【電視風雲之跳槽發圍】廣東人話，魚唔過塘唔肥，正是古人所指「良禽擇木而棲」。
艾威在無綫呆了33年，他最多只是一塊幾百蚊一騷的綠葉王。四個月前，他不顧一切魚躍過河，聲價十倍，而且不費唇舌，做了男主角，「良禽擇木而棲」是時也，亦命也。
在電視史的創世紀中，王維基、黎耀祥及李添勝擔當要員角色，他們的努力和拼搏精神啟發不少力爭上游的小工，小工艾威得到新的啟示，新電視台的誕生將會是一個千載難逢的機遇，香港電視有望締造更多奇蹟，為無數小工帶來新的希望和夢想。
如今曙光初現，57歲的艾威達成33年來的一個夢，夢想中的男主角。

撰文：楊潔雯

■在無綫浮沉33年，艾威只是二、三線的綠葉王。
攝影：林德雄

資料顯示，艾威是一塊在無綫呆了33年的綠葉，可有可無，原本打算給他一個發洩鬱悶的機會，不過，訪問當日眼前穿着筆挺的黑色西裝，心口押上一條粉紫色的袋巾，耀眼奪目，艾威臉上帶着一絲絲的微笑，昂首闊步，衝着而來是一件喜事。
果然，跳槽香港電視的艾威，完成了人生其中一件大事，他終於當上了男主角。

■劉德華主演的《獵鷹》，艾威亦有份參演。電視圖片

■艾威過檔香港電視後，在《三面形醫》擔當男主角。微博圖片

靜待伯樂出現

悉心打扮的艾威身上散發陣陣初戀的氣息，是一種難得的歡愉和滿足，對新的崗位，新的環境，他讚不絕口：「壓力少咗，空間更大，自由度又高，我對??家個環境好滿意，好多工作人員都係舊同事，不過，係因為呢個轉變，我先至上到一線，我深信在舊世界係冇可能發生，我今日係成功嘅蛻變，我唔轉，呢一世都唔會去到呢個位，亦唔會有突破。」

人面依舊，但是艾威變了，已是一線男主角的他說：「以前我係一個黐線演員，又唔係一線，又唔係第幾線，二、三線黐住，所以如果我唔去就會咁樣喺TVB一世，所以呢個係千載難逢機會，目標？梗係想獨當一面，不過就算唔係，唔係套套做一線，起碼有條路畀我行出嚟，??家都算實現到我嘅夢想，新劇《三面形醫》講我同林文龍、姜大偉（Jonh哥）係做醫生，都叫做哎吔男主角。」

小時候住在荷李活戲院樓上，看戲是艾威的最大娛樂，他是超級電影迷，自小培養對戲劇的興趣，因為喜歡，故78年考入無綫藝員訓練班，同期有湯鎮業和廖啟智，在無綫的日子，艾威的黃金機會只是曇花一現，他說：「《情濃大地》同羅嘉良、張兆輝，我做大反派，唔知點解冇承接力，我可能係需要一個人，對你有偏好，就好似黎耀祥有添哥（李添勝）呢種製作人，對某些演員心態上要係做到你得為止，我似乎係缺乏咗個咁嘅人。」

性格被動又內向的艾威，曾強迫自己迎合電視圈的潛規則，結果空手而回：「有啲製作人係好抗拒演員sell自己，除非有人sell你，曾經我知有角色想搵我做，因為有啲人對我有成見，所以流失咗個機會，TVB有時候嘅角色係操控喺某幾個人身上，長時間係呢幾個人話事，只要幾個決策人對你睇法唔同，對你認識唔深，咁就流失機會。」

■艾威在《情濃大地》做大反派，奈何劇集沒承接力，未能發圍。劇照

■艾威與商天娥於《師奶兵團》中演草根夫婦，大受歡迎。劇照

■艾威在《桌球天王》被郭政鴻強吻，犧牲色相。劇照

心頭高創奇蹟

電訊魔童王維基白手興家，因為凡事無絕對，決定賣仔套現30億開辦香港電視，大茄做起的黎耀祥三奪無綫最佳男主角，還有道具小工李添勝曾擔任無綫總監高職，每個故事都發人深省，艾威亦深信奇蹟一定會再現：「等如六合彩，如果唔係加埋運氣，仲有啲咁嘅例子，小工係唔會發奮向上，或者有人話我心頭高，我乜嘢外形，乜嘢資質，乜嘢年紀，好多外在因素，我會俾人笑，我好似唔可以去到一個高位，不過演員就係希望做到好角色，一個令人深刻嘅角色，咁乜嘢角色係咁呀？咪主角囉！係做主角人哋先知，先會有發揮機會，我冇理由話畀自己聽唔得，人哋話我冇問題，自己話自己就一定唔得。」

唔怕搭沉船

■不擔心搭沉船的艾威，不滿政府遲遲未肯發牌。

免費電視發牌仍處於膠着狀態，艾威雖每月準時出糧，但他對政府的遲緩處事態度相當不滿：「未去過一個地方係得一個電視台，另一個就名存實亡，仲話國際都市。其實發牌同電視革命係在所難免，希望政府能夠好和諧咁處理，唔係話要淘汰任何一間，政府係有責任推進電視工業，係唔應該搞到喺吵鬧聲中發牌，本來更多電視台係一件歡樂嘅事。」

■艾威過檔王維基（左）的香港電視，獲力捧做男主角。

未發牌先跳河，有機會搭沉船，艾威說：「冇擔心過，戲照拍，我可以話所有同事士氣都非常旺盛，上下一心。」難怪艾威身先士卒為香港電視派傳單，爭士氣，他繼續賣花讚花香說：「真係不惜工本製作，好多劇集都係實景拍攝，之前拍《形醫》喺成豐片廠用70萬搭咗個醫務所，水喉係真，電腦可以上網，iPhone係可以叉電，仲有好多外景拍攝，我拍嗰套《客家女人》就專程到福建梅州一個落後嘅村莊入面拍攝，令到演員同幕後工作人員都好投入，係一啲好有誠意同質素嘅製作。」