新版 Dante
立即變黑晒亦得，得咗！

漫遊毒物

《 DmC》白髮染黑砍掉重來

2013年01月09日 ~~ 第294期 Face

「久休復出」要背負住沉重壓力，上年運動界有欄王仆欄，遊戲界都有《 Diablo3》被評冇新意毀譽參半。名作《 Devil May Cry》事隔 5年再度推出，決定全身大改造，搵嚟日英兩地製作人跨國合作，型仔主角旦丁 Dante飛走招牌白髮，激變黑色短髮街童 look震撼機迷，不過咪以為佢個 look變得勁過 Angelababy就冇晒 feel，隻 game同以前一樣咁爽咁型， fans試過黑髮可能就不再掛念往時白髮。

曾江
學我用美源髮彩啦！設計對白

有白頭髮？
白髮舊版 Dante

名稱： DmC： Devil may Cry
機種： PS3、 XBox360
廠商： Capcom
類型：動作
人數： 1人
售價：$328（香港行貨送手機殼， iPhone4S、 Note、 S3， 3機種共 6款揀 1）
查詢： Capcom 2366 1001

白髮型男變
倫敦街童

初初遊戲公布旦丁新 look，大膽飛走招牌白髮同紅風褸，變身短髮黑皮褸倫敦街童 look，全球 fans嘩然。點解咁大轉變？隻 game全名叫《 DmC： Devil may Cry》(簡稱《 DmC》，過往嘅《 Devil May Cry》則稱作《 DMC》)，冇叫正傳第五集，可以視為平衡世界嘅外傳故事，主角都叫旦丁，但身份亦由天人魔混血變為天使溝惡魔。製作人話係想保留整體風格，重新設計一款新嘅《 DmC》遊戲，所以將人設同故事都推倒重來，夠晒大膽前衞。

Kat
故仔就講現實世界暗藏惡魔搞事，旦丁喺女配角 Kat嘅能力領導下去到惡魔真身棲息嘅 Limbo City斬妖除魔。

Vergil

雖然話係外傳，但好多地方有前作影子，好似阿哥維吉爾 Vergil都照樣有，將來嘅下載內容度更可用佢。

戰鬥一樣有過往刀槍混合嘅爽快風格，此外仲新增天使同惡魔兩種不同攻擊模式，唔係一味食老本。

試玩轉口風
fans有信心

改革係好事，但《 DmC》向來標榜有型，旦丁走開日式視覺系美型風格無啦啦變咗歐洲西洋風，一公布時 fans唔多受落。不過經過數次遊戲展 demo、試玩版之後，網評人同 game網都轉晒口風。皆因隻 game外表雖然改咗好多，但遊戲內容保留到《 DMC》神髓之餘，仲加入咗唔少有趣新點子，例如今集旦丁招式分開天使同魔鬼兩邊，駁招玩落變化更大。就好似同情人久別重逢，個樣唔同咗啲，但相處落覺得比以前更好 feel，班 fans都即刻有返晒信心。

Limbo City場景有啲似夢景之中，同過往《 DMC》嘅歐陸風格頗有不同。

天使同惡魔兩種不同模式使用嘅武器各有不同，例如惡魔會用鎚仔呢類大型武器，今集登場武器會比前作豐富。

大型惡魔唔少得，初期遇到嘅千年蜘蛛怪，要先攻其手腳再攻其頭部弱點。

天使惡魔玩新招

開動 Devil Trigger模式時，旦丁會短時間變回老版白髮紅褸 look。

《 DMC》系列玩槍劍並用，連技駁到出神入化，一切以有型為先，但打得耐咗難免變咗「連打 game」有啲厭。今集就利用旦丁天使與魔鬼嘅背景加入咗全新嘅雙招攻擊系統，變天使變惡魔出唔同招，更要因應舞台上嘅敵人屬性，靈活變招應對。仲有爆珠技 Devil Trigger可以短時間變身紅褸白髮 look，大量新招打落仲激過正傳，咪睇小短髮丁仔呀。

隨機應變冇屈機

天使攻擊（緊按 L2/ LT攻擊）注重速度、使用鐮刀等會連續攻擊嘅武器；惡魔攻擊（緊按 R2/ RT攻擊）則追求威力、使用斧頭等緩慢但殺傷力驚人嘅武器。另外，部分敵人要使用對應嘅攻擊先可給予傷害，青白色敵人必須用天使模式攻擊，火紅色敵人就只能用惡魔模式應戰，要隨機應變，唔可以好似玩《無雙》咁來來去去一招屈機。

白色用天使 mode打，紅色就要用魔鬼 mode(如圖)，普通敵人就用任何一邊嘅招都打得死。

除咗用刀槍，旦丁今集好似《 Bionic Commendo》咁玩飛索，天使模式可以放索後自己飛前，惡魔模式就拉敵人埋嚟，有時要用嚟解謎過關。

撫慰 fans瞬間變白髮

以往《 DMC》都有魔人化 Devil Trigger系統，儲滿技能計使出，今集一出成個畫面啲敵人會被爆上天再進入慢動作時間，畀你慢慢耍帥駁招。最正係出招時旦丁會變番做白髮紅褸 look，夠 classic，但一樣係短髮，睇嚟製作人真係情迷呢個短髮新 look。

今集魔人化唔只加強自己能力，仲會有慢動作、爆飛敵人等效果。

同過往集數一樣連招愈多賺取嘅靈魂愈多，可以用靈魂點數學招，天使同惡魔兩邊嘅招係分開練嘅。

旦丁短髮之謎

旦丁變黑色短髮除咗係想求變求創新之外，機迷們發現箇中關鍵可能係來自今集嘅英國開發團隊 Ninja Theory，其創作總監 Tameem Antoniades（圖）成日話從事藝術創作要做番自己，睇落呢位仁兄又真係幾似將自己造咗落隻 game度。

網民惡搞 key圖， match！

監製解畫點解咁大膽

今次《 DmC》變化咁大，最大原因搵嚟英國廠 Ninja Theory跨刀製作，不過日本 Capcom咁放手將《 DMC》呢個名牌任佢玩確係認真夠膽。監製江城元秀就接受咗《 FACE》訪問，為各位 fans講解一下旦丁同《 DmC》嘅革新之謎。

江城元秀
監製

壓力不改堅持

江城 san話一開始已經想隻 game唔同過往嘅《 DMC》，而且亦信晒 Ninja Theory：「佢哋嘅美術團隊技術好好，仲為咗呢單 job刨咗好多日系動畫同遊戲，再用歐洲人口味去重塑旦丁，出嚟嘅效果正係我哋想要嘅。」所以遊戲公開時網民圍插新 look唔掂江城先生都話冇諗過變：「壓力好大，我哋都聽咗唔少意見，我哋有將不足之處改善，但唔想因此改變整體風格，𠵱家臨近推出收到正面評價，真係好鼓舞。」

遊戲喺公布初期網民圍插旦丁新形象，但睇番初期設定都同𠵱家冇分別，可見製作人嘅堅持。

試玩版推出後普通評價不俗， game網 IGN就話《 DmC》已經唔需要為自己證明啲乜喇。

英國外表日本心

江成先生透露今次《 DmC》破天荒由日本同美國 Capcom聯合監製，開發就交由英國嘅 Ninja Theory負責，日美英三方合作，呢個背心 look好明顯就係有西方風格。

機迷最驚隻 game唔只個樣，玩落都唔同晒，玩落多招出多掣按又不失條理，確實感受到日廠嘅細緻操作，更冇歐美 game常見嘅視點錯亂。原來隻 game雖交由 Ninja Theory開發，但日本 Capcom都有派專員教路：「我哋唔想隻 game操作同打法都變咗另一樣嘢，用邊粒掣出劍射槍，邊招點駁都有研究過。」監製仲好有信心隻 game喺日本會受歡迎：「睇落隻 game為歐美玩家而設，試過就知佢靈魂部分仍然好日本。」