娛樂八掛大放送★

樂壇火種 辣出癮 甄妮 論盡 無禮歌手

時下乜都要真嘢，要真功夫，唔要造假，好似樂壇大姐大甄妮咁就夠晒實力，所以明年2月18日和19日移師紅館舉行《甄妮愛Show世界巡迴演唱會》叫好叫座，記者會上更即公佈加開20日一場、共演3場。今次回歸樂壇，阿姐唔只開金口大唱經典金曲咁簡單，仲做埋樂壇判官，論盡當今歌手的歌藝及品格，提點後輩不要忘本，要有規有矩。她說：「我知道自己今時今日嘅地位，我講嘅嘢就好似係聖旨咁！其實都覺得自己咁講幾乞人憎，令人討厭，但人地問，我照講出嚟啫，所以我咪唔玩（樂壇）囉。」甄妮為宣傳個唱唔怕做樂壇火種四圍辣火頭，因為她再三強調，全部實話實說。採訪：巫明

甄妮姐姐大鬧鄧紫棋（G.E.M.）無禮貌掀起風波，Jenny重提G.E.M.時仍然有話要說：「其實我唔識佢哋，喺佢初出道時，佢經理人邀請我同呢位小巨肺合唱，被我婉拒而種落禍根，G.E.M.冇大冇細！」她又自嘲說：「可能我太老，佢唔識我啩，其實我都恨做後輩。我想講，做藝人基本條件係要有禮儀，連修養都冇，叻極有限，一個人嘅靈氣係冇得教嘅，所謂相由心生。以前五步之內只要見到尤雅，我經已叫定佢尤姐。」其實無規無矩嘅藝人點只阿G.E.M.一個，大姐大愈講愈勞氣，對圈中一眾天王天后的品格插到體無完膚。

抽水Chok王

「好似嗰個又演又唱嘅當紅小生，佢喺公開場合（去年7月7日的《翡翠歌星紅白鬥》）見到我都係眼望望，唔睬人，但最奇怪係佢接受電視台訪問時，就好興奮咁同主播講，話見到甄妮姐姐好開心囉，吓？佢明明連招呼都冇同我打喎，有幾開心呢，似係抽水行為多啲。」

碌葛媽媽

「佢（兩子天后）都係冇乜禮貌，有次我喺後台同郭富城傾偈，佢望住我，既冇打招呼，亦都冇插嘴，直至等我同Aaron講完，佢先至同Aaron續談，你明唔明我當時幾咁尷尬呀？所以嬲嬲哋都返轉頭同佢講：『我唔識你，所以唔知同你講乜好！』講完就轉身走，當時佢好愕然，亦都可能係講出佢個心聲，我都知自己咁講好無聊，忍屎忍尿，自己真係忍唔住，但講完真係舒服咗。」

爆肺人妻

「好彩我唔學似徐小鳳咁，會主動同後輩影合照，聽聞有次小鳳姐就觸礁，佢喺後台拍門邀請後輩影合照，個個都好Nice，惟獨想跟佢（爆肺人妻）影相留念，佢助手竟冷淡轉述：『佢唔舒服，面口唔好睇，唔影嘞！』」

「入廟拜神」是必須的，所以各樂壇後輩以後見到甄妮姐知點做啦？

因為五個月前無主動打招呼，所以甄妮姐姐覺得G.E.M.目中無人，其實記性好也不是好事。

林峯要Chok又要型，一心難三用啊。

因為忙湊仔，Kelly無精神唔記得打招呼都難怪嘅。

謝安琪近排經常病，可能唔想散播病菌所以自我隔離啫。

塞錢入你袋

有彈就有讚，甄妮姐姐亦開名讚賞會向她「請安」的一眾乖歌手。

「李玟每次見都我都好熱情，話我係佢偶象；關心妍會上前自我介紹，仲話見到我好有壓力；梁詠琪好合作，個人好OK；楊千嬅都好客氣，有次仲喺電視城問我借化妝間VIP房用，我唔理佢個樣有幾變，但個心始終唔變。」Jenny強調，唔係教仔，教仔係返屋企畀阿媽教，提點你，我只係送禮物畀你。

問到當今樂壇邊個歌手最出色時？甄妮自信道：「So Far冇一個人可以同我比較，我冇接班人！問題要睇埋唱功、有冇與時並進，好似麥當娜咁，60歲有60歲嘅樣，唔一定好似老人家咁。至於最Hit嘅陳奕迅唱得係好OK，但唱Live好似聽CD咁囉，好似柯打一碟咕嚕肉，舖頭同大排檔分別就係有裝飾，要色、香、味俱全，收人100萬，係咪要畀番同等優質嘅食物呀？好似以前阿倫咁都係要執到正㗎啦，依家邊有呢啲歌仔唱呀？」

最後甄妮姐姐袋錢落後輩袋：「做藝人基本條件唔好忘本，少年輕狂，突然變暴發戶唔係好事，咁樣好快會玩完，謙虛係一種美德，做返自己先至會快樂，上台係藝人；落台做番平凡人咁先係成功藝人，要日日擺甫士唔攰嘅咩？以前我連掃地、抹抬機會都冇，家陣變成樂趣，畀人搶走掃把會反面。」

甄妮讚Eason唱得好，但唱Live無驚喜，好似聽CD咁。