八七年的香港小姐季軍林穎嫺，憑着日本妹式可愛爆牙，隨即登上無綫小花席位，備受注目，但當日的滿足感，遠遠不及今日成為三孩之母，看着他們健康快樂成長的大。

走出五光十色的影視圈近二十年，林穎嫺真切感受到外國教育的輕鬆愉快，耳濡目染下，也引用美式教育子女的方法，成功孕育出熱情、獨立又有禮的三小孩，「我發覺香港家長同外國家長教小朋友嘅方法好唔同，我將呢啲心得同經驗寫成育兒書，當係一個捷徑畀啲新任父母，唔使好似我以前咁，要花咁多時間做research，可以幫到佢哋，我覺得好開心。」林穎嫺綻放着比昔日還燦爛的笑容說。

八七年港姐季軍林穎嫺定居美國多年，已嫁作人婦，並育有一子兩女。最近，她為親自撰寫的育兒書返港宣傳，並趁機探望親友。

林穎嫺坦言，外國人很注重家庭，丈夫工作以外的時間，必定陪伴家人；兩年前，一家五口便到了洛杉磯以東的大熊湖旅行，享受天倫樂。

林穎嫺的長子Teddy今年八歲，次女Michelle六歲，孻女Julie快將四歲。為免長子及次女說她偏心，她會一視同仁，賞罰分明。

家庭為重

九○年毅然放棄如日中天的演藝事業、到美國進修的林穎嫺，四年後畢業，最終還是選擇退出娛圈，定居美國。其後，她邂逅了從事會計工作的Tom Dupont，兩人於九九年結婚，○三年長子Teddy出世後，林穎嫺更全職做家庭主婦，專心相夫教子。

她憶述：「我一向都好有家庭觀念，好喜歡小朋友，當我喺美國讀書嘅時候，就發現外國嘅教育方法同香港好唔同，心諗第時自己嘅細路可以喺外國接受教育會係一件好事，於是就留低發展。如果我仲喺娛樂圈，可能我到依家都未有小朋友呢！」

林穎嫺恨做媽咪，婚後三年多仍無所出，於是便找醫生幫忙，以人工受孕的方法，成功懷有長子Teddy，兩年後再用Artificial Stimulation（人工刺激）的方法誕下次女Michelle，孻女Julie則是真真正正上天賜予的禮物。她愜意的說：「其實我未有Teddy之前，做過幾次test都話我身體正常，但可能係自己畀自己壓力，所以好難懷孕，最終都做咗人工受孕。呢個方法真係好辛苦o架，要自己喺肚臍打針，仲要唔係打一針喎，好驚o架！我揸住支針定咗好耐都唔敢郁，所以第二胎就唔敢再做人工受孕，於是做啲簡單嘅但成功率好低嘅方法，諗住有就有，冇就算，估唔到又成功咗。有一仔一女對我嚟講已經好滿足喇，最細個女係意外驚喜，真係上天賜嘅。」