！』」然而霆鋒每次跌倒，楊受成必是第一個伸出援手，霆鋒自知年少無知，非常感激：「11年前老闆對我講，佢只錫兩種人，爭氣同忠心嘅人。」楊受成點頭：「哈！你仲記得。」

霆鋒在鎂光燈下成長，對娛圈事瞭如指掌，但拒絕重蹈謝賢走紅方程式覆轍，自創成名理論，不要做「其中一人」，寧背負反叛少年之名也堅持要做「唯一的人」。02年霆鋒捲入頂包案曾入獄兩星期，他還記憶猶新：「我啱啱先至喺外國攞咗個銷量男歌手獎，兩個月後坐監，對於當時只有22歲嘅我嚟講，承受嘅壓力唔可能再大，我真係崩潰！試問呢個時候，邊個老闆會接受？但我老闆義無反顧，佢對我嘅信任同支持，就好似第二個爸爸咁！」說時他看着面前的楊受成，隱隱透着無言感激。

「對於呢個『家』我比較疏離，好似呢幾年我有自己家庭同小朋友，但坦白講，近呢兩三年我突然會諗，老闆都一把年紀，萬一有咩病痛或者唔能夠繼續支持英皇娛樂，Touchwood！我會第一時間打畀容祖兒，同佢延續落去。」雖然祖兒「啋」聲四起，但其實她亦暗暗有過同樣念頭，楊受成被他倆感動了，卻又哭笑不得：「霆鋒一定係反省過，知道激咗我咁多年，怕激死我，就冇人激。」言談間流露出一份「家」的溫暖。

傾合約一講即Deal

由英皇娛樂一手湊大的霆鋒，當年由父母監護下簽約，事隔15年，去年他主動約見老闆楊受成提早續約。表面上是為了前途，事實卻是暗地望得到楊受成認同他已經是成長中的「大人」。

「我唔想嘥老闆時間，希望佢當我係一個『大人』，所以我計好晒數，帶埋文件同埋培養好情緒上去，一見面就同佢講：『老闆，我知你一直幫我好多，我依家大個仔養到自己，我想咁咁咁……』講完第一個方案，我諗住講第二個方案，老闆叫停我，佢諗一諗，話：『Deal！（成交）』，同我握手作實。」他邊說，楊受成即場重演當日在辦公室的情景，大家都相視笑了。

高達3億港元的合約幾句話作結，楊受成的爽快，令霆鋒有點措手不及。楊受成說：「我知道呢個方案對霆鋒最有利，我唔答應，佢會縮；老實講，我今日略有成就，生活富裕，毋須靠佢替我賺錢，佢幫我賺一千萬，五千萬也好，我都可以畀番佢哋五倍，甚至十倍。霆鋒雖然反叛好難搞，但內心善良，係忠心朋友同好夥計。」被看穿的霆鋒說：「當時老闆自言自語：『今次實畀Mani鬧到趴街！』然後佢親自去行法律部吩咐職員訂定合約，仲同佢哋講：『有咩事就搵我楊受成！』」

兩代緣始於1965

楊受成道出與霆鋒結緣始末，一切從1965年開始：「我21歲因為買車而認識霆鋒爸爸謝賢，謝賢係我偶像，不過咁多女仔鍾意佢，有時都慶慶哋佢，哈哈！雖然佢係大明星，但好有禮貌，後來我哋仲做咗好朋友。雖然謝賢靚仔好似花花弗弗，但同霆鋒一樣唔識溝女，兩父子都好少女人。」霆鋒尷尬傻笑。

貴為影帝的霆鋒乃影圈炙手可熱人物，成績比謝賢還出色，原來13歲那年，已被堪輿家陳伯預言非池中物：「93年喺北京搞咗個『英皇金融盃歌唱比賽』，當年最紅嘅譚詠麟、梅艷芳、羅文、甄妮都嚟晒。謝賢拉姑帶住霆鋒嚟，陳伯同我講：『你一定要簽霆鋒，佢將來係天王巨星，紅過謝賢十倍！』三年後，喺張耀榮搞嘅晚宴，霆鋒一鳴驚人，各大唱片公司對佢虎視眈眈。Paco（黃柏高）同我爭得最激烈，結果霆鋒簽咗我。」他以甚麼奇招致勝呢：「只係講個『信』字，當年我冇歌手成績畀佢哋參考，四哥拉姑知我『爭氣』同埋『唔輸得』性格，一定要做到最好，所以交個仔畀我。」

哥哥發功成就霆鋒

名人之後的謝霆鋒，成功路反而更崎嶇，初出茅廬很快便變成眾矢之的，在噓聲中成長。視霆鋒如己出的楊受成，非常心痛，難得張國榮當年力撐，親自致電為霆鋒打氣，憶述哥哥及往事，不禁觸及楊受成心靈深處，感性的他忍不住熱淚盈眶：「霆鋒嘅路一直都好辛苦，睇住佢第一次被觀眾噓，佢難受，我更難受。」

楊受成強忍淚水：「哥哥張國榮打電話畀我，佢話：『楊生，你同霆鋒講，我都係由噓聲中長大，你叫霆鋒唔使驚，我支持佢！』」霆鋒拍拍楊生的肩，長長呼了一口氣，楊受成搖頭說：「霆鋒實在唔應該畀人噓，佢生得靚仔，父母係明星，又冇做過對唔住人哋嘅事情，咁樣對佢實在太唔公平，我真係搞唔清！」眉頭緊皺的他，卻看得出不忍、不平，心如刀割。

「唔靚」照獲捧祖兒視為SuperDad

穩坐天后寶座的容祖兒，感激楊受成在她17歲無處容身的時候，一手執她上來，力排眾議替她出唱片。楊受成對她義無反顧，她亦決為老闆爭氣，漸漸發現單親家庭長大的自己，以往心裏總是感到缺少的一個角色，原來可從身邊這位Superman身上觸摸到，那份感覺……原來叫做「父愛」。

試啼聲一鳴驚人

16歲贏得歌唱比賽後，祖兒得到一份唱片公司合約，以為平步青雲卻屢遇波折，她感激命運讓她遇見楊受成：「有一次我同老闆食飯閒話家常，佢講番好多呢幾年我同霆鋒嘅經歷，講到無論發生咩事，好彩都有大家喺身邊。老闆突然對我講，佢對我嘅支持係『義本無言』，心裏想幫就去幫，唔使講太多，所以我好好珍惜，亦飲水思源。」

楊受成回憶16年前與祖兒初見面：「當年Paco嫌佢『唔靚』解約，後來簽咗『佳音』又冇咗，有人介紹佢嚟面試，我叫佢去『駿景』試音，當晚成龍、周星馳、譚詠麟同埋各大媒體高層都在場。哈！祖兒好淡定，EQ高。」祖兒偷笑：「其實我當時嚇傻咗！」當晚他叫祖兒唱張惠妹《聽海》和關淑怡《考牌》：「最初冇人理佢，各自傾偈、猜枚、打桌球，直至成龍第一個叫大家停低聽歌，然後大家都讚好聽，於是我決定簽佢出唱片。」

好景不常，祖兒出碟計劃遭公司高層反對，但楊受成力排眾議：「當時有一位高層認為何嘉莉同葉佩雯比佢早入公司，趙學而又唱得好過佢，反對祖兒出碟，但我覺得祖兒唱得好，我堅持，最後我以『老闆』身份決定幫佢出碟。作為老闆要落呢個決定係押注好大，好彩祖兒爭氣。」祖兒腼腆傻笑：「我唔識講動人嘅說話去氹人哋開心，老闆見慣世面，唔會無緣無故由我隨便講幾句佢就對我好，我一定要先付出，好畀心機去做，用好成績去證明自己係抵錫嘅，唔係用說話Sell自己、求佢錫自己。我哋喺好多生活小節，一點一滴建立感情同默契，時間同埋經歷令呢個關係更鞏固。」

要多謝羅文王傑

楊受成對祖兒本着一個「義」字，但同樣要祖兒爭氣才可成事：「人哋幫你一次，唔可能成世無止境咁幫，所以自己要爭氣，祖兒爭氣就冇人話得我。祖兒成功踏入樂壇仲要多謝兩個人：首先係羅文，佢係天王巨星，喺自己個唱拖住祖兒出場介紹畀大家識；第二位係王傑，佢喺自己個唱，公司原本安排另一位女歌手同佢合唱，但我堅持要用祖兒，王傑同意，呢次合唱令祖兒被更多人認識。」

祖兒謹記楊受成的每句說話：「老闆同我講：『你嘅羽毛係好辛苦咁得番嚟，唔可以輕易失去。』喺栽培我嘅路上，老闆令我明白，我依家擁有嘅得來不易，要好好珍惜，所以我對工作好高戒心，好小心處理。一直以來雖然有好多支持者，但亦有唔少反對聲音，我好勝，好想得到大家認同，但有時都會唔知道點做去討好大眾，都有迷失嘅時候。」最初與老闆相處是戰戰兢兢，不敢事事無故驚動，到現在非常珍惜相聚時間，因為楊受成令她感到「父親」的溫暖：「我一直好努力咁做，因為希望見到我尊重嘅媽咪同埋老闆開心，得到佢哋稱讚，我會覺得自己好叻女。」

「老闆經常講好多人生道理，我好鍾意聽。可能我由細到大缺乏父愛，所以好渴望、好享受每次同老闆嘅聚餐。同佢傾偈嘅過程，填補咗我內心缺乏嗰啲感覺，哪怕只係一啲好簡單嘅道理，我都會好用心咁去聽，佢嘅說話直接影響我嘅想法；有時候佢會好認真咁叮囑我，咩做得咩唔做得，就好似爸爸教小朋友嘅語氣。」祖兒微笑看着身旁的楊受成：「雖然我同霆鋒同年，但霆鋒處事似個大人，而我就樂於做佢哋懷中嘅小孩子，無時無刻希望被照顧，有事發生我就會向老闆求助，佢係Superman，係我嘅保護網，我從來唔會過問酬勞或工作細節，其他人笑我：『乜你咁蠢o架！』其實係我對公司嘅信任；我由一個黃毛丫頭到今時今日，一切都係老闆畀我，公司一定安排最好嘅畀我。」淺笑着的楊受成似安慰地點頭，當年一肩扛起、力排眾議，結果祖兒沒令他失望。

筍盤益祖兒霆鋒猛詐型

要說容祖兒和謝霆鋒是「吸金王」實所言非虛，楊受成踢爆祖兒是富婆，開始「揀Job做」！他說：「祖兒做嘢從未試過問收幾錢、做幾耐，但係最近有單Job酬勞係30萬，祖兒話咁辛苦唔做。嘩！佢依家真係有錢嘞！哈哈！」祖兒連忙呼冤，霆鋒即解圍說老闆其實是感到安慰的，楊受成也點頭說：「唔通想啲夥計日日跑山！聽到霆鋒買樓買舖，祖兒掃豪宅，我都開心啦！」祖兒即鬆口氣說：「哈哈！做啱咗添……唔小心！」

深得老闆寵愛的祖兒，坦言曾收過老闆價值逾百萬元的鑽石，楊受成禁不住笑着罵：「粒石依家升到二、三百萬，買時大約一百萬，但你走去戴啲五十份鑽石，我送畀你嗰粒係五卡、大十倍！」祖兒即伸伸舌頭說：「太大粒，我驚畀人搶。哈！我今日都想戴出嚟，但我媽唔喺度，開唔到保險箱！」

擺花街成條買晒

看似酸溜溜的霆鋒插口自嘲冇鑽石收，更大呷乾醋狂呻老闆只介紹豪宅筍盤給祖兒：「老闆話咗畀祖兒聽幾次，我一次都冇！」楊受成即笑着回敬：「唉！霆鋒有專人同佢搵樓！佢真係好鬼多錢，如果佢再有錢啲、爬我頭點算！霆鋒最叻，買咗擺花街成條街咁滯，係擺花街王！」

祖兒也詐嬌「申辯」說：「霆鋒咁醒！我咁蠢！我當時又肥，個人未係好不得了……」霆鋒即寸祖兒：「依家不得了嘞，係咪呀？」祖兒傻笑說：「依家好咗少少啦！當時真係好擔心，連首本名曲都未有，個盤喺舂坎角，講緊係二千幾萬，當時我諗失聲點算？咁就乜都冇！最後唔制，到今日都話我死蠢！」」

原來楊受成本來答允送裝修，甚至可以借錢給祖兒買樓：「依家間屋起碼值兩三億，祖兒本來扑錘，但之後佢話又開心又擔心咗七晚瞓唔着，最後推咗我！不過都好，如果佢買咗，依家好有錢，就唔會做嘢，哈哈！」祖兒嘻嘻笑說：「咁又唔係喎！接工作係以工作性質為大前提，唔係為幾多錢，老闆笑我啫，佢明嘅！」

搏命搵錢源於自卑

楊受成透過自傳細訴人生起跌，他以做人信念「爭氣」作為自傳之名，亦是愛將祖兒的金曲，祖兒笑指老闆的電話接駁鈴聲一直都是《爭氣》。自傳裏，楊受成毫無忌諱，不作迴避，剖白小時候賒借度日、受盡白眼，昔日年少輕狂酒色財氣、奉子成婚和惹官非而鋃鐺入獄等往事：「我自細表面上係錶行太子爺，查實日日跑山撲水，老竇不擅理財，淨係鍾意娶老婆同生仔，我兄弟姊妹十幾人，一間舖頭仔點養得起晒全家？我自小出入當舖，由細到大都係Underdog，培養出謙卑有禮性格。」

金錢為楊受成帶來安全感，他不諱言出於自卑感：「由細到大都係好窮，依家冇錢喺袋會好冇安全感。窮唔緊要，最痛苦係人哋覺得你有錢，但你冇錢喺袋；我每日都袋四、五萬現金，咁樣先至覺得自己好Rich！」

後記：體貼入微

專訪當日楊受成提早十五分鐘到達現場，客氣地跟各人握手後，霆鋒隨之出現，一向「黑超」不離身的他，為尊重老闆而沒有架上招牌墨鏡，二人擁抱並親切慰問。然後，穿上漂亮裙子的祖兒亦抵達，楊生大讚漂亮，安排她坐在兩位男士中間，說這樣才像樣，然後連茶几擺設都一絲不苟。兩小時後訪問結束，他細心地問霆鋒和祖兒是否肚餓？原來他已訂好餐廳，大老闆nc 心思，難怪霆鋒和祖兒視他為第二個爸爸般看待，感情深厚非言語或筆墨足以形容。

專案組

英皇集團老闆楊受成，獨具慧眼，一手培育出謝霆鋒及容祖兒兩大紅星。

霆鋒最難搞，但佢個心係好到不得了！

女歌手金獎唔畀祖兒，我同你死過！
容祖兒謹記楊受成講過「義本無言」這四個字。

祖兒視老闆楊受成為Superman。

霆鋒獲楊受成封為擺花街王。

楊受成栽培祖兒，希望她爭口氣，而早已爭氣的霆鋒自是笑得開懷。

初出道的祖兒以靚聲會友，亦得師傅羅文的提攜。

羅文（左）

楊受成、祖兒與霆鋒摸住酒杯底慢慢傾。

霆鋒與楊受成結緣，原來是始於上一代的謝賢。

楊受成心思縝密，讓攝記手足拍出靚構圖。

祖兒愈唱愈強為楊受成爭氣

「老闆，唔好咁感觸。」容祖兒在旁安慰道。眾人屏息靜氣，霆鋒伸手拍拍老闆膊頭，盡在不言中。

祖兒與霆鋒想過若楊生出意外，會合力延續英皇精神。

很難想像，左擁謝霆鋒、右抱容祖兒，在商場馳騁多年，地位舉足輕重的娛樂圈大亨楊受成如此感性，眼泛淚光……

英皇集團主席楊受成十八年前因緣際會涉足娛樂圈，力排眾議力捧霆鋒祖兒，雙龍出海。羅馬非一天建成，要成為具影響力的影帝天后，還需這位伯樂背後的支持。

祖兒感激楊生「一意孤行」力捧，造就今日樂壇天后成就。

霆鋒與祖兒視楊生為「父親」。

今日，見霆鋒爭氣，所以回首他出道時被噓，記憶猶新，五味雜陳。

造王者楊受成

祖兒與霆鋒很榮幸能成為英皇一分子。

英皇電影及音樂人才濟濟，打造今日盛世。

今日，也見祖兒爭氣，如女歌手金獎非她囊中物，楊受成會拋出一句：「我同你死過！」如此豪言壯語，只因他曾度過狗臉的歲月，深明爭氣向上，才可理直氣壯！

楊：楊受成容：容祖兒謝：謝霆鋒記：記者

我認為佢靚過王菲

誰都知道容祖兒是楊受成的掌上明珠，看祖兒待楊受成，花言巧語欠奉，反而傻頭傻腦常逗對方不時搖頭苦笑。當年楊受成堅持力捧，成就今日天后地位。難怪缺乏父愛的祖兒視對方為父親，是她不二的Superman。

記：點解當年簽祖兒？據聞好多人唔睇好。

楊：唉！當時祖兒冇人要，最早期係黃柏高簽咗佢，但覺得佢唔靚，同佢解約。之後祖兒轉簽佳音唱片，但間公司後來喺香港冇做，有人介紹祖兒畀我哋，我叫佢去駿景聽佢唱歌，當日我認為佢靚過王菲。（說時邊笑邊瞄向默不作聲但笑瞇瞇的霆鋒。）祖兒一入間房，嚇到佢暈，譚詠麟、周星馳同成龍全部喺度，但佢好淡定。只係叫佢唱張惠妹、關淑怡，當時王菲唔係好紅啫！（又一次整蠱霆鋒）

謝：吓……（一臉尷尬。）

容：（取笑霆鋒）佢好少男o架！

楊：初初冇人理祖兒，個個飲酒猜枚，之後發現佢真係唱得好好。佢出唱片都好坎坷，有高層反對，話佢唔夠靚好難做，最後我拍心口話要出，結果佢首《未知》爆咗出嚟！祖兒踏入歌壇有兩個人要多謝，就係羅文同王傑。羅文咁紅，都願意拖祖兒出嚟合唱，而王傑開個唱，公司本來安排另一位女歌手合唱，係我堅持用祖兒，雖然公司反對，但王傑同意。

容：我工作最大動力，係令錫我嘅人開心，咁就會覺得自己好叻。多謝老闆嘅堅持，令我今日成績變得有價值。記得老闆講過義本無言呢四個字，佢話幫咗人唔使講出口。有個人為我付出咁多，係好講緣分，令我好感激。

記：眾所周知，楊受成好錫祖兒，怕唔怕其他藝人呷醋？點樣平衡？

楊：我咁錫祖兒霆鋒，因為佢哋爭氣，邊個話得我呢？我公司有七千個員工，每年出花紅都億億聲。同埋，要有公信性，我同好多電台、電視台講，對我順水行舟就夠，我今日唔能夠話要洪卓立攞男歌手金獎㗎嘛，咁樣係逆水行舟！但你話女歌手金獎唔畀容祖兒，我就同你死過！就係霆鋒祖兒咁爭氣，所以佢哋同我要求嘅嘢一定Yes！因為佢哋有分數。

視老闆為Superman

容：我哋唔過分o架！哈哈！佢係睇表現，唔會無緣無故去錫你。每次同老闆飯敍，佢會好似爸爸教小朋友咁叮囑我，可能我比較缺乏父愛，所以好享受同老闆傾偈，佢講過：「你每條羽毛唔係咁輕易長成。」所以我會事事小心同戒備，曾經同老闆講：「你係我生命中最後一道防線。」老闆係我Superman。

楊：本自傳第一章主題就係「義本無言」，我喺上海街出世，呢個三教九流嘅地方，差佬、黑社會乜都有，親眼睇住好多人拜完關帝但轉過頭就出賣人！所以我認為對一個人好，唔需要講出口，講出口嘅，就係假。

記：祖兒言行不拘小節，有冇試過激親你？

楊：（笑笑口）你用字真係客氣，唔係不拘小節，係成日講錯嘢！祖兒係唔經大腦，亂講一通，霆鋒係最難搞，但佢個心係好到不得了。霆鋒係好忠心嘅朋友、伙記，佢相信你，就乜都得，佢唔鍾意同人飲酒套交情。

容：我都好樂於做小朋友被照顧，例如工作上，好少問做咩、收幾多錢，因為相信公司安排最好嘅畀我。我由咩都唔識，到今日已經賺咗好多。

楊：係呀，容祖兒依家好有錢o架！（說罷拍拍祖兒膊頭哈哈笑）

容：唔係，我可以再有錢啲o架！哈哈！我成日戴埋啲豆泥手鏈，老闆就話：「我送畀你嗰啲唔戴？」太大粒喇，驚畀人搶！

楊：唉！（作激氣狀）送粒梨形、五六卡嘅石畀佢……（霆鋒插嘴：「送畀我啦喂！」）粒石依家升到二、三百萬！買時大約一百萬，你走去戴啲五十份鑽石，我送畀你嗰粒大十倍！啲嘢唔用邊有價值？唔戴出嚟鬼知咩！

容：擺咗喺保險箱。今日都想戴出嚟，但我媽唔喺度，開唔到保險箱，哈哈！

霆鋒賓主情無聲仿有聲

搞唔掂霆鋒

霆鋒初出道時於噓聲中成長，現在每次出場已是掌聲如雷。

還差15分鐘才到訪問時間，楊受成在一班人簇擁下現身，隨後到的謝霆鋒第一句便叫：「老闆！」兩人來個擁抱，開始說個不停，待容祖兒出現，楊受成指揮她坐中間，說女士坐在兩個男人中間才像樣。未有安排坐身邊，但心繫霆鋒所言非虛，每每講到他，楊受成便直着腰板說得七情上面。

記：當年點樣同謝霆鋒結緣？

年少反叛的霆鋒如今已成「大人」，楊生深感安慰。

張國榮曾致電楊受成鼓勵霆鋒。

楊：廿一歲識謝賢，當時佢係大明星兼係我偶像！當日謝賢喺亞皆老街賭緊排九，佢玩完牌，好有禮貌同我握手，跟住做咗朋友。四哥冇機心，但唔識溝女。呢點同霆鋒一樣，外間以為霆鋒靚仔花弗，查實佢真係好少女人。

放大圖片

放大圖片

　　93年，喺北京搞英皇金融盃歌唱比賽，四哥拉姑同霆鋒都有去，當時陳伯（已故御用風水師陳朗）一見霆鋒，叫我一定要簽佢，話佢嘅成就係四哥十倍，會成為天王巨星，當時霆鋒只係十三歲。

　　霆鋒十六歲返香港，喺張耀榮先生間公司嘅魯班先師誕晚宴唱歌驚為天人，好多唱片公司都話簽佢，同我爭得最激烈係黃柏高。雖然外間以為我玩玩吓搞娛樂公司，但四哥拉姑知我份人爭氣唔輸得，所以將霆鋒交畀我，真係好感激，當年我冇呢方面嘅業績畀人睇，只係因為飛圖嘅葉志銘冇錢還畀我，所以將飛圖作為抵債。

記：霆鋒出道被指反叛，曾經出走返加拿大，表演又掟結他掟咪，點樣馴服佢？

楊：係我畀佢馴服咗！冇樣嘢搞得佢掂！查實係我就佢！（邊擰擰頭邊笑）佢企硬，我讓佢；我企硬，佢讓我。

謝：我要再三講，我從來冇掟過咪！其實當年同老闆有好多原則上嘅爭拗，返加拿大之後，每隔幾日葉崇仁（已故飛圖高層）打畀我：「老闆好錫你，你唔好咁硬頸！」之後我諗，要做番場好戲畀人睇，所以打畀老闆，想嘗試再合作。

無條件付出

跌蕩間，才看出人情冷暖。楊受成說起霆鋒被噓往事，竟淚滿盈眶，一度暫停訪問。

謝：當時返港後大家都冇信心，一出嚟就畀人噓，粗口呀、水樽呀……噓到連續四年冇一次聽到自己唱咩，每次都要咬實牙關唱埋落去，但冇諗過放棄，好多次跌倒，係老闆秤番我上嚟。

楊：霆鋒條路好辛苦，一出道畀人噓，佢難受，我更難受。最記得當時張國榮打畀我：「我都係喺噓聲長大，你同霆鋒講，叫佢努力，唔好放棄，我支持佢。」霆鋒係唔應該畀人噓，真係唔知點解，佢靚仔，父母係明星，冇得罪人，唔明點解對佢咁唔公道。

記：霆鋒，你覺得邊次跌得最慘？

謝：（搖搖頭嘆氣）數之不盡，直接啲講，係02年頂包案。我啱啱喺蒙地卡羅攞咗全世界最暢銷華人男歌手獎，隔兩個月就要我坐半個月監，對一個廿二歲嘅小朋友嚟講，呢個崩潰係冇得再大，有邊個老闆仲會畀機會我？

記：老闆咁撐你，係咪你續約英皇嘅原因？

謝：唔止。每次有困難，老闆係無條件幫我。今日我有間大公司（PO），但都係11年９月底先還晒所有錢畀老闆，係佢默默實現我夢想，呢啲係冇人知。

楊：平時我同霆鋒一句起兩句止。佢同我傾續約，都係三句講晒；佢話咁樣，我還佢一句，跟住大家話冇問題就握手！之後我畀Mani鬧到趴喺度。

謝：（笑）當時傾續約，我諗定三個方案，點知講完第一個，老闆就即刻答應。

楊：第一個梗係對佢最有利，點知我話制，哈哈哈！

謝：傾完老闆親自同我去Legal部門搞份約，全部人聽到呆咗，老闆仲話：「有咩事就搵我楊受成！」我真係估唔到！其實，老闆同我都好重感情。當年葉崇仁死，陳伯叫我唔好去（喪禮），否則衰五年，但我一定要去，陳伯就畀封利是叫我喺門口燒。

記：霆鋒依家開咗公司，有咩意見畀佢？

楊：佢用二百萬請伙記去旅行，你話佢幾有錢？遲啲佢有錢過我！哈哈！佢跟我咁多年，知道做老闆嘅態度同胸襟，佢係有。

發奮向上　緣於自卑

多次強調做人要爭氣的楊受成，對爭氣一詞身同感受，意義深邃。《爭氣》作為楊生自傳之名，亦是愛將祖兒的金曲，祖兒笑指老闆的電話接駁鈴聲一直都是《爭氣》。楊生小時雖是鐘錶店的太子爺，但實則有苦自己知。「老竇唔係打好江山畀我做皇帝，查實我日日跑山撲水。老竇不擅理財，只係鍾意娶老婆同生仔，我有十個妹，五個細佬，你話一間舖頭仔點養得起咁多人？試過一星期去五六次當舖，由細至大都係underdog，所以我謙卑有禮唔係做出嚟。」

緣於自卑，受盡白眼，所以楊受成直言常有四、五萬元現金不離身。「由細到大都係好窮，冇大舊錢喺袋會好冇安全感。」

延續英皇精神

問楊受成口中的「頂心杉」霆鋒如何看英皇大家庭，祖兒插嘴：「好疏離！」連霆鋒都不好意思，直認經常激嬲老闆：「有年老闆預祝我生日，但我都頂到佢要即時走人。事後Mani話老闆預備咗份過百萬嘅禮物畀我，我竟然搞到佢咁唔開心走咗去！但呢兩三年會諗，老闆都一把年紀，如果有日唔再支持英皇娛樂，Touchwood講有咩病痛，第一個我會打畀祖兒。」眾人一臉驚訝，祖兒問：「你頂住？」

楊受成說：「我諗因為佢反省過，知道激咗我咁多年，我嚟緊唔係好長日子，再激死我就冇人激。」祖兒緊張：「啋啋啋！如果有呢個機會，我想承接落去。」霆鋒接着說：「係攜手將英皇娛樂嘅精神延續落去。除咗父母，有邊個係喺你有問題時，會諗起？老闆係我哋首選。如果老闆有咩頭暈身慶，我哋唔打落去？正×街仔啦！十一年前，老闆講過只錫兩種人，一種係有料同爭氣，另一種係忠心。有啲人係叻極有限，但忠心幫公司都係抵錫！」楊受成聞言即拍掌：「係！呢句中！佢哋真係好好，有本事、有本心，我真係好開心。」