黃婉曼兩個月前以萬八蚊租住嘉亨灣市值 560萬的六百呎單位，佢話：「都係為咗返公司快啲啫。」
自爆分手
上週三（ 9日） now 101開台，重點節目《撳錢》由黃婉曼孭飛。節目出街三日已經有回響。既上 C1娛樂版又成為網上討論區熱話。人紅身份自然唔同，未上位前，黃婉曼曾表示會同拍拖兩年的無綫外勤攝影師曾志釗結婚，不過多咗機會搵真銀之後，黃婉曼已不時改變口風，一時話婚期押後，至上月尾更向本刊自爆同男友分手，但之後又玩失憶話情人節會同男友煮飯仔，分手成謎。
但據知情者透露：「佢半年前已經同阿釗分咗手喇！話工作時間就唔到喎！其實佢兩個嘅收入愈嚟愈有距離，分手都預咗啦！」
「我哋分開咗」
週日（ 13日）黃婉曼做完《撳錢》節目，即刻截的士直駛位於西灣河的豪宅嘉亨灣第二座。據知黃婉曼半年前以萬 8蚊租住，升呢住港島豪宅，與以往跟前男友曾志釗拍拖蝸居葵涌唐樓，明顯好大分別。影到返新竇，黃婉曼表示：「我租咗兩個月左右啦，嗰度 6百呎，因為近公司（柴灣）。（係咪嫌前男友窮飛佢呀？）哎吔，你哋唔好咁講啦，我哋係分開咗，家仲係好朋友，但絕對唔係因為佢窮所以分手，你哋唔好咁寫佢啦！（家有冇男友？）唔知算唔算有，好難答你！」咁即係蜜運緊啦！唔怪得喺公開活動，記者問佢情人節點過時，黃婉曼甜絲絲：「可能收工之後買餸煮飯，煎心形蛋畀佢（男友）食。」同新男友嘅首個情人節，點都要 sweet啲嘅。
怒插 2個答案
《撳錢》係 now101皇牌節目，播映前秘密綵排半年，更搵嚟無綫、亞視前監製吳繼業（《最緊要正字》）和鄭寶榮（《百萬富翁》）過檔監製，再加上億元即時收集數據系統 Ipman講到幾勁，點知唔夠一星期已經被網友插爆製作草率。事緣週日（ 13日）第 2條問題中，玩完之後被網友發現同時有兩個正確答案，搞到一眾網友喺《撳錢》 101專頁勁插，仲話罷睇 now喎！唔使咁認真呀？
喺上週六（ 12日）第 2條答案亦有出錯，網民質疑有矽膠避孕套存在，不過對於網友疑惑， now暫時未有回覆。
智囊團唔係大學生
《撳錢》製作單位，強調每條題目都經過大學生核實，仲搵埋編審譚小龍出鏡解畫，但未夠一個星期已出錯。 now公關表示：「我哋每條題目都係由 creative team諗出嚟，個 team有成幾十至一百人。（係咩人嚟 o架？全部大學生？）唔係，係我哋工作人員，學歷就唔肯定係咪全部大學喇！」邊個話大學生實啱晒 o架！
農夫教路「第 7條先至係地獄」
計埋週日（ 13日），《撳錢》播咗 5集，雖然有錯漏，不過亦掀起熱潮，由首晚萬幾人跳升到 4萬多人玩遊戲，而 8條題目中以第 2條令一眾觀眾最頭痛，每晚都幾乎死一半人，更有網民喺 facebook開設《撳錢》「第 2條地獄專頁」，不過農夫陸永就話：「我哋最初 set問題，係諗過第 7題先至係最難，係真正嘅地獄，你過到第 7題，第 8題基本上送俾你，同埋去到第 5、 6題，如果你心目中有兩個答案，咁你就唔好揀呢兩個，揀另外兩個冷門就啱喇！」
升呢黃婉曼亦教路：「最好係 4個人玩，一個負責撳掣，另外三個人，分別開電腦上定 Google、 Yahoo同百度三個網站，鬥快 search答案。」
左起
Hidy：最好好似《百萬富翁》咁有啲 50/50，或者可以有兩次機會就最好。
Rika：幾好玩！不過我唔係好識中文，如果有埋英文字幕好啲！
Hazel：用 iPhone搵答案應該未夠快，一定要有部電腦喺隔籬。
Wilson（錢國偉）話：「每日派 10萬，真係小小超先做到，無綫好難做，除咗派錢外，佢個 system好勁，做到即時接收咁多戶 data，呢個系統真係好貴。我估無綫唔會搞一個類似嘅節目，因為真係燒銀紙，不過銀彈攻勢係最勁！」
即場試玩 新 8模答啱 5題
為咗測試《撳錢》難度，本刊喺上週六（ 12日）搵嚟周秀娜師妹新 8模嘅 Octobezz試玩。不過三位去到第 2條問題，已經被 K.O，但之後都憑亂撞或者斷估而揀啱答案，答啱咗 5題算有交代啦！
地獄題有例外
陸永話第 7條先係地獄，不過本刊發現第 7題唔係全部都難，好似週日（ 13日）的問題，只要喺 google打復婚收費，就會出現答案，前後唔使 10秒。而 C君亦提醒大家，佢話：「玩《撳錢》嘅朋友，見到好似聲畫不夾，可能係你 BT緊或者下載好大檔案嘅嘢，影響接收訊號。」
無綫： now唔係競爭對手
now《撳錢》來勢洶洶，有傳無綫急忙變招還擊，不過外事部副總監曾醒明就話：「我哋唔係變招，報道話草蜢主持嘅《華麗明星團》同埋《魔術擂台》（暫名）其實喺上年年底已經構思，同埋佢哋播映時間定咗係星期日，一星期播一集，唔會係一至五 10:35pm播，加上無綫唔想以派錢作招徠， now亦唔係競爭對手。一個免費，一個收費，兩個市場獨立。」雖然話唔係對手啫，不過有咁多新節目喺差唔多時段，無綫唔驚就假。
留言列表
{{ article.title }}
