大錢題

三代股民數思捷

2012年11月01日 ~~ 第1182期香港《壹周刊》

由紅底股變成爛股的思捷（ 330），上週一宣布上市以來首次供股，供股價八元，較當日收市價折讓達三成六，比例為二供一，抽水超過五十億元。消息一出，投資者即「掟貨」離場，拖累股價三日內急跌一成六。
九三年上市的思捷，曾是基金及散戶愛股，股價大上大落，堪稱股壇最刺激的「過山車」，成為近年最受爭議的股票之一。去年，集團推出一百八十億元變身大計，之後主席、 CEO相繼換馬。如今，生意未見轉機，股價卻愈跌愈有，散戶「一殼眼淚」。本刊找來股評人陸叔（陳永陸），點評三個不同時期買入思捷的新舊股民，他們的經歷代表了金魚缸內的眾生相。

上圖左起
爛蓆王
持有約 20,000股思捷
98年 4月買入
平均入貨價約$5
性格：被動、欠計劃

煉「金」者
持有 50,000股思捷
11年 10月買入
平均入貨價約$11
性格：理性、唔熟唔食

好「息」賭徒
持有 20,494股思捷
09年 11月買入
平均入貨價約$45
性格：固執、不服輸

煉「金」者

散戶：周先生
年齡：六十多歲
職業：退休
持股年期： 1年
累收股息：$20,500
賬面蝕：$77,000
會否供股：供

散戶周先生憧憬思捷在新 CEO帶領下會有一番作為，並說：「佢喺 ZARA做過，對市場反應好快。」

有十幾年買股經驗的周先生，七、八十年代時經營布料買賣生意，曾賣布料予當時的思捷亞洲。九八年，他看好邢李 會搞好思捷，便在兩元三毫價位入市，再於七元時沽出，勁賺二十萬。之後，思捷股價升至過百元，他怕摸頂，一直忍手。「股價不斷破頂，怎知幾時真係到頂？邊度敢買？啲錢唔係我賺就唔諗喇。」他毫不惋惜道。去年十月，思捷發盈警，股價跌穿十一元，他決定搏一搏，大手買入五萬股。「思捷係藍籌股，市值由千幾億跌到得百幾億，再跌嘅風險好低，如果公司成功轉型，一定有機會升番啲。」
他決定斥十六萬元參與今次思捷供股，將每股成本拉低至十元二毫，搏思捷浴火重生，「周顯（專欄作家）五十蚊時叫人沽，話會跌到五蚊，依家佢都叫人買，話會升到上廿蚊。」但就不會額外買供股權，周先生解釋：「睇吓下年業績表現，如果盈利繼續沉落去，盤生意一定有問題，到時會考慮斬纜﹗」

陸叔點評：理性得財者

經常接觸散戶的陸叔認為，散戶贏錢時要懂得止賺，輸錢時最忌有報復心態、「唔服輸」。

「周先生 EQ一流，夠冷靜理性，七蚊賣出後，見到思捷升到過百蚊都唔買，真係忍得。加上佢熟悉行業運作，所以跌到咁低都敢入貨，而家已立於不敗之地。待市況好轉，股價升超過十一蚊時，可將供股部分賣咗先，餘下股份就等下年公布業績後再作打算。」

好「息」賭徒

散戶：黃伯
年齡：八十二歲
職業：退休
持股年期： 3年
累收股息：$116,200
賬面蝕：$720,000
會否供股：供

今年九月，思捷新 CEO馬浩思（左二）出席公司業績會，以「對公司認識尚淺」迴避所有問題，外界對其能力仍抱有問號。右一及右二分別為副主席鄭明訓及主席柯清輝，左一為執董兼財務總監鄧永鏞。（林志謙攝）

「積穀防飢，養兒防老，得第一句啱，仔女都要照顧自己家庭。買股可以升值，又有息收。」黃伯笑說。九○年退休前，他用二十多萬元在中環買下一間唐樓，其餘閒錢就用來買股。○八年，思捷股價插水至三十多元後再反彈至五十多元，黃伯見思捷派高息，便沽出部分滙豐（ 5）及新世界（ 17）股票，買入一萬多股思捷，○九年全年派息$2.85，「那年我收咗三萬幾蚊息㗎，之後上過六十蚊，但貪佢高息無放到，之後跌到倒水咁，走唔切，於是喺四十蚊我溝咗一次，三十蚊我又溝多次。原先諗住收息食飯，點知佢咁衰，由益我變咗害我﹗」黃伯呻道。
上週六，他向女兒借了八萬元，參與思捷供股，「焗搏㗎啦，賣咗啲供股權有咩用啫？得嗰幾毫、一蚊，供咗仲有得搏喎！」黃伯手上仍持有滙豐、新世界等藍籌股，兩間公司近年都供股，黃伯亦本住「無蝕底」精神照供如儀。如今，思捷股份賬面勁蝕七十二萬，黃伯仍十分淡定：「人家話買股票同賭錢無分別，我唔係咁計，賭錢輸咗渣都無，股票唔輸得晒！我又未賣，賣就話蝕啫，未賣仲有希望，等佢返家鄉！」

陸叔點評︰死纏爛打愈輸愈多

「黃伯係『雙高』，即高齡兼高位入貨。我唔贊成佢借錢供股，除非有好多現金，唔係又何必同屋企人借呢？我建議佢沽走部分思捷股票，套現去供股，風險細啲。退休後買股收息係啱，但小心跌入股息陷阱。周期性股票好受經濟周期影響，唔係長期都派到高息，特別息更加無保證。公用股就唔同，經濟差都要用水、用電，房地產信託派息都穩定。」

爛蓆王

散戶：黃先生
年齡：四十多歲
職業：任職銀行信貸部
持股年期： 13年
累收股息：$390,000
賬面賺：$94,000
會否供股：不供

最「長情」，非黃先生莫屬。他於九八年起用十萬元買入思捷，「貪零售股業務較易睇，我都炒過佐丹奴（ 709）。」其後思捷股價拾級而上，以○七年歷史高位計算，他手上的思捷股票市值高達二百六十萬元，黃先生卻一直「攬住唔放」。「對我嚟講，思捷升到二十蚊已經係神話！但升到二十蚊唔放，八十蚊又點會放呢？破一百幾蚊時，我都覺得升到傻咗，朋友問點解仲唔賣，但我唔知套現後有咩用。（唔換馬？）當時我無乜留意股票，無心水股，索性擺喺度收息。」黃先生一副「唔在乎」的模樣，但提到九八年買入自住的藍田匯景花園單位仍未供完時，他不禁嘆氣道：「早知一百蚊賣咗思捷，供完層樓有凸，錯失咗機會！只怪當時思捷派息勁，供樓利息又唔係特別高！」
錯失發達機會，幸好賬面仍有賺，但黃先生卻拒絕再拿八萬元供股。「一定唔供﹗供股價八蚊較我平均成本價仲要高，無謂再掟錢落去！攤薄係賬面嘅問題，係數字遊戲，股價升得番就無問題。」口硬皆因手上的股票已「回晒本」，「○五、○六年開始派高息，收一、兩年股息，我已經回咗本，可以話無本生利！」黃先生使出「磨爛蓆」本色，繼續期盼：「我會等下一個高峰期先放，有可能升番上去四十蚊！或者擺喺度，等到退休先。」

錯失高位沽貨良機的黃先生稱會繼續揸思捷，等其踏上另一「高峰」便沽貨，目標價為四十元。

思捷以月租二百五十萬元，在旺角朗豪坊對面設立亞洲首家概念店，走年輕路線，今年八月正式開幕，但即使週末假期，店內仍人流稀疏。

陸叔點評︰成也 EQ敗也 EQ

「黃先生竟然無咬牙切齒？由五蚊升到一百蚊都無動於衷，佢唔單只 EQ高，係 EQ過高！係人都想賺多啲，但問題係佢唔識止賺，升市要止賺，跌市更加要止賺！一百蚊時唔賺，跌到五十蚊就一定要賣，賺少咗係肉赤，但都係賺呀！呢個係好多股民嘅心魔。其實○九年後都無咩息派，大把機會逃生，就算無心水股，都可以套現先，再慢慢搵。佢唔供股都啱，隻股票冇幫佢賺過大錢，無謂再掟錢落去。」

供股坐三年

股價過山車
*首次入市價，二人其後都有再溝貨。

思捷大折讓供股，有外資分析員直言，集團的變身大計就算成功，亦要至少三年後才有成果，散戶要有心理準備當長線投資，才值得供股。「思捷最大問題係銷售問題，公司高達五成業務來自批發，令改革鞭長莫及。」該分析員指，思捷的特許經營店數目遠多過自營店，「以往好多大牌子如 Prada、 Burberry都用 franchise模式，但因為轉款速度太慢，慢慢轉以自營店為主，思捷都必須走同一條路。但佢集團太大，短期內 earnings唔會點升，就算股民對佢有信心，都要將股票放入枕頭底唔理佢三年，先會見到改革成果。」他透露，思捷短期內因消息出現波動，成為不少基金的「短炒樂園」，最壞情況可能低見$8.75。