11/3 本週日，大肚GiGi從北京工作返港，Sergio全程做跟得老公，步出機場關口時見附近人多，於是上前扶實再拖住太太，十分緊張。

去年十月閃電下嫁西班牙籍丈夫Sergio的GiGi梁詠琪，近期因為身材發水，多次傳出懷有龍B。一直恨做媽咪，GiGi婚後從來不設防，又不時推job。最新消息，指GiGi已向台灣友人透露成功造人喜訊，並打算全面停工安胎，日後只會選擇性工作，一切以家庭為重。五月在台灣舉行的演唱會，該是GiGi產前最後一show。

Hea住做
既然已經做好準備做媽咪，GiGi的事業心也相對地放軟手腳。「以前GiGi工作好主動，成日問幾時出碟，有冇收到電影劇本，而家佢成個唔同晒，由舊年結婚開始，起碼推咗三場巡迴演唱會，電影更加唔想接。佢話想多啲時間養好身體生仔，只係肯接商演或者廣告，因為呢啲job只係花一日半日時間，又唔會辛苦，就算有BB都應付到，反而拍戲太困身，臨時推戲又驚影響到人，所以而家接嘢好小心，總之要唔辛苦，唔使舟車勞頓。」知情者說。有錢唔願賺，但GiGi亦非大花筒，入行後有媽咪管理財政，血汗錢大部分用來買磚頭保值，即使將來有了小朋友，也不急於搵錢養家。「聽講Sergio收入唔差，雖然唔可以同GiGi比，但一定唔會餓死老婆囉，加上Sergio本身屋企都有錢，佢而家又調咗嚟香港做嘢，就算要佢一個人孭起頭家，都唔成問題。」GiGi身邊人 說。

效法千嬅
工作和財政兩方面均毫無壓力，婚後積極造人的GiGi，據知已懷孕兩個月，更急不及待第一時間通知台灣的好友。
「GiGi响台灣最多好朋友，之前秘密結婚，都係台灣嗰邊走漏風聲，可能因為五月要過去開騷，所以報定案，不過個肚未夠三個月，所以佢唔敢太公開，驚BB小器。」
在台灣憑一曲《短髮》成名，GiGi一直希望在當地開個人演唱會，所以即使預咗隨時有，她也堅持唱，也是她婚後唯一最着緊的工作。
「佢話見到楊千嬅大住個肚都可以唱，對自己都有信心，最多到時唔跳舞，著平底鞋唱喎。不過以佢嘅性格，BB出世後一定專心湊仔陪老公，我哋都估佢呢次台灣係last show，就算唔退出娛樂圈，將來幕前工作都唔會多！」GiGi身邊人說。
畢竟已經三十六歲，屬高齡產婦的GiGi，當然要分外小心身體，成功懷孕前，她不時跟老公跑街做運動，因而令準媽咪提心吊膽。
「好在冇事咋！但上個禮拜GiGi去天津開工，Sergio都跟到實，怕老婆唔舒服，仲緊張到行到邊都拖實GiGi隻手！」

嫁人唔願做
即使是天生工作狂，圈中唔少女星都甘願為丈夫、為子女，放下事業，甚至全面息影，開展人生另一個階段。

黎　姿
08年，黎姿在台慶劇《珠光寶氣》的首播活動中，突然宣布退出，當時她解釋因為要照顧父母，以及因交通意外受重傷的親弟黎嬰，才有此決定；但實情是黎姿已準備下嫁拍拖多年的富商馬廷強，三個月後，黎姿正式宣布做馬太，並於2010年誕下孖女家蔚、家鎂。

葉玉卿
亞姐出身的葉玉卿，91年憑三級片《情不自禁》一脫成名後，第一時間轉型做主持、出唱片。之後認識了從事超級市場及批發生意的美國華裔富商胡兆明，二人98年結婚，葉玉卿隨夫移居美國生活，育有三名兒女。

邱淑貞
87年參加香港小姐，因被傳整容而退選的邱淑貞，後得導演王晶睇中，電影長拍長有，更憑《愈快樂愈墮落》獲金像獎提名最佳女主角。直至與時裝店I.T創辦人沈嘉偉99年結婚，便絕跡幕前，全職做家庭主婦，為丈夫先後誕下三名女兒。 ####


扶腰二人去年十月到西班牙秘密結婚，據知GiGi丈夫Sergio在雀巢牛奶公司研發部任職高層，月薪過十萬，即使老婆將來息影，也有能力照顧GiGi同BB。


GiGi到天津出席美亞影城開幕禮，因為身穿闊身娃娃裙，內地傳媒已經懷疑她有孕。


上兩個禮拜，身形圓潤不少的GiGi，未知自己已懷孕，還跟老公Sergio落街跑步，不過跑了一小段路便無氣無力，要老公拖實慢慢行。（《FACE》圖片）


去年年尾，楊千嬅佗住三個月肚開了五場演唱會，更在台上赤腳防滑倒，據知大肚GiGi也有意效法。（《FACE》圖片）


3/3


上兩個禮拜，身形圓潤不少的GiGi，未知自己已懷孕，還跟老公Sergio落街跑步，不過跑了一小段路便無氣無力，要老公拖實慢慢行。


（《蘋果日報》圖片）



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄