漫遊毒物

奇幻生活 Fantasy Life

2013年01月09日 ~~ 第294期 Face

仲記得讀書時日日打超任，迷醉於《 Final Fantasy》拍得住《哈比人》的幻想氣息，四圍都係古堡、大草原、魔法、巨龍。可惜𠵱家《 FF》得番個華麗皮囊，單線劇情喪悶，好在《 FF》兩大元祖功勳：插畫大師天野喜孝、音樂家植松伸夫出山，重新打造「比 FF更 FF」嘅幻想世界《 Fantasy Life》。遊戲入面冇人迫你炒股炒樓，唔使做勇者打狼心狗肺大波士，你只需做番個開心小市民，從事多達 20種職業，自由享受生活！
市民遊行的最終訴求，原來打機先有。

《 Fantasy Life》

機種： Nintendp 3DS
廠商： Level5
類型： RPG
人數： 1人
售價：約$450

一路好生活

曾製作《雷頓教授》、《紙箱戰機》等風格逈異作嘅 Level 5，今次又串連任天堂老餅 RPG《 Mother 3》監製 Brownie Brown、天野喜孝、植松伸夫等 3位舊世代名人，打造富有 90年代初氣息新作。家陣機迷人口日漸老化，更令呢款遊戲被受關注。香港遊戲店返頭批貨都唔夠賣，要上$400尾先有交易。
遊戲玩法似 MMORPG，製作好虛擬分身、定好職業後，就可以進入幻想世界「范特西努」，本來主角係一介平民，日日掘吓田、釣吓魚，轉捩點係某日驚見大隕石落下，翌日有隻奇怪蝴蝶仔搵你幫手，你可以選擇出發冒險，一路活用不同職業技能解謎，找出隕石下落。亦可無視佢如常生活、做吓小任務過日子，自由萬歲！

遊戲好玩處係唔只打怪物，仲可以採礦、伐木、捉魚。呢幾部分時常用到 touch screen，做廚師就好似玩緊《 Cooking Mama》，幾有手機 game中毒 feel。

整容唔一定要韓國

開 game要揀性別、樣貌、體型。初期職業達 12款，左頁圖片只係一個例子，做廚師都唔一定係肥佬。做任務可以學技能、儲 level。能隨時轉職，故事內容會因應職業變化，仲要求你用「擦身而過」、連線通信，搵唔同職業玩家協力解決問題。

必要時戰鬥

咁打機又並非真係想 365日天天 hea，遊戲內亦有戰鬥可打。有時會好似《芒亨》咁打獵執道具，後期你就可以升為唔同嘅戰鬥職業，對付一種跟隕石有關嘅黑色怪物。
講到呢度忽然想起，又話有《 FF》設定家同音樂家坐鎮？平時喺村落、啲音樂都唔係咁覺，一去到戰鬥，即時聽出啲 melody似曾相識，絕對係植松伸夫手筆。但講真，玩咗 1日都完全唔覺有說好的天野喜孝設定，似係掛個名畫張插畫就算。好在啲怪物設計都幾可愛，當年玩《 FF》，啲 Q版公仔都係咁上下樣，所以都幾有懷舊 feel，收貨！

團隊有 3個人，配合唔同職業組隊，各施所長，不過係用回合制，唔係《芒亨》類 action game。

初期戰鬥最好用係呢種狩人，射弓箭可以令 1隻敵人暈倒，專心打另 1隻。