姐姐有難
刻薄印傭 嫌 ex窮 40歲 Purple嬸嬸𡃁嫩草
Purple嬸嬸（李紫昕）近日被爆家住 1,800呎豪宅仍要迫印傭瞓廁所馬桶上面，更連環引爆分身撐自己同虛報年齡等笑料，「兒歌天后」突然紅爆高登同親子王國等討論區。
醜事愈揭愈多， 40歲扮 33歲，仍然單身的 Purple嬸嬸除咗鍾意講大話，更擅長數爆前度，曾在訪問中嫌棄男友冇錢送禮食軟飯，更講明一定要男友有樓揸手，講金唔講心。自稱次次都遇人不淑，本刊發現 Purple嬸嬸週日（ 1日）竟由 32歲的魔術師高正安接載離開公司。雖然新歡同 Purple三位前度一樣冇樓在手，但起碼夠細心又嫩口， Auntie Purple不妨諗諗！
新仔呵嬸嬸
揸 20幾萬福士 Golf嘅 Andy，細心開埋門畀 Purple上車，手上更一直揸住 Purple個袋同披肩，好細心啫！至於 Purple嬸嬸上車前，記者曾要求她出示身份證 show真實年齡，她卻一臉尷尬說：「吓？唔使喇！多謝關心！」邊似上車後笑晒口咁開心啫！
記者要求 Purple企定定影張相， Purple即自然地將手袋同披肩交畀嫩男 Andy， Andy亦即刻伸手接住，超有默契！
早前接受報章家訪的李紫昕，被踢爆在父母屋企洗手間訂造了一張「上格床」畀印傭 Lisa，事後立即被全城圍插刻薄唔人道，知衰 Purple亦急急解釋只係一場誤會，其實印傭另有睡房，但又隨即再被踢爆該房其實係 Purple自己間房，衰多鑊！
心情低落
於演藝學院主修舞台演技嘅 Andy（高正安），今年 32歲，除擔任 Purple姐姐節目嘉賓主持，又以 freelance身份周圍接魔術騷，每小時收費$2,200。 Andy又自稱曾在袁詠儀、吳君如子女嘅生日 party表演魔術。
解畫變大話，一直自稱 33歲的 Purple，更被爆虛報年齡，雖然聲稱 2000年才在香港大學畢業，主修日本研究，但有資料顯示她是 93-95年度港大校園電視的幹事，明顯為打入兒歌市場報細數，嬸嬸扮姐姐。
連番受打擊，「大話天后」雖然如常返新城開咪做節目，但明顯心情低落，上週五更刻意在節目尾聲真情剖白，「呢幾日有好多新聞，但好多謝身邊嘅人咁支持我，之前嘅事我要講都講晒，唔會再回應，希望件事可以快啲過去！」
猛男護花
舊相爆年齡
李紫昕中四時喺學校討論「電影三級制利弊」，而「三級制」喺 1988年推行，假設李 16歲讀中四，計一計數， 𠵱家起碼 40歲，呢張舊相又出賣咗佢喇！
成為網友攻擊對象， Purple嬸嬸週日鬼祟返新城開咪，放工時又由嘉賓主持兼魔術師高正安（ Andy）載走，唔知係想避開傳媒追訪，定想保護新戀情。當日 Purple於節目完結後立即同高一齊離開，本來貼住行的 2人，一見有記者即刻彈開，又行快幾步避鏡頭，後來見到 Purple被圍住採訪，男方索性跑去開車催女方上車，幫手解圍。
當記者問 Purple係咪有拖拍，一直表現淡定、對所有問題只答「唔回應喇，多謝關心！」的 Purple，突然超大反應解釋，「唔係男友，工作拍檔咋！」但高正安週一接受本刊電話訪問時，竟連講兩次「我哋冇嘢講！」，然後 cut線。既然男友已經 2 becomes 1代女友發言， Purple嬸嬸不如認咗佢當沖喜啦！
數臭前度
自爆拍過 3次拖的 Purple，今年曾接受雜誌訪問，數臭幾個前度食軟飯，更講到明冇樓揸手唔使旨意追佢。遇人不淑定完唱，你話呢？
男友一號： Purple同初戀男友拍拖 10年，但 Purple話期間一份生日禮物都未收過，連千幾蚊首飾都送唔起，去旅行又要自己出錢，貼仔買難受。
男友二號： Purple話第二名男友做金融，但曾經爭人 10幾萬要佢幫手還，分手時仲玩失蹤，毫無責任感。
男友三號：去年先分手的第三任男友，同 Purple拍拖初期冇工開，但後來搵到份好工就即刻狠撇女友，仲連 fb、 msn都 block埋！
愈講愈
刻薄姐姐事件一出， Purple嬸嬸最初仍然積極解畫，但解釋即係掩飾，更俾網友笑佢講嘢唔經大腦，搞到嬸嬸唔敢再拆彈，寧願封口龜縮。
《蘋果日報》圖片
迫姐姐交戲
「報道中的，是傭人姐姐的獨立洗手間及家人雜物房，並非所指工人房，因為傭人姐姐是有一間獨立睡房。」
迫印傭瞓廁所惹起公憤， Purple事後叫印傭瞓喺床上擺 pose影相，力證另有工人房，但有網友踢爆床邊衣櫃及床單花紋同 Purple早前喺微博貼嘅床照一模一樣，成功踢爆另一個大話！網上圖片
網上圖片
分身撐自己
Purple被指用另一個身份撐自己，又唔記得轉 account，成為全城笑柄，但佢其後話呢個 fb唔屬於佢，推得一乾二淨。
「我唔係好知呢件事，由星期一至今都冇上過網， facebook同微博都冇玩，呢件事對我好困擾。坦白講，我嘅私人 facebook唔用中文名，唔知係咪 fans開？」
Purple媽嫌棄共用廁所
身兼唱作兒歌天后，出書又做 DJ的李紫昕，形象夠晒鮮明，有唔少廣告商搵佢做代言吸引小朋友同家長客。搵落唔少，兩年前 Purple嬸嬸以 375萬買入將軍澳調景嶺都會駅 600呎單位自住。雖然屬圈中小富婆，但 Purple父母更有米，除自住的 1,800呎都會駅相連單位，又持有市值約 750萬的將軍澳蔚藍灣畔，共值 2,000多萬，多年來透過炒樓又賺了 1,023萬，偏偏 Purple媽被女兒篤爆因嫌棄同印傭共用洗手間，而迫對方瞓廁所！本刊致電 Purple父母，但至截稿時仍未有人接聽。
Purple𠵱家獨居於調景嶺都會駅 600呎自置物業，而父母就買咗同座樓上兩個單位，打通成 1,800呎大宅。
媽咪精於炒樓炒股， Purple（紅圈）亦曾透露當年係媽媽迫佢買樓儲錢。
留言列表
{{ article.title }}
