漫遊毒物

日 game唞唞　 Counter Strike打足 10年

2012年08月29日 ~~ 第275期 Face

唔係話打機都要講政治抵制日貨，事實上今年由《大菠蘿 3》到近期大熱嘅《 Sleeping Dogs》，最賣得嘅都係歐美遊戲，既然係咁，今次就教大家打洋 game避開不停食老本嘅日系 game啦！
而呢期最有話題嘅洋 game就莫過於筆者幾位老死都話要一齊玩嘅《 Counter Strike Global Offensive》，話晒《 Counter Strike》作為大家童年回憶紅足十幾年，單係重拾友情歲月已夠晒噱頭！

機種： PC、 Mac、 PS3、 XBox360
廠商： Valve
類型： FPS
人數： 2-10人（網上對戰）
售價： US$14.99（ PC、 Mac）、 1,200MS Point（ XBox 360）、 PS3香港發售日未定，美國已上市 US$14.99
網址： http://store.steampowered.com/app/730/

展示 CS原點魅力

今次《 Counter Strike Global Offensive》繼承咗初代《 CS》精髓，玩番傳統 5對 5反恐戰之餘，更唔似其他槍 game匿埋一陣就回滿血，而且喺多數模式中，死咗就要等新一局再開至會復活。玩落同近代嘅《 Call of Duty》等新派槍 game有所不同，但老手一致 like佢更考戰術，真實性更高。另一方面，《 CSGO》就算舊 map都有大翻新，加上大量新槍械，試玩過後都話節奏快咗好多，老手再唔能夠用經驗屈機，全民由頭學過夠新鮮，玩落亦公平咗。

冇回血冇復活

唔似其他槍 game有回血系統，更考戰術運用，受咗傷嘅隊員可能要由衝鋒隊退回做後衞。

買槍每局新

唔似其他槍 game可以用 level或者金錢屈新手，《 CS》入面嘅錢同買到嘅槍每次玩都由頭開始，武器選擇上人人平等。

低 spec親民

事隔多年再出新 game，畫質自然大躍進，但電腦版整體硬件要求都相當平易近人，筆者拎部冇獨立 display咭嘅 Mac Book Air 2011都可以 run得好順！

CS紅足十年回顧

《 CS》作為殿堂級 FPS，其實佢唔係一隻完整嘅新 game，係由班 game迷手痕用另一遊戲《 Half Life》改寫而成，後來因為太受歡迎，搞到成 team開發隊被收購出正式版。據統計《 CS》由 99年推出到 09年為止都係最受歡迎射擊遊戲， 03年出嘅 1.6版到上年仲搞緊比賽，可謂遊戲界長青樹！《 CS》之後推出過《 CS Source》、《 CS Online》，不過系統改動太多，成績反而差咗，今集《 CSGO》回歸原點唔少人都好期待。

Counter Strike
推出年份： 1999年

由 99年面世至今都一直有人打， 03年更新的 1.6版為舊世代《 CS》最後更新版，時至今日仍有用來比賽。

Counter Strike Source
推出年份： 2005年

採用全新遊戲引擎，畫面質素同像真度都大幅提升，不過亦有支持舊版嘅玩家話佢唔正宗，導致《 CS》迷割裂為新、舊兩派。

Counter Strike Online
推出年份： 2008年

主力拓展亞洲市場而推出嘅版本，因為可用真錢買槍加上外掛嚴重，老派《 CS》迷多數評價麻麻。

超抵價上網買

上去 Stream官網就可以購買電腦版，依照指示申請帳號同下載 Stream軟件就買到遊戲。

今集無論 PS3、 XBox360同 PC版都只係 online賣冇出實體版。而購買過程都好容易，電腦版只要申請網絡遊戲平台 Stream嘅帳戶，就可以用信用咭買到，售價只係 US$14.99（約 HK$116）。抵玩之餘，亦平過要捱因日圓高企而賣成 4、 5嚿水嘅日版 game多多聲。

狂迷論盡 Counter Strike

《 Counter Strike》由 99年到家經過 13年歷史，淨講回顧未必 feel到佢有幾勁！梗係要搵埋《 CS》狂迷現身說法。我哋除咗搵嚟代表香港出戰過海外大賽嘅 Trade Mark Gamers成員外，仲搵埋有為推廣香港電子競技文化勞心勞力嘅電競媒體網站 iGamers始創人，一齊聽吓佢哋口中那些年的《 CS》同對《 Counter Strike Global Offensive》展望。

即使到咗 2011年 CS仍然係香港電競界重點項目，贊助商 Samsung更租用商場打決賽，現場氣氛十足。

iGamers始創人：
CS有特殊地位

iGamers創始人 Roger
於美國見識過外國嘅電子競技界發展得好有規模，於是返嚟香港成立 iGamers推廣電競。

Roger話《 CS》喺香港有特殊地位，「外國玩家同香港玩家口味好多時都有偏差，所以《 CS》有全球性比賽又多香港人玩自然推廣。期望《 CSGO》可以帶畀電競界新衝擊。」當被問到香港電競界前景， Roger就話：「暫時會搞多啲本地比賽推廣受歡迎遊戲，好似近年大熱嘅《英雄同盟 LOL》，都有香港玩家闖出名堂受到外國注目。」

名玩家品評 CS

Trade Mark Gamers係香港知名《 CS》團隊，並贏得 2011年 WCG香港區決賽冠軍，代表香港出戰韓國。

S(左)：《 CS》歷史久遠，搵對手個系統好落後，《 CSGO》可以更輕鬆同外國玩家對戰。《 CS》近年俾其他新 game吸走一班玩家，《 CSGO》推出有望可以合流翻新、舊玩家。
阿龍(右)：出去打比賽要有固定隊友。 08年左右最瘋狂， 9點幾起身 call醒隊友上網操到凌晨。每次比賽打贏打輸都會見到啲 player好激動！

上年 WGC香港決賽呢位玩家喊到伏喺枱，其實佢唔係輸咗，而係贏咗太開心喜極而泣。

單機繼續洋　末日騎士

同班舊戰友打完槍，想自閉玩單機 game嘅話，繼續推介你玩洋 game，除咗《 Sleeping Dogs》之外，呢期注目作仲有《 DarkSiders II》。上集備受好評，大家就話佢似《薩爾達》加《戰神》混合體。新一集照樣主打 RPG元素重嘅動作遊戲，升 level打怪儲寶物，保證襟煲耐玩。

機種： PS3、 XBox360、 PC
廠商： THQ
類型：動作
人數： 1人
售價：$469（ PS3）、$419（ XBox360）、$359（ PC）

比上集更 RPG

今集故事發生喺前作兩年後，主角由大隻佬 War變做另一位天啟四騎士 Death。玩法唔再係過版，而改玩開放式地圖。加上引入裝備系統，唔單只可以換武器，仲有裝甲物件影響能力同技能，打落有啲似《惡魔城》， RPG味極濃，啱晒鍾情 RPG嘅日系 game迷轉會。

上隻 War身形相當大隻，口味太重，今集主角 Death明顯 slim好多。

有等級系統，不過遊戲難度唔太高，一路打落去唔使刻意儲 level都應付到。

繼承前作都有解謎要素，玩落確有幾分薩爾達嘅風味。

主武器同上集一樣係鐮刀，但可以裝備各種副武器改變攻擊方法同技能，招式豐富。

其他西選
《 Starcraft II: Heart of the Swarm》
改版在即玩封測

即時戰略大作《 Starcraft II》一早講會以三部曲形式推出，近日 Blizzard就公布第一個 Expansion〈 Heart of the Swarm〉即將展開測試。今次雖只開放畀職業玩家及媒體封測，但有興趣嘅玩家，都可在 Battle.net帳號中，管理遊戲下嘅「建立封測資料設定」建立資訊，就有機會抽中一齊玩。而 Blizzard另一極大爭議大作《 Diablo III》最近亦不停公布 1.04改版資料，洋 game唔掂肯改版補鑊， fans是否收貨就有待考證喇！
PC• Blizzard• SLG• 2013年

《 Guild Wars 2》
久候 MMO大作

《魔獸世界 World of Warcarft》曾統治過網絡 MMORPG好一段時間，但花無百日紅，《 WOW》已呈現疲態。因此開發多年嘅《 Guild Wars 2》就被多個遊戲網站選為本年度期待遊戲，有望成為新一代網絡 RPG霸者。佢戰鬥系統比《 WOW》更富動作性，閃避系統亦貼近動作遊戲。對比日廠 RPG十年如一日嘅死板玩法，係時候轉會試吓呢款歐美科幻風嘅 MMORPG大作。

PC• Arena Net• MMORPG• 2012年 8月 28日