【鄧倚淇上海直擊】Angelababy昨日現身上海擔任內衣騷嘉賓，感情得意的她對於再度傳出整容，終於女神都發火，Baby否認曾隆鼻、嘴唇抽脂、削面骨，更有意倣效范冰冰到醫院照X光驗樣，但她堅決以私隱為由拒絕驗胸！

Baby唔介意驗樣，但以私隱為由堅拒驗胸。

Baby率師妹Sarah抵上海半島酒店，擔任「Peach John搶灘上海」內衣騷嘉賓，吸引過百嘉賓到場，品牌老闆娘野口美佳專程赴上海主持儀式，其契女濱崎步、吉川日奈、道端Angelica送花籃祝賀，場面熱鬧！

Baby對於被傳整容，在上海出席活動時即激動反擊。

朋友摸過做證

現場焦點非Baby莫屬，自08年上位後的她屢傳是整容人工美女，對於近日再傳整容，她即時作出反擊澄清，她說：「呢啲新聞好無聊，佢哋應該積吓口德，一次又一次咁講！」向來友善的Baby禁不住怒火，愈講愈激動表示會到醫院驗明正身，她說：「我會搵間醫院照X光驗證，話我削面、嘴唇抽脂、隆鼻、削骨，講到我塊面都係假，成個假人咁，好想搵醫生驗證，公司已經安排緊年尾或明年初去驗。之前網上睇范冰冰驗證過，好想倣效佢做法。」

問到如此激動是否男友黃曉明介意，她說：「唔係，之前受嘅壓力好辛苦，我撐到依家，我啲朋友都知我冇整，佢哋都有摸過。」她指外界不斷翻炒她箍牙相來攻擊，她說：「嗰陣我箍緊牙，塊面又腫，影相角度又唔靚，點解佢哋唔用我再細個嘅相去比較呢？」Baby更自爆曾為此哭過，問到男友有否安慰她，她即時甜笑：「你哋唔好再講佢啦！不過都要多謝傳媒，話我整容即係讚我靚咗啦！（咁會唔會驗埋身材呀？）唔會，呢個係private（私隱）。」

周柏豪與Baby的合成照好搞笑。

拒評Debby妄攝

據知，今次品牌重金禮聘Baby做嘉賓，不過Baby講明不行內衣騷，問她是否為男友錫身，她說：「唔係，係因為嚟緊拍戲要keep住個形象，（揀內衣係咪重視男友口味？）唔會，我會忠於自己，自己比較鍾意可愛款式，（透視裝呢？）都冇人睇，我又驚走光。」對於o靚模Debby推出妄攝寫真捱轟，她說：「我喺日本冇聽過妄攝，我覺得每個人成功嘅手法唔同，可能佢付出承受壓力，所以我冇權利去評論好定唔好，不過我會叫師妹唔好咁做，等佢哋將來條路好行啲。」

此外，Baby與周柏豪又一齊在杭州出席活動，並大擺甫士合照，兩人還用iPhone程式炮製合成照。

品牌老闆娘野口美佳（右）親自招待Baby。

模特兒即場示範多款內衣。

Baby搵醫生驗證冇整容

o靚模始祖Angelababy最近再受整容傳言困擾，令她大動肝火，深受委屈落淚，她直言會找醫生驗證；雖然Baby為傳言嬲爆，但當提到男友黃曉明時，立即轉怒為笑。

人氣潮模Angelababy昨晚出席上海半島酒店舉行的《Peach John搶灘上海》內衣騷，出席嘉賓包括品牌老闆娘兼「濱崎步契媽」野口美佳、Baby師妹Sarah、徐淑敏和老公黃浩，而日本女星吉川日奈、日模道端Angelica和天后濱崎步，則送上花籃道賀。Baby身穿黑色連身裙亮相，與野口談笑風生，野口還大讚Baby靚女。在15分鐘的發問環節上，傳媒只集中向野口發問，令Baby變成「布景女」。

模特兒在台上行內衣騷，性感迷人。



Baby在老闆娘兼「濱崎步契媽」野口美佳（右）陪同下進場，席間聞黃曉明名字即甜笑。

放大圖片

默默承受壓力

Baby入行至今，屢受整容傳言困擾，近日又有報道指她整容，更用新舊照作對比，Baby聞言相當激氣，她受訪時按捺不住發火說：「無聊！佢哋要積口德啦！一次又一次咁講，又話我隆鼻、削腮骨、嘴唇抽脂，講到我成塊面都係假，成個假人咁，嗰時我箍牙面腫，影相角度又唔靚，佢哋又唔攞再細個啲相做比較。」

徐淑敏自爆戴水袋Bra

有「咪神」之稱的徐淑敏（Suki），產後身形愈來愈弗，昨日與老公黃浩到上海出席內衣品牌活動時，更以一身「Pink Lady Look」上陣，導彈上圍表露無遺！問Suki喜歡甚麼類型內衣？她說：「我鍾意鮮艷、Lace同絲質嘅內衣！」談到老公喜歡她穿甚麼款式？她說：「有次半夜上網，佢話我着得好睇，話我鍾意就得喇！我鍾意黑色同肉色Bra！」

擁有34C上圍的她自爆試過戴水袋Bra，但因效果太誇張即時拆袋，轉贈給家姐，又強調不會穿透視裝。她表示因老公與內衣品牌老闆娘稔熟，故送了五位數字內衣給她，連好友也受惠。談到囡囡的百日宴，Suki表示女兒當晚全程睡覺，應該不知道有人為她慶祝。此外，Baby的師妹Sarah亦有到場，對於Baby多次被指整容，Sarah坦言感到十分激氣，問有沒有摸過Baby臉蛋？她說：「雖然我冇摸過，不過我唔會相信呢啲報道！」

Sarah（左起）、徐淑敏和老公黃浩在上海出席內衣品牌活動。

Baby柏豪奪面雌雄

正在上海工作的Angelababy，與同屬模特兒出身、現為歌手的周柏豪頗為稔熟，他們一同在杭州出席活動，並大擺甫士影合照。兩人在等候工作期間，用iPhone的程式炮製合成照。相片中以柏豪的眼睛，配上Baby的「櫻桃嘟嘴」合成，效果出奇地可愛和惹笑，柏豪還留言笑稱「背景Key得很好」，又大讚Baby「多得了你可愛的嘴巴。」

此外，昨日傍晚時分，Baby在微博有感而發：「繁忙緊張生活中的一道清泉，就是和好朋友真誠對話。若要別人真誠對你，你就必須先拿出自己的心去真誠對人。如果人與人之間，少一份猜忌，少一份妒嫉，多一份信任，多一份度量，那世界會因此變得更美好。」