本來諗住試揸飛機的王敏德，最終都係去駕駛艙睇吓就算，「如果真係揸就唔可以飲酒。」

曾特首接受富豪款待，豪歎私人遊艇和飛機，全民鬧爆。王敏德上個禮拜就高調接受加拿大飛機製造商Bombardier的招待，邀請埋合作crossover出行李箱的德國Rimowa老闆，乘坐私人飛機Challenger 850飛越南胡志明市，食完晚飯翌日即閃，成班老細在空中豪歎香檳、紅酒，攞正牌利益輸送！

專人服侍
好難怪特首同班富豪鍾意坐私人飛機，因為實在太方便，太有私隱，太虛榮啦！無論是香港或越南，在私人飛機專用的大樓內，只要將證件交給工作人員，飲完杯咖啡便可施施然登機，富豪、名人完全杜絕打擾。
今次只有十一位乘客的越南private jet tour，兩日一夜的行程，連機師及空姐，若要收費盛惠港幣約請三十二萬，王敏德連經濟客位的錢也不用付，便可與特首睇齊，「我之前都坐過七、八次私人飛機，第一次係（九四年）坐Jacky（成龍）架機，同佢仲有Willie（成龍前經理人陳自強）飛去新加坡Planet Hollywood 開幕；之後亦有帶埋Janet（太太馬詩慧）同兩個女坐過。」

香港名牌
無論是日本、韓國抑或台灣的過江龍，都會努力學習廣東話，但拍戲做警官、飛虎已廿多年的Michael，他的廣東話依然半桶水都欠奉，難免給人一種過客的感覺，但去年四月他建立了自家品牌MW，還強調這是香港名牌，「我知觀眾都當我係鬼佬，但我太太、仔女係香港人，我啲親戚都係香港人，我嘅家庭、事業都喺度，所以我希望俾番啲嘢香港，develop一個made in Hong Kong嘅高級品牌。」他由自己喜歡的衣食住行，生活態度出發去設計，再找人投資，當中包括為Rimowa設計了三款行李箱，下月又與水晶品牌Baccarat crossover推出水晶酒杯，又會夥拍紅酒商生產MW紅酒等，「I love brand，I love label，所以會走高格調、high-end路線，遲啲MW仲會出men's line。」Michael一向識飲識食，怎不考慮開餐廳？「哈哈！呢樣真係要credit番我太太，佢成日要我著靚啲去function，最初我都唔明點解，俾我自己揀，只會著T恤、牛仔褲。」去年Michael明顯少了在銀幕曝光，以為他已轉型做生意人，誰知他果然十足香港人一樣識計數，「前兩年我比較靜，舊年尾我拍咗《大追捕》，今年仲有兩部戲，我唔會放棄電影，因要靠做戲keep住知名度，客人會買呢個品牌係因為佢嘅value，而MW嘅value來自我，所以會繼續拍戲。」

 

十年買機
已經會揸直升機的他，初時都話有興趣學揸private jet，但諗兩諗就轉軚，「揸飛機同直升機好唔同，揸直升機要好大體力，機師要即時作出決定，但飛機起飛前已入晒program。」當然更重要是坐private jet梗係要做乘客先夠歎嘅！幾時買隻私人飛機豪吓先？「我都想，希望十年內可以買到隻MV private jet啦！」

空中行宮
今次Michael乘坐的Challenger 850私人飛機，與曾特首接受款待的Global Express，都是由加拿大飛機製造商Bombardier生產，身價達二億四千九百萬港幣，可接載乘客十四人，基本機艙有三個，近機尾的機艙更可變身睡房，而座位亦可隨客人心意設計安排。 ####


Michael好識做，主動揸機幫Rimowa德國CEO Morszeck和遠東區GM Charles影相留念（右圖）。


與王敏德同行的朋友，帶了一箱香檳及紅酒登機，而機上的酒杯、刀叉，都是用法國名牌Christofle。


Bombardier Challenger 850是同款機中載客量最多的型號。


飛機抵達新山一國際機場，即有專人接機、擔遮，又有車價三百幾萬的Limo接載。


真正逗留胡志明市的時間不足廿四小時，首次來越南的Michael，一落機即四圍影相，買街頭小食。


晚宴上，飲到high high哋的他，跳上櫈載歌載舞娛賓。


他設計的三款行李箱，當然少不了這款專用來放酒的wine case。


王敏德出席越南Rimowa店開幕，一到埗即被女圍。


Michael送給太太Janet的手信，竟是酒店送的免費熊公仔，「佢乜都有嘛！」



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄