不是我立壞心腸，難聽點說，總是覺得Swing「死唔斷氣」。
今個月尾，Swing舉行「後會無期告別演唱會」，話係正式解散，朋友、同事的第一個反應：「唔係散咗啦咩？」、「好耐之前已經話去加拿大啦！」、「又復合？」本能反應，記者劈頭就問：「今次真係解散？」二人聞言大笑好一陣子，郭偉亮（Eric）笑着說：「因為我成日講嘢冇句真呀嘛？今次真嘅！堅㗎啦！」接着是陳哲廬（Jerald）：「好正呀！唔關你（Eric）事嘅，係我嘅錯，今次真㗎啦，OK？真係全行、所有傳媒都……嘩！你「狼來了」咗好耐囉喎。」看來，今次應該……死得去。

走硬
Swing狼來了的故事劇情是：○○年組成，○二年解散，○九年重組，今年又宣布正式解散。「今次係堅㗎、係真㗎！」Jerald肯定地說，接着是Eric，「佢老婆等咗佢好耐啦，再唔就走離婚，所以走硬呢鋪！」、「咁又冇講到呢一句……即係如果再唔走，就feel到我嘅婚姻會有一個好大嘅危機。」、「有二奶就有二奶啦，關走唔走咩事？我話嘅，哈哈哈。」
你一言、我一語。Jerald說離開香港，大部分原因是為了女兒陳靖曦，「第一，喺香港養個細路仔要四百萬，我冇呀，第二，香港壓力好大，for個細路仔，尤其是讀書，個書包仲重過個人、咩都講成績，我哋唔想個女喺呢個環境長大。」Eric亦說Jerald有了女兒後，變了很多，「佢生完個女咪體會到以前好多所謂大問題，其實都係好無聊，而家所有嘢都以個女行先，佢變咗唔係以佢自己為中心，係以佢個女為中心，學識做一個睇化啲嘅人。」
其實他們於○九年重組時，已決定出三張唱片，開一個賣飛的演唱會，之後「分手」，Jerald說：「用Swing去結束我喺香港十五年嘅生涯，我覺得係一個好好嘅ending。」Eric坦言還未有不捨的感覺，但在演唱會上喊就肯定，「今次係最後一次，又有佢喺度，我諗喊就應該會，但幾多次真係唔知，最好唔好咁多次啦，好㗎嘛。（Jerald：同埋好悶呀！）男人老狗又喊？」

屎忽痕
對於「復合」，Eric已經見怪不怪，因為○二年至○九年間，Jerald提出過三次復合，是以他已經沒有太大感覺，因為他太了解Jerald，「佢呢個人反覆得好犀利，今日可以好熱誠咁打個電話俾你，夜麻麻講到天花龍鳳，隔日就『我諗過都係唔好啦』。所以每次聽完電話，都係等緊下一個電話，佢最尾嗰次打嚟同我講話復合啦，搵到張contract啦！」頭兩次復合，Jerald自認「屎忽痕」，第三次最認真，連唱片公司高層也找出來談，談得七七八八，但最後還是拉倒，「因為我有個條件，就係一個宣傳都唔做，Eric做晒，嗰時連橋都諗埋，拎個Jerald紙板公仔出嚟，但對方都係話唔得，咁就算數囉。」Jerald不喜歡拍照、不喜歡「artist」的身份，第一次拆伙，亦是因為這些原因，「第一，我唔識擺甫士，啲相唔會好睇；第二，我係想promote自己音樂，有時影咗成個晏晝，到頭來一係唔出、一係得一角，唔好嘥我心機！」第一次拆伙，Eric最不開心、亦不願意，因為他覺得最難捱的時候已經捱過，當時剛開始成功、入屋，是收割的時候，但他沒有挽留。「如果佢唔想玩就冇意思，無謂迫佢，只不過覺得可惜。」其實解散前，二人已經去到「面左左」的地步，因為唱片公司經常會選Eric作的歌去plug，Eric直認這是決裂的其中一個原因，「我作嘅歌比較pop，佢就好鬼佬，其實應該話Swing嘅靈魂係Jerald比較重，但係唱片公司好多時係揀啲比較safe嘅歌。」這樣一來，令Jerald開始懷疑自己在樂隊中的重要性，甚至懷疑自己的能力，「我可以被替代，佢可以拍任何一個人都做到Swing，覺得自己冇乜價值，信心受到好大打擊，當時幾depressed，搞到我同我太太關係都唔係幾好，係事業上嘅低潮。」

太天真太傻
二人在音樂路上，看似是南轅北轍，但剛加入樂壇時，其實是目標一致，Jerald還記得Eric的CV第一欄寫着：「To gain maximun exposure in the Hong Kong music industry」，「我好記得呢一句，心諗：『正呀！同我vision一樣。』」他們想改變樂壇，但八年前已經知道沒有可能，Jerald說：「覺得自己太天真、好傻，改咩變樂壇啫！」Eric說：「我可以話俾你聽個樂壇係改變中，但唔關我哋事，今時今日啲碟賣到咁差，係唔關我哋事，哈哈哈。」 ####


Swing解散，Eric不打算再夾band，「夾band好似結婚，好難搵到個啱嘅老婆。」


今年三十七歲的Eric與三十一歲的女友葉佩汶拍拖十一年，他說父母沒有給他壓力，但亦有打算結婚。


三十八歲的Jerald於○二年結婚，女兒快將兩歲。


Swing去年八月推出的最後一隻EP。


不愛宣傳的Jerald（右），去年難得肯和Eric一起扮鬼扮馬出席頒獎禮。


Jerald已經向加拿大政府申請入稅局工作，但他最想做的是海關，因為政府工收入穩定。


分手後，Eric會繼續在香港樂壇隻揪。


歲半的Eric。


Jerald的裸照。


孩童時的郭永亮（右一）與父親（左一）、母親（左二）及弟弟（右二）合照。

arrow
arrow
    文章標籤
    死唔斷氣　Swing 壹週刊 1029期
    全站熱搜

    stacylife 發表在 痞客邦 留言(0) 人氣()

    E-mail轉寄