5/2喊得太遲

上週四深夜（二月二日），台日混血女星Makiyo與日本黑幫男友友寄隆輝，涉嫌當街毆打一名的士司機林余駿，導致對方腦出血、身體多處骨折，就連牙都打甩幾隻，一度要留醫深切治療部，好在林余駿福大命大，已轉到普通病房繼續接受治療。　身為傷人案幕後「打」手，Makiyo初時誣告司機胸襲，直至發現行兇過程被足本拍下，Makiyo才帶埋患有肺癌末期阿媽現身，向司機家屬哭喪認錯，可惜已經返唔到轉頭，Makiyo被加控重傷害罪，台灣地檢署亦正式落案起訴，要求友寄隆輝重刑6年，Makiyo則重刑4年，如果成功起訴，持日本護照嘅Makiyo，將不再獲發台灣工作簽證，並禁止入境，演藝事業即刻玩完！

 

天網恢恢
傷人案事隔兩日，只承認腳踢的士車門洩憤嘅Makiyo，與日籍友人友寄隆輝由律師陪同下召開記者會交代事件時，化濃妝著露肩貼身衫，指當晚因為冇扣安全帶問題，與的士司機林余駿發生口角，之後對方偷襲佢32E美胸，友寄隆輝才出手護花，更認為自己係「合法打人」，至於點解打完人唔報警？Makiyo推說當晚唔見咗手袋同電話，並非有意不顧而去。好在天網恢恢，路經事發現場另外兩名的士司機，將整過打人過程拍低晒，而附近店鋪亦主動向警方提供一段有聲有畫嘅閉路電視片段，清楚錄低一把同Makiyo一模一樣聲線嘅女子，不斷大叫「揍他」、「要不要打」，同時拍到Makiyo當晚一直孭住手袋，之後大步衝前疑似用腳猛踢受傷倒地司機。雖然Makiyo「行兇過程」部分畫面被另一輛停响路邊嘅的士阻擋，但就證明當晚尚有兩名女子同行，分別係Makiyo兩位好姊妹ㄚ子以及湘瑩，佢哋雖然冇參與打人，但就有份幫手截的士逃離現場。


九十度鞠躬認錯嘅友寄隆輝，有指佢係日本黑幫「關東連合」頭目之一，响日本有打人前科，台灣竹聯幫已表明，如果友寄隆輝唔認錯，佢班兄弟會「做嘢」。

回復事發記憶
涉案人士增加到四人，加上警方手上有多條有力影片，Makiyo大話穿煲，於是帶埋患癌阿媽去醫院，向傷者家屬認錯，雖然林余駿太太口說接受道歉，但堅持要為丈夫討回公道，指Makiyo：「睜眼說瞎話。」原來當晚Makiyo等人上車後不單冇扣安全帶，其間更要求司機開快車，見對方唔合作，於是連車費都唔肯俾，司機林余駿落車報警，點知俾友寄隆輝毒打，更集中火力攻擊頭部及上胸部分，導致頭、耳背、肺部以及左右肋骨骨折，腦部有瘀血，牙齒被打甩，林余駿更出現短暫失憶，好在仲記得遇襲經過，更斬釘截鐵指：「有女的踹（踢）我好幾腳。」根據受害人證供，Makiyo加控多一條重傷害罪，由原先3萬保釋金再加多5萬；至於現以10萬保釋候查嘅友寄隆輝，由原本重傷害罪，加多一條公然侮辱罪，因為閉路電視收錄到佢以日文粗口鬧受傷司機，兩人並同時被限制出境。

竹聯幫插手
至於同行友人ㄚ子以及湘瑩，警方消息指，ㄚ子盤問期間態度唔合作，包庇Makiyo冇打人，反而湘瑩改口指見到Makiyo有打人動作，最後兩人由「證人」變為「被告」，涉嫌俾假口供。而另一邊廂，被林余駿家屬拒絕接見嘅友寄隆輝，兩度公開鞠躬及跪地認錯，仲話會一力承擔所有責任，希望警方唔好加罪Makiyo，以及辱罵日本人。有消息指，友寄隆輝同日本黑幫有密切關係，在日經營夜店，與生父同樣係日本黑幫嘅Makiyo相識多年，案發當日兩個一齊返酒店過夜，關係非比尋常。由於友寄隆輝有黑勢力，有指林余駿家屬一度驚被「秋後算賬」而封嘴，後來台灣竹聯幫介入事件，有人撐腰先敢爆料。林余駿代表律師向傳媒表示，現階段會循法律途徑解決，台灣地檢署亦發出新聞稿，要求重判友寄隆輝及Makiyo入獄6年及4年，而打算一力承擔所有罪名嘅友寄隆輝，表示會對受害人作出合理賠償，就算將來要養林余駿一世都願意。唉！早知今日，又何必當初！


以為打人可以瞞天過海，點知連同黨ㄚ子、湘瑩都走唔甩，三姊妹一齊返警署落口供，之後向傳媒九十度鞠躬道歉，當中被警方指極不合作嘅ㄚ子（中），一直表現不耐煩，而湘瑩（左）則喊到眼都腫。


Makiyo有個同母異父家姐「胖姐」，兩個原本好好感情，但家姐因為睇唔過眼細妹誤交損友成日飲酒，姊妹最終鬧不和，近日Makiyo酒後闖禍，胖姐幫理不幫親：「如果世間有一種法律可以用鐵鏈拴住我妹不要出去喝酒，我一直很想這樣做，可惜我沒有權利這樣做。」 ####

 
見事態嚴重，Makiyo一身素顏街坊裝，帶埋阿媽向林余駿太太道歉，其實Ma媽3年前患上腸癌，最近有傳擴散到肺部，肺癌更加去到第四期，所以個個都鬧Makiyo不孝，點解要擺埋阿媽上枱搏同情。

 
4/2露肉講大話未知道行兇過程俾人錄低晒，Makiyo濃妝跌膊開記者會，指司機冇禮貌兼偷襲佢胸部，思路不知幾清晰，後來知道大話穿煲，就不斷話飲得太醉，唔記得當晚發生咩事。


事發後，有網友响社交網站開設多個反Makiyo專頁，加加埋埋有50幾萬人俾LIKE，睇怕就算傷人罪名不成立，Makiyo都好難响台灣娛樂圈立足。


10/2 知道獲重判，友寄隆輝以日本傳統的「土下座」跪式，表示自己已深切反省，仲話一人做事一人當，希望當局唔好起訴Makiyo。


林余駿病情已經穩定，林太每日留守醫院照顧，據代表律師表示，林余駿願意原諒Makiyo等人，但大前提要求四人勇於認錯，坦白講清楚當日事發經過。






根據酒店提供嘅片段，孭住手袋嘅Makiyo與友寄隆輝打完人之後，同ㄚ子、湘瑩四人行買消夜返酒店醫肚，有指最後得Makiyo留低陪友寄隆輝過夜，佢落口供時亦承認被男方追求中。






案發當日分別有兩部的士拍下友寄隆輝打人，再截另一架的士走人嘅片段，長達50秒嘅打人過程中，清楚睇到佢一共踢咗15腳，之後仲好有紳士風度扶一扶Makiyo上車，真係點睇都唔似飲大咗囉！


同大小S份屬好姊妹，但家陣冇人敢開聲撐半句，Makiyo話願意做更多公益活動回饋社會，唉！到時你留得低响台灣再講啦！



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄