我對自己好有信心！(真實對白)
被問到《義海》收視差，法拉就話：「收視我控制唔到！我對自己好有信心！」問佢係咪想攞獎，佢話：「唔係，我講演出啫！」
2010年11月03日
《義海》播咗兩星期，上週平均收視只得 31點，排骨仔敖嘉年夠慘、非凡哥麥包夠奸。劇中主角配角都彈起，惟獨第二女主角、今年視后大熱嘅陳法拉卻脫腳，同黃浩然首場（第 5集感情戲，法拉更濕身上陣），竟然係首週最差收視，只得 27點。為免悶親觀眾，監製李添勝更喺第 7集 cut走法拉 4場戲，寧願播骨嫲棺材，都唔出法拉談情戲。添哥仲話：「嗰場戲好貴唔 cut得 o架，我想畀觀眾知以前點做白事！」法拉慘輸骨嫲棺材，大吉利是！
28歲陳法拉，今年劇接劇，但要數最有機會彈起，一定係《義海》入面晴晴呢個角色。劇中演大悲友身懷絕症，同第二男主角黃浩然有純愛感情線，之後又要為家人獻身日軍，超討好角色，等攞獎格局。
談情戲趕客
角色有發揮，唔等於觀眾接受。法拉喺《義海》第 5集（ 22日）首場講及黃浩然冒雨接送一幕感情戲，劇情超感人，可惜收視只得 27點。據劇組人員透露：「佢同黃浩然開段冇乜起伏，監製都驚觀眾叫悶 o架！」添哥亦手起刀落，喺第七集中 cut咗法拉 4場戲，其中三場更係佢同黃浩然首次過電戲分。 Cut戲法拉懵懵吓，要睇電視先知俾人「無情刀」，當晚即在微博抗議：「 Why？ Why？ Why？……那場超浪漫的！我快哭。」
感情戲趕客，上週五（第 10集）法拉同冬妮（江美儀）告別一幕更創新低 25點，不過法拉對收視看得淡，仲話對自己好有信心。
F：《 FACE》 陳：陳法拉
F：第 7集俾人 cut戲你嬲到喺微博發火喎！
陳：哦！我睇電視先知！我冇發火！我問過添哥係因為 duration（片長時間）問題啫！要減啲場口，咁當然有少少失望，因為每一場都係心血。
F：有你嘅戲分都收視差少少喎！
陳：收視我控制唔到！我對自己好有信心！
「之後唔會再 cut」
添哥亦話：「法拉做得好好，但嗰集係太長關係，所以被迫剪走，我拍骨嫲嗰場用咗成萬銀呀！好貴呀唔 cut得，同埋最重要我想觀眾了解當時佢哋點處理白事，之後唔會再 cut佢！（有親法拉收視都低喎！）唔關佢事，係因為太早（播）喇！ myTV爆晒燈呀！」爆燈都冇用！《讀心神探》姚 sir平均收視 32點，高《義》劇一點，唔該快啲轉時間播啦。
場戲貴唔 cut得！
添哥強調之後戲分冇再 cut法拉任何戲，佢仲暗示收視一般係播映時間問題：「啲人都未返到屋企，我知 myTV爆晒燈，但係我冇能力改播映時間呀！」
遇襲事件惹罵戰
觀眾晚晚等睇《義海》劇情，但係排骨仔（敖嘉年）上週三（上月 27日）涉嫌被冼灝英掟杯襲擊事件一樣咁吸引，排骨仔堅稱：「好明顯見到冼師傅一拳打埋嚟。」而冼師傅就向傳媒透露：「一門無二師，我對佢好失望！」口同鼻拗，邊個先真？
向來老實唔扮嘢嘅冼師傅就得大班圈中徒弟力撐，馬國明本週一對本刊撐硬冼師傅：「知道單新聞都好愕然，佢（冼灝英）免費教我拳同棍，我哋晨早 6、 7點就到公園練武，佢教我哋做人要少是非，所以我信師傅！」連喺《義海》演非凡哥嘅麥包都有義氣寸爆敖嘉年：「我廿幾年前拜冼師傅，除咗學拳同棍，佢仲教埋做人道理，要以德服人，學武唔係用嚟打交，今次事件事我唔了解，但係我自己拜咗師就一定唔會轉另一個師傅，會好尷尬，呢啲人好冇道德！」
非凡哥關二哥上身，但有傳襲擊案係當晚在場嘅梁靖琪（ Toby）煽風點火，令場面升溫所致，週一（ 1日）致電排骨仔，佢就表示：「你喺邊度收番嚟？我唔回應啦，家有咁多不實報道，只希望件事快啲過！」而 Toby到截稿前仍未回覆！
非凡哥暗插排骨仔︰呢啲人好冇道德！
本刊致電麥包，問有關遇襲事件，雖然佢即時話冇在場唔清楚事件，但又主動話拜師係一世，半路轉師好冇道德，說話有骨，暗寸敖嘉年，果然係非凡哥！
瘀青眼
敖嘉年週一對本刊說：「事件已落咗口供，唔方便回應，但傷勢已經復元緊，家每晚接受推拿師治療，希望快啲好番。」
帶傷宣傳
有傳因轉拜陳觀泰為師，辣㷫冼灝英而遭掟杯襲擊的排骨仔，週日（ 31日）左眼角仍貼住膠布，帶傷出席《義海》宣傳。但對遭襲案佢就改口話：「冼師傅份人好正能量。」
《義海》 15-18集高潮位
胡定欣跣法拉俾日軍搞
11月 28日會播映兩小時《義海》大結局，本週播到一半，講日本仔打到嚟廣州，搞到民不潦生，非凡哥（麥長青飾）出獄後糾黨四圍搶劫。第 16集，麗華（胡定欣飾）冒險出街俾日軍拉入橫巷，意圖強暴，千鈞一髮麗華扮肺癆，但就供出晴（陳法拉飾）匿埋地點，叫日軍去捉佢。
劉醒救九妹決裂收場
日軍佔領廣州，向山（金剛飾）迫九妹（鄧萃雯飾）開鴉片煙館，搞到人人以為九妹係漢奸。第 18集，新煙館開張，九妹上台演說期間遇槍手埋伏，醒（黎耀祥飾）捨身撲上前相救，結果醒背脊肩膊中槍，向山就掩護九妹上車逃去。
醒養傷期間，向九妹埋怨因認識她後行衰運，九妹雖連聲說：「對不起！」但醒因自己受傷而連累妹妹晴留醫，不斷自責。最後九妹怕再連累醒，而提出絕交。
再爆金句
日軍快將佔領廣州，九妹與醒等街坊難得有機會濟濟一堂暢飲，感觸說：「但願人長久，千里共嬋娟！」而成為《義》劇中段至尾段主角之間嘅經典金句。
留言列表
{{ article.title }}
