Geek友講場

好玩創意影　 Post相更多 like

2012年08月29日 ~~ 第275期 Face

無數人日日貼相上 facebook同微博博人 like，之不過如果影到好似閃咭咁張張構圖一樣，或者只用 Instagram求其加個 effect，實在好難脫穎而出，令朋友留下深刻印象。想多幾個讚的話，真係需要玩啲新鮮創意相片，自己諗唔到，都不妨去外國網發掘借鏡一吓。雖然仆街、飄浮之類嘅影法已經 out咗，但攝影世界不停進步，近排又有相中相、自轉相、隱身相等乘勢興起，快啲拎起相機啦！

互動片段

學影自轉相

朋友無限 loop　相中相中相

呢期最 hit影相玩法，莫過於吸引到多國傳媒報道嘅相中相。一班朋友齊齊喺芒前開出上手影落嘅相，再喺芒旁邊直豎拇指再影成相中相，之後繼續傳畀下手。影法好簡單，但勝在將 fb套 like文化喺現實中實現，加上有一大班 friend參與，比一個人影相等人讚好玩得多。家好多人 fb閒閒哋都有幾百個 friend，若有人想玩大啲，打破原相 55層紀錄，其實唔難，無限 loop落去都得，世界大同啊！

拍攝 step

影第一張相時唔會有上手相片，所以個芒隨便開一張大頭相就得，反正影幾層之後都唔會再見到第一張個芒入面係乜相。

影第二張相時，就喺芒度開番第一張豹紋 model嘅 like相，如此類推。呢張相好難自拍，返工期間影的話，搵同事影完再幫人影就得啦！

影靚啲 tips

呢種相最好係人清畫面又清，但若然用手機或 DC仔影，好易影到人清但芒爆。想影得靚唔可以懶，最好出齊腳架同閃燈，校細光圈再校慢快門，咁閃燈光可影清個人嘅同時，畫面光度又會啱啱好。

原創拆解

呢輯 hit爆嘅相中相，係源自美國俄亥俄州一位仁兄。佢本來只係無心插柳咁自己 like一張女性朋友相，影低呢個畫面後先忽發奇想，叫朋友齊齊影相中相，最後有 55個 friend參與，佢仲將呢 55張相製成短片，同原相一齊放上網公諸於世，博到好多個讚！
網址： http://imgur.com/a/nZVQ3

一人玩 key相

若你唔想叫幾十個朋友一齊影咁勞師動眾，好似呢張 BB相咁，影完一張再用《 Photoshop》 key入相架空位都得。不過咁玩只有畫面效果，冇朋友參與嘅樂趣。

詭異日本自轉風

變成動態圖片 gif檔， model手上嘅兔公仔會不停轉，加上深沉背景，詭異味十足。

影相要跟潮流、應時節，自問自己夠大膽，為趕潮流唔怕農曆七月去影邪邪哋型相的話，不如學呢位少女玩一系列自轉相，走去後巷、深山取景，然後製作出畫面上只得一個蘋果、或者少女喺到不停轉轉轉嘅動態 gif圖片，營造詭異效果。其實簡簡單單影 5張相就已經夠，夜半喺屏幕前睇住呢輯自轉少女相，十足睇日本恐怖片令人毛骨悚然！

拍攝 step

揀好場景，就落腳架令畫面定住。而 model企好位置後，為確保自轉時唔會走錯位，可以喺地面貼張膠紙做記號。

影好一張，就叫 model稍為轉少少，攝影師亦要睇實畫面，避免走位。如果要影公仔轉而唔係人轉，就最好有人幫手轉公仔，唔好令 model個身郁咗！

影好最少 5張自轉圖就可以用軟件組合成 gif，由免費嘅《 Microsoft GIF Animator》、到專業嘅《 Flash Professional》都可以。

靠 app影自轉　唔使拎腳架

家個個愛用手機影相多過單反，想玩自轉相又嫌拎腳架麻煩，原來一個 app都可以搞掂。呢個叫 Kinotopic嘅 iPhone App，可以喺你拍完一段 3秒短片後，圈番想有動態效果嘅部分，就能夠營造到自轉相嘅背景靜止，然後得 model不停自轉嘅效果，連腳架都唔使，正！

Kinotopic• iOS Free

拍 3秒短片， model學日本少女咁自轉一周。

幾手震都唔緊要，因為可以用畫筆填滿番想有動態效果嘅部分，其他位置自動變成靜止畫面。

完成

影公仔轉 tips

Stop motion大師 Ben：取景最緊要
自轉少女拍攝手法同 stop motion相近，所以搵嚟 stop motion短片《不是 Toy Story》嘅作者阿 Ben，講吓拍自轉少女相嘅 tips。佢話：「相片氣氛好有日本鬼片陰森感，睇得出拍攝者專揀無人地方取景，避免背景出現『變數』，突然走個人入嚟，搞到冇晒氣氛。就算走入深山都要留意唔好揀大風日子拍攝，因為背景樹葉郁來郁去，合成做 gif時，背景一有動感，就已經唔係嗰種感覺。」

原創拆解

由一班日本藝術家發起，名為「 rrrrrrrroll」嘅一系列自轉少女影法，由 blog、 twitter及 facebook開始傳出去，短短一個月，已經有幾千人 follow。而且呢班藝術家仲喺 blog度講明每個星期都會有兩幅新作發表，分分鐘 hit過鬼佬發起嘅相中相。
網址： http://rrrrrrrroll.tumblr.com

自然系攝影　隱身其中

詭異風未必人人 buy，喜歡自然先啱你胃口，亦有隱身相你影，呢系列講求被拍攝者衣着同環境融合，美感度高，搶 like必學！睇落夠晒靚，不過香港冇乜大自然景，周圍都係高樓大廈，唔想長途跋涉去郊野，可以學《 Face》咁，用線條簡單嘅籃球場取景。只要衣着顏色揀得啱，一樣可以成功隱身。

拍攝 step

搵到線條簡單嘅背景就影定張相，再去時裝店搵衫，千祈唔好買幾十隻唔同深淺度嘅綠色衫去到先襯！

到影嘅時候要慢慢同 model試合適位置，但求度準個線條分間位，影出嚟就會似。

原創拆解

原創者係來自芬蘭嘅攝影師 Wilma Hurskainen，佢喜歡拍攝 model着住同環境相似嘅顏色同質感，但又冇刻意造出隱形效果，感覺好似同自然融合。雖然佢只 post兩張作品，但呢種影法就已經風靡全球！
網址： http://www.wilmahurskainen.com

失敗跟風作
呢種融合自然 concept嘅影法一呼百應，由日本到歐美都有模仿作品，不過好似呢張叫 model屈喺花圃下面嘅影法，就搞笑多過美感。

Sarona@Sarona studio：高階玩法加質感

經常於電影擔任服裝指導嘅 Sarona，佢話影呢類融合自然嘅相，最好揀鬆身剪裁服裝，好似長裙、闊衫等，避免着 leggings呢類突出線條嘅衣物。再高階少少，就能夠學足原創相連衫上都加入質感， Sarona教路：「去日本百貨公司好易就買到畫上衣服嘅顏料，想營造沙石效果，就可以買海綿，好似扱印仔咁印上衫度。想扮樹木質感，就買個薯仔，切開之後印印印，好簡單！」

用海綿喺衫上印印印，就能輕易造出沙石質感。

考你創意　全民借雲

講到自然，早排香港出現雙彩虹，搞到 facebook出現唔少天空相。加上呢期成日打風，難得見到藍天白雲，又令到一班手痕友發揮創意，借位影出唔少得意白雲相。其實呢股影雲風氣喺外國都出現咗一段時間，不妨參考外國作品，再發揮你嘅創意。最正係影呢類相唔需要好高技巧，只要有創意，見到得意雲，識借位就得！

影靚啲 tips

前後差距
借位相幾乎人人都識影，但好易忽略影住光猛大白天，會令前方景物變暗嘅問題，臨 post上 facebook前，記得執執先。

小心失手
雖然呢位外國人搵泥耙做道具咁有心，不過隻毛手真係嚇親人，所以盡量搵簡潔嘅 model、服裝同道具。

難度最高　新舊相合併

講到難度最高，必數呢種將新舊相合併而成嘅影法。影法本身好簡單，只要拍出景物嘅今昔對比就得。反而係搵題材先最考功夫，最理想嘅例子，就好似呢張用原子彈爆發對比後來種上樹木嘅相片。

用人玩新舊相合併，可以好似外國人咁玩呢種穿梭時空嘅合併相都夠特別。不過撞正筆者童年影嗰個海濱公園，家陣變咗做豪宅，夾埋一齊就怪到不行！

歷代創意相　有發揮就唔 out

每種創意相都係一種潮流，盲目跟風去影，熱潮過後就會 out。但若然再注入新創意，影得夠態度， out咗都會再潮番。睇吓呢 5種 hit過嘅相仲有冇空間畀大家發揮？

借位相歷久不衰
發源地：全球
興起年份：千禧年代初
流行度：★★★★★（最高 5★）
呢種靠視錯去令巨大景物變細或者前後景重疊嘅借位相，直到家都未 out過！全因構圖得意之餘，人人都可以諗出屬於自己嘅影法。

飄浮少女停下來
發源地：日本
興起年份： 2011
流行度：★★★★★
飄浮潮流由日本少女 Natsumi Hayashi喺上年初帶起，但紅遍亞洲後，佢就冇再喺 blog同 fb發表新作。不過呢種影法已深入民心，至今仍有好多人影緊，尤其去旅行時。

扮死屍大吉利是
發源地：韓國
興起年份： 2004
流行度：★★
8年前韓國曾興過扮死屍影相，或者太過重口味，呢種相 hit過一輪就無以為繼。

仆街少女繼續仆
發源地：台灣
興起年份： 2011
流行度：★★★★
同飄浮少女同期兩個台灣仆街少女，仍然熱衷喺 fb貼仆街相，而且仲同好多文化音樂活動玩埋 crossover，早排更仆到嚟香港添。不過由於影法實在唔方便，上年熱潮過後，香港就冇人再仆！

蒸發相曇花一現
發源地：美國
興起年份： 2011
流行度：★★★
上年美國仲有班人玩呢種人間蒸發相，將衫褲鞋襪完完整整咁砌到成個人形，睇落好似人體失蹤咁。但由於再發揮嘅空間有限， hit過一輪就少人再影。