人肉速遞台灣車震女朱慧敏再遇賤男忽然１周 779期 @ 娛樂八掛大放送★

04年港姐亞軍朱慧敏，出道之初因與梁榮忠車震，矇查查做了第三者，雖然事後急撇賤男，但差點賠上事業。
今年5月，本刊踢爆朱慧敏有溫州富豪大水喉射住，身家三級跳，不但黑卡掃名牌，更月租15萬貝沙灣。不過，原來朱小姐背後的水喉，唔只一條。
6月10日及20日，本刊發現朱慧敏兩度搭凌晨機赴台會闊少，並在對方位於台北大直區5千萬台幣（約港幣1,200萬）豪宅過夜，兩人的慾火更燒到落機場，在眾目睽睽下親密攬啜。不過，正當朱慧敏以為已生擒闊少，原來花心闊少卻在她返港期間，到夜店攬辣妹。朱慧敏再遇賤男，唔通係宿命？

05年發生車震事件後，朱慧敏一度遭無綫雪藏。不過，肯露肯搏的她，經過幾年努力，被監製戚其義收為愛將，終於成功攀上二線姐仔位置。雖然經常飾演大胸姣秘書、情婦等角色，但總算長做長有。平均月薪僅二萬的她，近日卻突然富貴，有傳她背後有個年約45歲的溫州富豪大水喉射住。不過，本刊發現最近她還多了個台灣闊少。朱慧敏不但桃花旺，錢途更旺！

凌晨機掩人耳目
近年積極釣金龜的朱慧敏，為免與闊少親密關係曝光，每次赴台都分外小心，不但衣着低調，更大多選擇乘搭清晨或凌晨班次的航機，藉以掩人耳目。
6月3日凌晨朱慧敏獨自赴台，知情者說︰「嗰晚朱慧敏一個人坐凌晨12點幾嘅飛機去台灣。佢最近比較清閒，新劇《點解阿Sir係阿Sir》6月尾先有佢嘅戲份，所以佢就盡量爭取時間去台灣瘟仔。」
記者連日在桃園機場守候，終於在6月10日清晨7時許，發現朱慧敏在一名年約32歲的男子護送下，到達桃園機場。兩人初時十分避忌，左望右望，其後見沒有可疑人物，才放下警覺性。

住千萬豪宅
朱慧敏check in後，便與男子到快餐店嘆早餐。朱慧敏全程十分好服侍，買完早餐送到埋枱。其間，兩人談笑甚歡，女方不時發放電眼，對方當然暈得一陣陣。之後男子送她上機，在閘口前，兩人攬攬啜啜，慾火燃燒足足10分鐘，女方才依依不捨離開。記者隨後跟蹤，發現該男子住在台北大直區，價值5千萬台幣（約1,200萬港幣）大直花園中的2千呎單位。
知情者說︰「Queenie（朱慧敏洋名）最近識咗個闊少，姓張嘅，係做IT生意。個男仔好冧佢，雖然身在台灣，但不時會速遞送禮冧女，又日日send sms傳情。Queenie雖然有個溫州富豪追，但多一個追求者，女仔唔會嫌多o架！佢依家仲心大心細，唔知揀邊個好。不過，最近Queenie一有時間，即會飛過去會闊少，仲住喺人哋間豪宅度，總之就好癡纏啦！」

辣妹埋身攬
朱慧敏一心諗住泊到好碼頭，誰知朱慧敏返港唔夠一星期，IT闊少已經身痕，夜會辣妹。6月18日晚9時許，IT闊少從寓所大直花園出來，先抽了一根煙，然後「打的」到附近的大直摩天輪的露天酒吧。其間見闊少不停打電話，並在酒吧前行來行去。10分鐘後，一個年約廿多歲的長髮辣妹出現，並熱情地撲向闊少，兩人緊緊攬着，之後便坐下來邊飲酒邊談心。
記者坐在他們旁邊，只見闊少不時逗辣妹開心，又讚她「頭髮又長又美」，辣妹十分受落，多次將身子挨近闊少。看兩人親密舉動，絕對情非泛泛。10時許，闊少接到電話，只見他神色一沉，突然向辣妹告別，只聽到辣妹回敬一句「沒趣」，闊少便「打的」回家。
兩天後（20號父親節），記者發現朱慧敏、闊少及其父親從寓所大直花園出來。當晚，朱慧敏更與闊少一家人晚飯，看來朱今次特別抽空赴台為闊少的父親慶祝父親節。記者估計早兩晚是因為朱慧敏殺到，闊少才突然告別辣妹。
兩天前，朱慧敏還與闊少家人飯局一家親，不過23日清晨，闊少送別朱慧敏時，兩人不知所為何事，在桃園機場停車場嗌交。朱落車後拋下闊少一支箭飆入內，闊少則狂扯了一口煙後到counter找朱慧敏，但朱慧敏卻完全當闊少冇到，自己嬲爆爆入閘。她突然變臉，唔通發現闊少一腳搭兩船？

回應兩度講大話
本周三（30日），朱慧敏返回電視城拍攝新劇《點解阿Sir係阿Sir》時，記者就她人肉速遞台灣，以及闊少背她偷會辣妹一事，向她求證。她初時否認戀情，直至記者遞上照片，她才180度轉口風，仲叫傳媒朋友「錫住佢」。對於男方劈腿，她卻處處維護。
忽：係咪有人追？感情方面有着落？
朱：唔係好覺囉！哎……感情方面呀？我都係專注於工作囉！
忽：近排係咪經常飛去外地？
朱：係咩？冇啲咁嘅事！（扮傻）如果係就係去日本多囉！因為我step father（後父）喺日本。
忽：台灣呢？
朱：台灣都會去，因為有啲朋友喺嗰邊。
忽：係咪男朋友呀？
朱：朋友囉！
忽：我哋影到你拍拖，仲好親密？
朱：係咩？（聲線拉高八度）喺邊度？吓！台灣機場？咁俾啲相嚟睇。（記者遞上照片）哈哈哈……好開心……多謝大家關心，但感情事我唔會講太多。
忽：識咗幾耐？
朱：我哋廿歲就識，佢係我大學同學，最近至撞番。
忽：怕唔怕分隔兩地，睇唔實男友？
朱：我哋大家都好信大家……
忽：我哋影到佢喺酒吧攬女喎！
朱：真係……我諗唔會囉，俾相嚟睇吓（扮鎮定），我係想睇吓個女仔係邊個……
忽：（記者遞上照片）咁你識唔識個女仔？
朱：嗯……因為我呢……其實……同一個伴侶一齊要百分百信任……（口窒窒）點講呢……我都喺外國讀書，我都明白，都有best friend……如果我叫佢哋哥哥，都會繑住佢哋。
忽：台灣男仔好鍾意「劈腿」喎？
朱：唔會……唔會，我其實好清楚佢行程……（包括佢約辣妹？）……

自揭公主病
忽：23日喺機場，你嬲爆爆喎，係咪同男友嗌交？知佢「劈腿」？
朱：唔係，係我任性啫！我脾氣唔係咁好，有時會有啲公主病，佢好遷就我o架！其實我（重覆了3次）……我個人係愈在乎愈怕失去……但對我嚟講，佢同佢屋企人真係上天給我最好嘅禮物，佢啲屋企人我都見過晒……
俾男人呃，朱慧敏已經唔係第一次，以為俾賤男梁榮忠傷過，她會學精，不過看她不停為闊少猛兜，睇嚟佢真係鱷魚頭老襯底！

千萬IT闊少
據知朱慧敏的新仔，乃土生土長的台灣人，姓張，年約32歲，與朱慧敏一起就讀美國西雅圖華盛頓大學，主修電腦，副修經濟。04年闊少大學畢業回台灣開IT公司，年薪估計5千萬台幣（約港幣1千2百萬），現住在大直區價值5千萬台幣（約港幣1,200萬）的大直花園二千呎單位，屬IT界才俊。

緋聞浪接浪
朱慧敏出道翌年，即與梁榮忠發生「車震事件」，一震成名。入行6年的她，天生一副好身材，緋聞不絕，桃花勁旺。

梁榮忠
05年，朱慧敏被周刊拍到與梁榮忠在柴灣僻靜處車震，震散梁榮忠與鍾麗淇8年情，朱慧敏更被冠以「車震女」稱號。事後，朱聲淚俱下表示唔知對方有女友，並遭無綫雪藏。

葉青霖
05年，朱慧敏被周刊指與葉青霖到湖南、武夷山及溫州拍攝旅遊特輯《江山如畫張家界》，冧掂對方收她為徒，又指兩人過從甚密。葉青霖曾接載朱到海港城停車場，在車廂密斟五分鐘後，便到Marco Polo酒店撐枱腳。

趙永洪
08年，因拍《畢打自己人》，朱慧敏與劇中人氣急升的趙泳洪撻着，被周刊拍到二人在聖誕節當日行傢俬店，戀情曝光。

溫州王姓富商
今年5月，朱慧敏被本刊拍到出入貝沙灣、手持AE黑卡掃貨，衣、食、住三級跳，原來她搭上溫州一名王姓富商，兩人在年多前因朱主持收費台財經節目《創富坊》而認識。

釣金龜食詐糊
選港姐不但可以入娛樂圈，更大有機會識富豪釣金龜，唔少港姐以為好易踏入豪門，不過，分分鐘埋門一腳撻Q食詐糊，人財兩失。

葉翠翠
G08年初，葉翠翠到廣州拍攝度假村廣告時，認識4億富商黃有龍，隨即在一個月連掃兩個三千萬的賽西湖單位。可惜同年10月，有傳媒拍到趙薇結束《畫皮》宣傳後，與黃有龍在餐廳用膳，走路時還挽着他的手。去年7月，趙薇與黃有龍在新加坡登記結婚，今年4月誕下女兒。但報道指，被撬的葉翠翠被追討巨額分手費，被迫出售賽西湖單位。

陸詩韻
07年，陸詩韻被傳媒拍到與曾入獄的38億富商曾文龍同遊日本，因周汶錡介入而分手。08年7月，陸詩韻被周刊踢爆搭上十億「油王」朱明，入住由男方每月支付十萬元的Apartment，後因陳法蓉的介入，陸打回原形搬回將軍澳居住。不過拍拖一年的陳法蓉打算與朱明結婚時，朱明卻被周刊踢爆係空心老倌，曾改名換姓，因金融風暴欠下六千萬高債。陳法蓉更被周刊指疑墮桃色陷阱。

李明慧
97年港姐亞軍李明慧，曾高調聲言與鄔友正閃電結婚，但臨門一腳撻Q，被同屆冠軍翁嘉穗截糊。當年「鄔公事件」不單令兩人姐妹關係決裂，更鬧得滿城風雨。一早有肥仔男友的翁嘉穗忽然與肥男友分手，98年7月，有傳翁嘉穗同鄔友正約會，而李明慧又傳出與鄔友正分手，婚事告吹。雖然李明慧哭訴感情受騙，但亦被發現收下120萬掟煲費。

機場啜爆
嘆完早餐，闊少送朱慧敏到出境閘口，兩人更禁不住當眾啜爆，啜足30秒才捨得鬆口。

05年，花弗的梁榮忠背住正印鍾麗淇與朱慧敏爆出車震事件後，即被封為世紀賤男，最後遭無綫放棄，現於電台開咪做節目！

身材惹火的朱慧敏，令不少男人垂涎，難怪闊少在眾目睽睽下都要又攬又啜。

6月10日︰溫馨嘆早餐
當日早上7時許，闊少到台北桃園機場送別朱慧敏。距離上機時間尚有1小時，兩人先來個溫馨早餐，只見朱慧敏不時含情脈脈望住闊少，對方亦甚受落。

啜完都唔夠，朱慧敏熱情主動熊抱闊少，兩人癡纏兩分鐘，才依依不捨揮手道別。

送完朱慧敏，闊少即揸住其價值120萬台幣（約30萬港幣）的凌志RX330房車離去。

一向肯搏肯露的朱慧敏經常飾演情婦、壞女人角色。去年在《竊聽風雲》中，一幕與李子雄在辦公室偷情戲份，令不少男fans熱血沸騰。

朱慧敏近日在無綫劇《蒲松齡》中終於有機會從良，飾演陳展鵬老婆，不過最後因得罪陳法拉變狐妖。

6月18日︰闊少酒吧攬辣妹
10時許，闊少搭的士到大直摩天輪的酒吧，其間記者見到他不停打電話，未幾，即見到一位年約廿多歲的妙齡少女衝前緊擁着他，差不多攬足分半鐘才分開。

之後兩人到了露天酒吧邊飲酒邊談心，更喁喁細語，逗留一小時後，闊少收到電話，即告別索女，搭的士返家。

6月20日︰晚飯見家長
下午4時，朱慧敏、闊少與闊少的父親從寓所大直花園出來，三人談笑甚歡，看來朱慧敏並非第一次見家長。

闊少與朱慧敏在老人家面前不避嫌拖手、攬腰，闊少更邊行邊將手指插進朱慧敏褲袋內。