李文浚 25歲
公開大學
創意寫作與電影藝術系
「要青少年聽你講嘢，最緊要互相尊重。」李文浚就是抱着這點，與學生建立起亦師亦友的關係。

U撈

大學生教邊青拍短片　回歸正途

2013年01月09日 ~~ 第1094期交易通．搵車快線

大專生找兼職除了賺取零用外，還可以幫助別人，就讀公開大學創意寫作與電影藝術的李文浚，中學時曾是邊青，但已改過努力讀書，他現在香港青年協會擔任兼職拍攝導師，教導一班邊緣青年製作短片，希望用自己的經歷幫助一群有需要的年輕人，這份兼職十分有意義。

「上次叫大家返去諗嘅 1分鐘禁毒短片諗好未，未諗好嘅，𠵱家我畀多 15分鐘大家，一陣出嚟分享，今星期開始拍埋佢，幫幫手，我知大家都想做好佢。」採訪當日，李文浚正在上堂為學生講解短片拍攝技巧，除了教授知識外，還需要與學生有良好溝通。
「開興趣班除咗教青少年拍片嘅基本技巧，好似點操作部攝錄機、揀拍攝角度、剪接外，主要係令佢哋有細藝，唔好游手好閒，當中仲要同佢哋建立溝通互信嘅關係，之後先可以幫到佢哋。」
身為香港青年協會荃灣及葵涌外展工展社會工作隊拍攝導師的李文浚，學生全是邊緣青年，相處有不少地方要注意，「教佢哋唔可以擺長輩款，我要佢哋叫我哥哥，唔好叫阿 sir。喺講解時唔好係咁拋啲專業名詞、英文出嚟，會令佢哋覺得好枯燥。畀佢哋多啲實習，落手落腳去做，易上手之餘仲會容易引起興趣。」
李認為邊青並不是甚麼窮兇極惡之徒，是可教之材，「喺度教咗約 2年，覺得喺人哋眼中冇得救、成日撩是鬥非嘅青少年，其實冇想像中咁衰，好似我開班嘅學生好少走堂，差唔多個個都係 100%出席率，我諗好多平時話乖嘅學生都做唔到，其實畀佢哋覺得你尊重佢，佢都會尊重番你，佢哋唔係壞人，只係需要一啲方法去教好佢哋。」

李文浚與同學一齊參加了 12年的鮮浪潮短片比賽，藉此吸收實戰經驗。因短片以追尋夢想為題材，他以小學生做主角。

落堂或小休時，李會與學生作交流，分享自己的經歷和了解學生的需要。

曾是邊青感同身受

李文浚為青協拍攝宣傳短片，宣揚一些正面信息，如禁毒、防止高買等。

李文浚原本也是邊緣青年，所以感同身受，「讀中二開始埋堆，一班人唔讀書，一放學就周街游蕩，成日喺街用粗口撩人，圍住人嚟笑，青協同學校嘅社工開始接觸我，拉我去足球隊踢波，令我接觸多咗其他人，中四時慢慢覺得之前放棄自己好唔啱，於是重讀中四，考番好個成績繼續升學。我自己鍾意拍片，所以讀大專都呢一科。」
李對這工作充滿熱情，「 10年社工問我有冇興趣喺中心幫手教拍片，當我知道對像係邊青時，就一口答應，一星期教兩堂，每堂個半鐘，同返學時間冇抵觸，時間上好易就到，有時會幫手出外景拍中心嘅宣傳短片，𠵱家有機會幫人，所以我好用心去做，唔想佢哋浪費時間，之後要追番唔係咁易。」每堂有$600的導師費，李每月 8堂約可賺取$4,800的零用。

代入角色容易溝通

李文浚說要瞭解青少年最重要是代入他們的位置去想，「明白佢哋想要乜就好易教，好似有次我哋出去拍一段中心宣傳短片，要一班人表演跳舞，拍拍吓突然有個女仔話唔拍、唔識跳，但我知原因唔係咁，佢想受人重視，我就話你唔跳，今日成隊人就收嘢唔拍，令佢覺得唔跳會影響到好多人，顯出佢有面之外，仲畀佢多份責任感，佢之後都肯重新拍過。」
為了爭取拍片實戰經驗，李與同學一同參加鮮浪潮短片比賽，「上堂學嘅理論多，我同同學為咗拎多啲實戰經驗，參加咗 12年香港藝術發展局舉辦嘅鮮浪潮短片比賽，雖然冇拎到獎，但期間會有資深電影導演任指導師協助完成拍攝作品，我哋嘅導師係張玉梅，佢教咗好多剪片技巧，令我哋手法更加成熟。」
今年畢業的李會在拍攝方面發展，「近年微電影多咗人留意，希望畢業後可以嘗試製作多啲呢方面嘅嘢，𠵱家份兼職畀我多咗見識，好似學校功課要寫小說、劇本，要搵唔同題材靈感，接觸唔同層面嘅人同事物，幫到我創作。」

阿威學生
之前以為拎住部機隨便影就叫拍片，上個堂後識到唔少拍攝技巧，哥哥（李文浚）教得唔錯，令我對拍片產生咗啲興趣，𠵱家會搵吓關於拍攝方面嘅書嚟睇吓，而且又要準備拍自己嘅作品，少咗周街 hea。

Bryan社工
之前接觸過李文浚，同佢踢過波傾過偈，覺得佢有耐性同責任感，而且仲有啲經歷分享，見佢讀拍攝呢方面嘅科目，拍片又唔錯，於是就搵咗佢幫手做拍攝導師。

青協會請乜嘢兼職導師？

香港青年協會轄下有 60個服務單位，而荃灣及葵涌外展社會工作隊就屬外展社會工作組旗下，註冊社工 Bryan說︰「我哋會不定時請導師去教興趣班，好似跳舞、浮潛等、當中會教導青少年正確嘅價值觀，好似毒品嘅禍害、性教育、高賣等。我哋嘅服務對象主要係青少年，所以導師要注重同佢哋嘅溝通，好歡迎大專生嚟兼職，有興趣可以留意青協個網站。」
香港青年協會︰ http://www.hkfyg.org.hk