圖片故事

開鑼

2012年09月06日 ~~ 第1174期香港《壹周刊》

八月的抖暑時分，凌晨四時多，沙田馬場內數以百計馬匹，已開始在綠茵草場上跑圈晨操，先做「慢功夫」，跑小圈熱身，然後做「快功夫」，到正式賽場跑圈計時。練馬師李易達每日都會在專屬看台上拿着望遠鏡，細心觀察馬房四十多隻馬匹的練習狀況，睇住馬匹有否氣喘失蹄，然後再修正訓練方法。

晨操

馬匹每天在 2.6米深的泳池游泳，鍛鍊肌肉。

晨操，並非齋跑，馬匹還要進行「行馬機」及游水訓練。李易達解釋：「行右圈同左圈，隻馬會用唔同重心腳，可以加強唔同腳嘅肌肉。」至於游水訓練，除了消暑外，練氣練肌肉。

剪毛

劉創強手上拿着的電剪，重近十磅，少點臂力也不行。

馬匹每朝八點晨操後，練馬師退下，輪到一班「護理員」上場。馬匹跑完一輪，就要修剪毛髮。由於馬匹大汗，毛髮容易積塵，所以每隔兩、三個星期，便要剪毛一次。馬會的一級剪毛師劉創強本是理髮師，替人剪頭髮，廿二年前忽然轉行到馬會，替馬匹「剪髮」，「我以前好鍾意同屋企隻狗剪毛，又鍾意動物，所以入行，而家一剪廿二年。其實馬好似細路仔咁，每次剪髮都會驚，你要識得氹佢哋，剪之前摸吓佢哋，叫佢哋唔好驚，咁會容易好多！」

練馬師李易達(左)在抖暑期間仍然要全程監察馬匹的操練狀況，馬匹跑完一圈，即向騎師詢問馬匹狀況。

全個馬會只有七位剪毛師，一千二百隻馬的毛髮都交給他們處理，劉創強每天平均要替近十隻馬剪毛。修剪馬匹的電剪重如電鑽，少說也有十磅，他拿着電剪卻揮灑自如，歲月鍛鍊回來的臂力令記者瞠目，「習慣晒，除咗幫佢哋剃毛之外，仲要修剪尾巴同埋頭、頸部分嘅鬃毛，一隻閒閒哋都要剪四十五分鐘，有時成堆馬排住隊等你剪，個人會越剪越澎湃！」

修甲

蹄甲就像跑步選手的跑鞋。跑手的跑鞋可以由工廠大量生產，但馬匹的蹄甲卻要全人手度身訂造。由打造到上甲，整個工序都是由釘甲匠負責，過程繁瑣。
「每隻馬腳形都唔同，所以首先要燒紅嚿鐵，就住腳形去造 size。」一級釘甲匠羅承恩說。「換新馬蹄甲，要先除咗舊嘅甲，要將啲釘逐粒逐粒由馬蹄撬出嚟，而釘上新甲前又要先磨平馬蹄同批走蹄上嘅死皮。每一步都要好小心，太大力，或者釘打得太入，觸碰到神經線，佢哋就會好痛。」採訪期間，羅承恩不斷提醒攝影師要小心，「唔好行喺佢後面，試過一次，有隻馬太驚大力掙扎，我成個人被扯咗落馬底！」

羅承恩替馬匹修甲時一絲不苟，事關稍一用力過度，即會弄痛馬匹。

不消十五分鐘，羅承恩已即席打造出一個蹄甲。

行馬機有點像旋轉木馬，馬匹在機內團團轉的踱步，為晨操開跑前熱身。

羅承恩是前香港划艇代表隊的成員，曾代表香港出席過多屆亞運會及二千年悉尼奧運，退役後轉當划艇隊教練，後來卻被「打鐵」吸引，六年前毅然轉行，「細細個就鍾意揸住『架生』整嘢，而家一手一腳成功打個蹄甲出嚟，好有滿足感！」
每隻馬平均三星期便要更換蹄鐵，羅承恩每週服侍近廿隻馬。「每隻馬換甲大概要四十分鐘，就算唔換甲，都要日日檢查，啲甲唔平衡就要打磨好，等佢哋跑嘅時候唔會失重心，有時仲要陪埋佢哋睇獸醫，同獸醫講番馬蹄嘅健康狀況。」