阮兆祥︰多啲火花係好嘅！(真實對白)
王祖藍︰對我哋節目好有信心！(真實對白)
李思捷︰係真先算啦！(真實對白)
《蘋果日報》圖片
2010年11月03日
明年初政府扑鎚免費電視牌照，加埋無綫亞視， 5個免費電視台鬥餐死，小小超李澤楷旗下的電訊盈科近來招兵買馬，財雄勢大，無綫好難再一台獨大。
據知，掌管無綫綜藝科嘅製作總監何麗全去意已決，過檔埋小小超堆。為應付大戰，無綫急撬台灣綜藝節目大哥大、前亞視製作副總裁鄭偉強入主綜藝科接手揸旗。
鄭偉強下月新官上任，據知首要任務係重整《獎門人》兼重新打造《荃加福祿壽》。開山劈石，何只三把火！
重點改革
由阮兆祥、李思捷和王祖藍孭飛的《荃家福祿壽》 hit到將於今年開演唱會，但據知鄭偉強入主無綫綜藝科後，《福祿壽》將會成為主要改革對象，對此李思捷說：「係真先算啦！」
自前總經理陳志雲被 ICAC起訴後，陳總親信盤崩瓦解，據知本有心留低的何麗全，亦因陳總復職無期，加上有意爭取新免費電視牌照的李澤楷銀彈攻勢，故何麗全將於三月正式過檔小小超新檔。
12月上任
何麗全起身，據知無綫集團總經理李寶安親自斟掂、曾製作台灣《康熙來了》和亞視《香港亂噏》同《亞洲星光大道》的綜藝老手鄭偉強頂上，知情者說：「《福祿壽》根本用番幾十年前《歡樂今宵》嗰套，扮嘢都可以有內容，總之阿鄭（鄭偉強）就一定會推倒重來，唔會照抄出街。」
上週五（ 29日）鄭偉強電話回應話：「離開咗 TVB 21年，今次係返台灣 TVBI負責製作嘅嘢，（係咪會返香港代何麗全？）我唔知何生係咪唔做，不過所有嘢都等公司安排啦，我到家都未知喺台灣做咩位 o架，（有冇新搞作帶番 TVB呀？）有呀，諗咗 o架啦，不過等我返咗工先話你知啦，我 12月先正式就職！」
超強老細上場，首當其衝嘅《福祿壽》就各有睇法，阮兆祥話：「一向人哋都覺得 TVB戲劇組較強，綜藝開始有改善，多個人，多個腦嘛！改革係好事，咁先會令節目更好，如果何生真係唔做，我會覺得好可惜，不過唔會話舊人走就影響節目，有新人新火花係好，唔係火爆咪得囉！」
而週一（ 1日）王祖藍出席活動時就話：「我剛剛去過台灣，佢哋嘅綜藝真係比較出色，但《福祿壽》都係我哋自己度橋，講模仿節目，冇一個比《福祿壽》好，就算改革，都係為迎合觀眾啫！」至於有傳將於 3月離任的何麗全則說：「我係咪離開 TVB唔再講喇，我個位個個都坐得，鄭生喺呢行好耐，佢好有經驗！」
《獎門人》都要執
由 95年起開始播出的《獎門人》系列，節目概念亦是源自台灣，但可惜玩法欠新意收視一度跌至 26點，據知亦是鄭偉強另一改革重點，難怪志偉曾說：「話咗唔做，無端端又做。」
金牌製作人夠創意
現年 61歲的鄭偉強， 7年前在台灣中天電視台製作了《康熙來了》和《全民最大黨》等受歡迎節目，去年 3月鄭偉強入主亞視綜藝科後，又在有限資源下創作了《香港亂噏》和主理第一屆《亞洲星光大道》，造就了盧海鵬扮周秀娜和羅力威的網上熱話，可惜亞視股東頻換，鄭偉強亦黯然離職，難怪鄭說：「我對亞視感到好無奈。」
何麗全吹雞閃
除了有線電視旗下的奇妙電視和王維基旗下的城市電訊外，李澤楷旗下的香港電視娛樂亦對來年的免費電視牌照志在必得，據知李澤楷已重金禮聘無綫高層何麗全過檔，而何麗全亦搵埋早前離職的錢國偉和現任無綫綜藝科經理陳家揚過檔，對此錢國偉只說：「我家喺北京，返嚟先再傾啦！」至於鄭偉強入主，於亞視曾跟過鄭搵食嘅現任無綫監製麥鎮東則說：「佢係一個好資深嘅製作人，佢坐乜位我唔知，我哋都係做製作啫！」
索乖女做 o靚模
除咗無綫高層梁家樹有個乖女梁靖琪（ Toby），因父之名成功拍戲外，原來鄭偉強亦有一名索乖女做 model。
現年 25歲的鄭文斯（ Mancy），喺加拿大浸過鹹水讀完大學返嚟，現簽了 Starz People為經理人，開正牌頭係楊梓瑤（ Carol）師妹，對於父親成為無綫高層，有老豆帶挈乖女更多機會亮相， Mancy則說：「我淨係知佢會返 TVB，我家主力做 model工作，仲未諗過叫爹哋帶挈我入 TVB。」
留言列表
{{ article.title }}
