電訊型科

海賊王！西太后！日系手機回勇入港

2013年01月09日 ~~ 第294期 Face

前排韓國水機窮追猛打，以平玩高階機嘅優勢，幾乎成為水機界冧把溫！而對手日本水機呢期都發力，派出兩部別注版迎戰。打頭陣有動漫界猛將《海賊王》趁今年 15周年，全部團員連埋架 docomo N-02E One Piece手機，由烈陽號 docking載住入港，準備搶劫你荷包。尾隨就有 fashion界代表 Vivienne Westwood手機提你日系機美感與貴氣並重。呢排日圓係咁跌，如果呢兩部日系機都可以大減價，一定夠同韓系機鬥過！

互動片段

好玩海賊機

Spec.

系統： Android 4.0
處理器：雙核心 1.5GHz、　 1GB RAM
制式： 3.5G、 GSM
屏幕： 4" 480× 800 TFT
鏡頭： 810萬像素
記憶：內置 8GB、最高 64GB microSD
體積： 124× 64× 11.9mm
重量： 147g
售價：$7,280
查詢：三禾電氣（ 2374 0618）

海賊機冇失威
docomo N-02E One Piece

漫畫已經講到成班海賊經過 3年苦練，喺偉大航道重新啟航，實力全面升呢。就連出手機，呢部別注版全球限量 5萬部嘅 docomo N-02E One Piece一樣冇失威，跟機有烈陽號 docking，夠晒氣勢。規格表現都唔錯，起碼冇好似路飛咁係「旱鴨子」，反而同大部分日系機一樣具防水功能。而且有得拆電插 microSD咭，就算狂用佢個 810萬像素鏡頭影相，都唔怕塞爆部機。唯一係呢部機唔支援香港 4G同冇高清芒，叫真心用家失望。

跟機送齊 9個主角防塵塞，一星期日日唔同款都得。

機背係路飛手繪個海盜 logo，粉絲見到實 like。

Home button着燈後，原來係烈陽號個獅子頭，靚！

在港可用功能

解鎖：軟解
對應 SIM：各台 3G咭
介面：日/英文
輸入法：日/英文
上網：有

Docking靚位 check

船身前方個大獅頭夠搶眼，上面仲有個防塵塞位，隨你擺飛佛角色上船。

機座置於船中間，可以隨時成個拆出，擺去第二度充電。

充電嘅 microUSB插頭喺機座底部嘅側面，收得好密。

內置多 icon內鬼玩特效

手機外形同個烈陽號 docking夠晒靚，原來佢仲好有內涵。打開手機，由 lock機畫面到手機背景都係班海賊。見到 app個畫面，所有 icon更係海賊 icon，唔只路飛，仲有白鬍子等角色，粉絲肯定勁感動！再搵埋機內仲有《海賊王》動畫短片同小遊戲，不過最好玩都係相機 function，可以加入烏索普嘅星彈，令相片出現唔同「爆破」特效，好玩到手軟！

試相
海賊機充分表現日系機影相靚嘅優點，顏色夠清晰，再加埋內置個星彈特別效果，好玩！

內置《大劍豪之道》格鬥遊戲，玩法係電腦一發訊號就要鬥快出招，快過電腦為之贏， kill time一流。

聽歌用嘅 widgets由音樂家布魯克做主角，好貼題。

西太后駕到
docomo SH-01E Vivienne Westwood

《海賊王》手機主攻後生動漫迷市場，但一班成熟客都唔可以忽略，而佢哋最鍾意嘅手機 crossover對象，一定係 fashion名牌，所以 docomo同期就出埋呢部限量 30,000部嘅 Vivienne Westwood別注手機 SH-01E。數番全球對上一部 fashion phone，已經係上年年頭嘅 LG PRADA phone第 3代，班名牌 fans等咗咁耐，終於有得換款，唔使退而求其次用 iPhone或其他大路 Android機再笠個名牌 case。

Spec.

系統： Android 4.0
處理器：雙核心 1.5GHz、 1GB RAM
制式： 4G（只限日本）、 3.5G、 GSM
屏幕： 4.1" 540× 960
鏡頭： 1,210萬像素
記憶：內置 16GB、最高 64GB microSD
體積： 116× 59× 9.9mm
重量： 115g
售價：$5,180
查詢：豆腐の攜帶（ 2381 0686）

招牌 design玩介面

迷彩背殼金色位經過電鍍，光線射落會反光，感覺好 grand，而且下方 VW名字同土星 logo微微凸出，造工精緻。

Fashion phone梗係外表行先，今次部 SH-01E嘅 design繼續保留西太后大膽風格，用招牌土星圖案拼砌迷彩 pattern，唔只女士有親切感，更因設計中性，連男士都啱用。不過佢唔似海賊王手機有相關特效同 game玩，連好多別注手機都有嘅主題短片、鈴聲、 widgets都欠奉。好彩介面都有特別 theme，啲 icon好 fashionable，亦有 Westwood飾物經常出現嘅人羊公仔喺畫面上跳嚟跳去，加上有 16張 VW風 wallpaper轉換，滿足番班擁躉。

在港可用功能

解鎖：軟解
對應 SIM：各台 3G咭
介面：日/英文
輸入法：中/日/英文
上網：有（最高 3.5G）

3大 wallpaper

西太后都係 Harris Tweed格仔布 fans，連設計服飾都成日用， wallpaper又點會冇？

心心圖案係西太后至愛之一，所以就用佢拼砌特別圖案，不過唔玩迷彩，只用紅白色。

呢張白地土星 logo就最簡潔，最啱心煩、唔想擾亂心神嗰陣用。

呢隻人羊會長駐介面首頁，平時就跳嚟跳去或者玩吓土星，當有來電同 SMS時，就會奏樂同拎住個信封提示你。

影相最掂　香港冇 4G

講到功能， SH-01E雖然只行雙核心 CPU，用落冇四核機咁快，但就有 Sharp手機最多人讚嘅影相靚優點，佢個 1,210萬像素鏡頭有齊防手震、 HDR、曝光補償等進階功能，影 snapshot唔失禮！仲要佢其實係 4G機，只不過日本頻譜有別於香港，所以到港後最快只用到 3.5G上網，有啲可惜。好彩佢只賣$5,180，大約比冇 Vivienne Westwood加持嘅原版 docomo SH-01E貴$1,000左右，話晒貴氣得多，物有所值！

別注手機機盒同說明書都要有特別設計，所以佢哋都專登印番同手機背殼一樣嘅迷彩圖案。

第一次拎部機上手，實會以為芒底個 logo係按鈕，點知原來只係裝飾圖案， home、 back等掣全部要㩒虛擬掣，有啲失望。

惟獨隨機附送嘅充電機座冇重新設計過，黑色一嚿同部機好唔襯。

試相
1,210萬像素下嘅影像細緻唔在講，最正係相片真係有 DC質素，呢張相熊仔同背景黐晒地，但仍然清楚睇到層次。