《貞子3D》就由石原里美配花樣靚男瀨戶康史，講里美飾演嘅女教師，因學生無故死亡，為追查死因，搵埋男朋友康史一齊尋真相，點知被貞子嚇到鼻哥窿都冇肉。
日本經典恐怖片《午夜凶鈴》，其中一幕女鬼貞子爬出電視機嚇人場面，曾經搞到好多觀眾唔敢睇電視。
事隔13年，貞子復活拍成電影《貞子3D》再嚇鬼，話晒時代變晒，貞子嚇人橋都要update，以往貞子就用錄影帶散播毒咒，家陣變成用網上online短片同智能手機做殺人工具，而且仲會爬出LCD大電視纏住你，無論科技幾先進，都一樣可以嚇死你！
《貞子3D》上映日期：6月14日

 
日本鬼片王《午夜凶鈴》，99年於香港上映，曾創下3,100萬港元票房，至今依然企硬，成為香港最高票房日本電影，更曾掀起一片「貞子熱潮」。今年貞子將變成二次創作，由佢孭飛的《貞子3D》電影，已於5月12日在日本上畫，至今票房已突破10億日圓（約1億港元），電影公司大有信心，隨時破《午夜凶鈴》曾創下25億日圓票房紀錄。

網上毒片
舊版講一班人睇咗盒毒咒錄影帶後離奇死亡，但因錄影帶已out到七彩，新版詛咒形式，將由錄影帶變網上短片，話說貞子嘅死亡毒咒影片在網上瘋傳，大批好奇網友睇完後離奇死亡，而石原里美飾演嘅高中女教師，亦因一名學生突然暴斃，最後因插手查案而睇咗段毒咒影片，點知被死神玩謝。成套戲重心一句講晒「衰八卦」。


《午夜凶鈴》貞子用錄影帶散播毒咒，而《貞子3D》係講現代發生嘅故事，今次貞子就利用互聯網，將毒咒影片放上網任睇，吸引唔少用智能手機學生妹好奇睇片，點知就中招，仲引致殺身之禍！

死神來電
每次拍親鬼片，梗有邪嘢出現，而主角石原里美，在拍戲期間亦疑似撞邪，試過一次於埋位前明明所有人已關掉手機，但拍攝期間卻突然有電話響起，嚇到全廠人以為死神急call無人敢出聲，事後里美話：「嗰晚返屋企後，驚到成晚瞓唔着，仲唔敢聽電話。」講到電話響就好似「午夜凶鈴」咁，咁似收到候任特首辦羅范凶鈴嘅！

驚足2個月
《貞子3D》將於6月14日殺入香港，而玩懸疑嘅《神探愛倫坡：黑鴉兇殺案》，同貞子同日上畫嚇鬼，至於由哈仔Daniel Radcliffe《黑衣凶靈》已於上週四（5月24日）搶先出閘，真係由5月驚到6月。


講Daniel飾演嘅律師，處理一古老大宅主人身後事期間，出現小童連環被殺案，經Daniel追查後，發現原來同一個神秘黑衣女人嘅惡咒有關，為咗搵真相，差啲連命都冇。Daniel拍完《哈利波特》系列後，轉型做鬼片王，唔知哈仔fans仲buy唔buy呢？《黑衣凶靈》上映日期：5月24日


電影以19世紀做背景，講一連環殺手做案手法跟一偵探小說的情節一樣，偵探搵咗該小說作家一齊查案，阻止下一個殺人事件發生。套戲唔只sell血腥，而且大玩懸疑，同《福爾摩斯》一樣勁刺激。《神探愛倫坡：黑鴉兇殺案》上映日期：6月14日 ####

 


1999
13年前嘅《午夜凶鈴》中，主角菜菜子攬住被困井內多年嘅貞子屍骨場面已睇到毛管戙；而貞子從電視爬出嚟嚇人嘅一幕，曾經嚇到唔少人唔敢開電視。


2012
以前貞子從部成呎厚嘅舊式電視爬出嚟，13年後，貞子都要追貼潮流，今次就專揀最新LCD平面電視爬出嚟尋仇。


iPhone播毒
貞子利用網絡散播毒咒，iPhone隨時隨地可以上網，變成貞子嘅殺人工具。


魚缸浸死好多人亦因為睇咗貞子嘅毒咒影片，而慘遭橫禍，而死因各有不同，呢位大哥就無故心臟病發，最後暈倒，頭浸魚缸而慘死。


學生跳樓而呢位學生妹，中咗貞子毒咒後，好似被鬼迷咁日光日白行上天台跳樓，睇見都心寒。


貨車直撞中咗毒咒，必死無疑，就算行出街，亦會被大貨車兜頭撞到粉身碎骨，可以想像吓死狀幾咁恐怖。


超萌貞子新一代貞子由演過《告白》學生妹嘅17歲橋本愛演出，但橋本愛咁萌又kawaii，驚嚇度真係跌晒watt喎！


3D宣傳《貞子3D》已於5月12日喺日本公映，早前貞子嘅「3D」宣傳專車就喺東京周圍兜，如果夜晚見到個巨型貞子伸手鍊人，咪話唔驚。



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄