梁嘉琪原來同劇中拍檔江若琳一樣，大家都試過戶口得幾廿蚊，安信可以諗吓搵佢哋做安信姊妹拍廣告喎！
Macy：有請食飯
逐步上位
問 friend借錢
入無綫後，第一部重頭劇係 08年拍住陳鍵鋒及吳卓羲嘅《學警狙擊》，可惜演技幼嫩惹來惡評：「雖然當時有機會同江若琳孖住做女角，但可能我真係未夠班，好多網友都話好憎我個角色，仲話睇到我要轉台，所以我都唔開心咗一段時間。靜咗差唔多 2年時間，我都只係客串吓啲劇集做閒角，收入根本唔夠使，我以前（有線）一出糧都可以好豪咁畀家用，但嗰兩年真係畀唔到，我自己都唔夠使，但我驚屋企人擔心，日日出街扮返工，仲試過問最 close嘅朋友借錢添，最窮嗰陣，我試過戶口得番幾廿蚊。」
喊住上位
發霉期間，佢客串《囧探查過界》時因角色要成日喊，因而成功被《女拳》監製羅永賢睇中，先畀機會佢在《女》劇拍住小生馬國明做夫妻，結果令佢殺夫狼心上位，更有機會拍台慶劇《回到三國》，「我都好多謝呢部劇嘅監製，因為我唔識擦鞋兼埋堆，但佢哋好肯畀機會我，尤其《三國》監製家豪哥（劉家豪），畀機會我同林峯做夫妻，我第一次同林峯做對手，但佢都好認真，絕冇因潘霜霜件事影響拍劇，戲入面我做佢老婆（諸葛嫂）要化淡妝病樣演出，雖然戲分唔多，但難得拍到台慶劇我都好開心。」
冇搵前度張繼聰
張繼聰同梁嘉琪呢對舊情人，早喺 98年讀演藝學院時認識，張繼聰早梁嘉琪一屆，以師兄身份成日教佢做戲成功溝掂，但有傳因男嘅恨結婚生仔、女嘅恨入娛樂圈，兩人拍拖 7年，去到 05年傳被謝安琪介入導致分手收場。佢話：「人哋家都結晒婚、生埋仔喇，都冇嘢好提啦！」《蘋果日報》圖片
Kay姐睇實
張繼聰與謝安琪都係大埔恩主教書院畢業，兩人喺 07年結婚後同年更添咗男丁張瞻。張繼聰事業一直未及天后級嘅老婆理想，雖然成日被取笑夫憑妻貴，但一家三口都叫幸福之家。《蘋果日報》圖片
奀星情人
訪問期間梁嘉琪除咗爆辛酸史，亦都有自爆喺發霉期曾經同個奀星曖昧咗一年，二人僅 SMS、傾電話和出街食飯，礙於佢自己事業停滯不前，同埋擔心男方未必養得起佢，所以嘉琪以「唔啱 timing」來形容呢段情，本刊翻查同佢合作過嘅奀星，有兩個疑似奀星情人嘅可能。而佢亦喺一再追問下死口唔講係邊個，佢話：「總之嗰個人係圈中人，我家係單身，唔講嗰個係邊個喇！」
留言列表
{{ article.title }}
