半山競步一向求瘦嘅 Sammi，喺寶雲道公園搏晒命競步，基本上無停低休息過，安仔就跑吓停吓，主要係陪女友囉！
媽咪姐
同居試婚 3個月 發福 Sammi夾實安仔陪跑
不過，講真吖，依家啲節目同劇集千篇一律，我哋一班 C9仔早就少睇。咁唔睇電視嗰陣，做乜好呢？媽咪姐咪上咗半山跑步，減吓肥之餘，順便抒發吓悶氣，仲俾我撞到「同居蜜友」鄭秀文（ Sammi）同許志安㖭！呢日見成個人圓咗嘅 Sammi，笠咗頂大太陽帽喺度競步，仲邊行邊 fing手，睇嚟係想 fing走啲 bye bye肉。而安仔呢，全程墮後，得閒先拉下筋，主力係睇住喺前面搏命喪走嘅女友！見佢哋兩個真係好有默契㗎，一個帶前，一個跟實，唔使回頭搵，亦唔會走失噃。睇嚟近呢 3個月嘅同居試婚生活係非常之咁順利！加上， Sammi喺《最佳女主角》訪問入面話以前無諗結婚，但依家就隨時嫁得：「無一個時間嘅約束，但我覺得絕對有呢個可行性。不過，結婚唔會通知，結婚之後再公開啦！」 Woo，仲唔係露晒口風等嫁？
查實喺朋友圈亦一早傳出佢哋會喺明年初秘密註冊，難怪 41歲嘅 Sammi猛話要快啲趕起新碟，原來有人生大事要排隊完成！
幸福圓 Sammi 
今年 Sammi租住多年嘅渣甸山大寶閣要重建，安仔首次叫女友搬去同自己住。兩人自 8月起同居於干德道殷豪閣，甜蜜關係又升級！ 
熱愛運動嘅 Sammi，除咗競步，仲有日跑 8公里嘅習慣。成日 post跑完步嘅滴汗相上微博，有安仔滋潤，素顏都紅粉緋緋啦！
拎住樽水嘅 Sammi，步姿非常正宗，邊急步行邊 fing手，但身形明顯比今年 6月宣傳《盲探》時圓潤，幸福嘛。
安仔騷肌
46歲嘅安仔平時其實鍾意相約梁漢文踢波多啲，但 Sammi叫到，點都跑吓，仲認真拉筋騷肌㖭！ 
Sammi跑跑吓，忽然舉起手，聞一聞胳肋底，大概驚有異味。臭親未來老公安仔就唔好啦。
復合兩年入直路
安仔同 Sammi自 11年 3月喺佐敦太平館嘆豬髀復合斷正後，唔再玩地下情，終於愛得坦蕩蕩，除咗唔介意鬧市拖手拍拖，仲多次一齊外遊。結婚？快啦。
「蜜月」停不了
復合短短兩年， Sammi同安仔先後去過東京、峇里同沖繩預支「蜜月」，單係東京都去咗幾次， sweet到爆炸！
冧爆家長
今年 3月， Sammi安仔去大坑嘆日本菜，現場仲有女方父母同胞弟，安仔以準女婿身份細心扶住行動不便嘅鄭爸爸，好明顯睇到佢哋已經係一家親！
時時煮飯仔
以前掛住做嘢嘅 Sammi，近年精研廚藝，呢一年仲密密同安仔拍拖去買餸，返屋企煮飯仔，學定做家庭主婦！
留言列表
{{ article.title }}
