對於復出傳聞，彭羚斬釘截鐵表示：「全部都係假，我只係幫Wyman！」素顏的她，更皮膚白滑保養得宜！

退出樂壇的彭羚，近日為好友Wyman的作品展擔任嘉賓重踏舞台，外間一度盛傳她復出，英皇甚至開出1,500萬天價做十場演唱會利誘出山，但通通被彭羚一口拒絕。重金亦無法打動林太開金口，除了因為林海峰唔批准，最主要原因係Cass想一心一意照顧兩個女。老公搵到，又肯將半億身家俾老婆揸手，富貴林太，根本唔憂唱。

重金請出山
以填詞人身份成功在紅館舉行一連六場作品展的黃偉文，邀請群星友好拱照舞台，但音樂會焦點，始終落在退出樂壇十三年的彭羚（Cass）身上，雖然只做頭尾兩場嘉賓，但她金口一開，便成功將音樂會推上高潮。近日盛傳彭羚將全面復出，英皇、東亞以及黃栢高，均以天價搶飲頭啖湯，當中英皇開出一千五百萬做十場演唱會的天文數字作利誘，可惜全部被拒諸門外。「過去十年不停有人游說Cass出山，除咗出碟、開演唱會，仲不斷有時裝、化妝品牌，想請佢出function，係咁意做一個鐘就有過百萬落袋，但Cass通通唔答應。後來大家知道Cass肯幫Wyman做騷，好多搞手就搏命搵佢開演唱會，英皇出到一百五十萬一場，個價高過晒徐小鳳、許冠傑復出，仲話一次過俾晒千五萬幫佢搞十場，但Cass完全唔心郁！」知情者說。

俾面派對
曾經攞過最受歡迎女歌星的彭羚，雖然退下火線多年，但賣相靚聲都保持水準，大有條件再戰樂壇，只是老公林海峰全面反對太太重操故業。「阿Jan唔想老婆再出嚟唱，佢思想比較大男人，怕Cass復出會影響屋企，既然自己又搵到錢，唔使老婆幫手，所以多多錢都無得傾！」Cass身邊人說。今次Wyman能夠攞晒彩，請到彭羚復出舞台，亦得林海峰肯俾面。「七年前，阿Y諗住開小型音樂會，打過俾Cass，當時佢一口拒絕，所以阿Y無諗過可以請得郁Cass，好彩呢幾年阿Y同阿Jan熟落咗，一早同阿Jan申請話要搵佢老婆幫手，講到尾，係阿Jan俾面阿Y，Cass先至有得做演唱會嘉賓。」

樓錢揸手
復出價吸引，但彭羚完全唔覺可惜，事關兩個女兒仍在求學階段，她寧願全心全意照顧家庭。「Cass好錫兩個女，大女林泳啱啱升上中學，本來讀開女拔，英文成績仲好好，偏偏中文閱讀理解追唔上，兩公婆商量過，唔想個女讀得咁辛苦，舊年就幫佢轉咗去漢基國際學校；細女林清就喺女拔讀小學，功課都好多，雖然Cass都有興趣再唱歌，但佢最聽老公話，阿Jan唔贊成，佢都覺得睇住兩個女重要過賺錢。」彭羚身邊好友說。上週五（二月十日），細女林清就讀的女拔舉行運動會，前一晚才做完Wyman音樂會嘉賓的彭羚，晨早便陪住囡囡參加運動會，直至下午四時，母女才一齊離開釜山道運動場。對於復出一事，她親口大力澄清：「全部都係假，我唔會復出，只係幫Wyman做嘉賓。」之後向記者道別，由司機送返南山別墅寓所。唔俾老婆復出，林海峰做DJ拍戲拍廣告做配音開棟篤笑，賺錢能力相當驚人，早年投到以Cass為名的CA車牌送給老婆外，買樓亦一定加埋老婆名，即使近年未有再置業，但有指林海峰一直與彭羚有聯名戶口，將全副身家交給老婆管理，手握財權，彭羚根本唔志在復出。

開騷袋半億
過去10年，林海峰除了在電台開咪，更一共舉行了5次個人棟篤笑，次次都大收旺場，每次開騷，他更會親自設計紀念品，賣得又賺得多，進賬經常多過演出酬勞。唔計電台開咪，林海峰十年已經袋過半億，收入驚人。

全職主婦
43歲的彭羚，有「商台家嫂」之稱，九○年出道，被封為實力派歌手。九三年，彭羚簽約百代唱片，翌年推出專輯《未完的小說》，憑《讓我跟你走》一炮而紅。九五年是彭羚事業高峰期，先後推出《如夢初醒》及《窗外》兩張專輯，銷量報捷，歌曲《小玩意》讓她橫掃年尾各大頒獎禮大獎，包括「叱咤女歌手金獎」、「勁歌總選最受歡迎女歌手」，與Sammi、葉蒨文等叮噹馬頭，並在紅館舉行首次個人演唱會；九八年與林海峰拉埋天窗，翌年誕下大女林泳。當時Cass仍活躍樂壇，並首度以性感造型拍攝纖體廣告，直到○四年誕下細女林清，自此絕迹演藝界做全職家庭主婦。 ####

 
上週五，細女林清學校舉行運動會，彭羚陪住愛女參加田徑賽跑，素顏的她，細心幫女兒換運動衫，還緊張地行嚟行去。

 




友善回應記者後，彭羚急急離開，保持一貫低調作風。


無唱歌十幾年，彭羚仍能保住靚聲和歌藝，除了個人作品《小玩意》，與容祖兒合唱《心淡》，一樣技驚四座！


Wyman的首場作品展在上週四舉行，完騷後一班歌手在後台開香檳，但Cass唱完已經走人。


林海峰答應Wyman，俾老婆做嘉賓上台唱《小玩意》，阿Jan帶埋十三歲大女林泳撐場。


○六年，蔡一智結婚，Cass陪住老公出席婚宴。


林海峰親自駕車接Cass及女兒返家，二人向記者揮手，動作一致。


本週一，林海峰出席活動，坦言如果老婆台上唱《小玩意》，他在家中便會唱《垃圾》，個女就唱《你沒有好結果》，否定老婆復出之說。


上週四，彭羚演出完馬上換衫，匆匆離開紅館。


退出後，彭羚專心相夫教女，一家大小起居飲食，亦由她負責。






當年Cass獲欽點演出鄧麗君舞台劇。


事業高峰期，彭羚與Sammi曾鬥得難解難分。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄