i物

電子新寵　養 Phone狗

2012年07月04日 ~~ 第267期 Face

當年 Sony電子狗 AIBO玩人工智能技驚四座，但其後電子寵物唔係貴就係蠢，始終 hit唔起。如今 Bandai借 Phone還魂，推出用 iPhone做狗臉嘅「 Phone狗」 Smartpet。插住 iPhone就變身活潑電子狗，識得同主人互動聲控做動作；出街拎走電話，又可以喺 app入面餵佢食嘢玩遊戲，變化夠晒多。就睇吓電子狗搭 iPhone呢個組合能否再掀起電子寵物潮喇！

Spec.

對應手機： iPhone4S、 iPhone4、 iPhone3GS、 iPod Touch
使用電池： AA電× 3
售價：$960
查詢： JC Shop（ 3102 2783）

日本 iTunes至有 app

第一印象係佢安裝唔算難，只要用內附嘅狗仔頭 iPhone殼套上手機，並將手機裝上 Smartpet頭部，最後插入耳機線就完成安裝。跟住想狗仔郁就要喺 iPhone下載 Smartpet app，不過要喺日本 App Store先有，想玩記得申請個日本 iTunes帳戶。

包裝內附 3款殼，分別對應 iPhone 4/4S、 3GS、 iPod Touch，再舊啲嘅 3G就 update唔到 iOS，所以玩唔到。

狗身有條耳機線，要將佢插入 iPhone嘅耳機位先算連接完成。

喺日本 iTunes Store搜尋「 Smartpet」個 app就搵到，免費但就要用日本帳戶，填資料時記得喺 Google搵個合格嘅日本地址。

升呢學動作　聲控靠㗎文

只要開咗個 app，唔理佢隻狗都會周圍郁，驚佢周圍走就可以拉低個頭轉坐姿，隻狗仔只會左右搖頭，當擺設睇都幾開心。

只要喺手機開住個 app插住隻狗，「 Phone狗」就會自己周圍走，用手指捽吓佢塊面又會吠同打乞嚏。篤住佢個鼻打開操作 Menu，揀選 Trick模式仲可以用手勢或聲控叫佢做動作。狗仔會隨住同主人嘅親密度升級學到新動作。雖然聲控只對應日文，好彩入面嘅單字唔太難，例如「舒舒咩」係前進、「沙加呢」係後退，識基本 50音上網查吓都應該叫得郁。

Communication模式

兩隻狗可以進入 Communication模式一齊用狗吠聲 jam歌，同另一半一人一隻夠 sweet。

聲控模式

可以按 help重溫聲控指令，上網搵個 50音表對住嚟讀都唔難，愈短句子愈易認，「沙加呢」多數中，但試講「 Smartpet」嘅片假名拼音就十問九唔應。
Command 1：「舒媽托屁托」原地轉
Command 2：「舒舒咩」前進
Command 3：「沙加呢」後退

手控模式

要進入 Trick Mode先玩到，初頭都係學到前進同後退兩個動作，隻手掌掃落就行前、掃上就行後，有前鏡頭影住 scan到啲咩，唔難掌握距離。

拎走手機變他媽「狗」

原樣

拎走部手機一樣可以喺 app玩「 Phone狗」，佢餓要餵佢食嘢，無聊時可聽佢唱生日歌同玩音樂 mini game，似他媽歌池式電子寵物。試過唔理佢一排會變花面狗同生病，要幫佢沖涼餵藥。比較特別係換面功能，內置 8款 cutie狗面任換，仲可以影相變人頭狗，但只屬示範表情小遊戲，玩狗都要㩒番出去用原裝面至得。