面對面 打開網絡百科全書，薛凱琪的8年娛樂圈生涯真正豐富得像匹布，做過新人王、拍過賣座片、四台冠軍歌曲多的是、年度女歌手獎連年入五強，10年一部《分手說愛你》連越南影后都當過……
對不起，惟獨沒開過賣票演唱會。
7月終於得償所願在紅館開兩場個唱，薛凱琪說，一直沒法開個唱，原因是：「開一次演唱會要推半年job，屋企得我一個賺錢，我唔可以做吓停吓。」
立定決心在8月的32歲生日前讓夢想成真，則因為：「再唔唱把聲老啦，我唔想用把老聲去唱〈奇洛李維斯回信〉。」
唱片封套賣她是個《Funny Girl》不代表她真的就無憂無慮，報紙雜誌寫她從小讀國際學校也不代表她真的就是千金小姐……
8年來，薛凱琪第一次承認自己怕老也怕窮，不過，她不怕再跌倒：「因為一場病，成就咗一個better me。」

金裝＝盛女
31歲的薛凱琪雖然已屆剩女年齡， 感情生活看似精采，緋聞對象長年糾纏的有房祖名、方大同、郭品超， 澳門賭場高層「黑」顏知己，最近又被拍到與音樂人湯駿業當街親熱。
薛凱琪一次又一次否認，這些人裏沒一個是男朋友。
「4年前真正拍拖嘅前男友，從來就冇被人影到過，湯駿業？識佢嘅人就知我哋冇可能……其實我工作咁忙， 幾年冇放過假，點識男仔點拍拖？我享受工作，但係我不停工作都係因為根本唔停得。
屋企得我一個女，我有負擔，要養起全家，父母又退休，我停咗爹哋媽咪點算？我一出道就俾人報道我係讀國際學校、住豪宅，人人覺得我係有錢女，唔憂做……我冇所謂人哋點諗我，可以講嘅係，我搏殺期仲有排都未完， 因為屋企唔容許我推job、唔容許我做吓停吓。阿媽都同我講過一次，早知佢一係唔生、 一係就生個家姐或者阿哥畀我，佢哋知我辛苦，好驚我第時冇人照顧……人哋點睇我冇用， hard sell自己係等錢使、孝順女好老土，我都好想拍啲藝術實驗電影，但係我同公司講我唔介意忙，我真係需要忙。為咗今次紅館騷，我推咗半年戲同job，嗰度又係一筆錢，一做完個唱， 又要嗱嗱聲接番job追番啲錢……今次我真係覺得唔等得，我唔想把聲愈嚟愈老， 我要用把老聲去唱〈奇洛李維斯回信〉。」

死亡＝筆記
一出道就被包裝成小公主，賣funny、賣幸福，事實上薛凱琪入行前家庭經濟就已經遇上問題，要半工讀做model養活自己。明明樣樣不順心還要人前扮開心，08年終於患上抑鬱症，暴瘦又尋死。 「我平均體重103磅，最瘦嗰陣時剩番85磅，每晚要食三粒半安眠藥至瞓得着。 同溝酒飲嘅道理一樣，一粒兩粒安眠藥搞唔掂，醫生於是開四隻唔同款嘅撞畀我幫我瞓。係就係瞓到啦，但一瞓就瞓16粒鐘，瞓醒就吽到不似人形。我真係好想死，但係我信基督教， 就算唔怕落地獄都驚神唔鍾意，於是同神捉字蚤。我成日祈禱同神講， 神呀，你一係就快啲醫番好我，如果唔係我繼續瘦落去遲早虛弱死，你都唔怪得我。或者我唔食藥、食完藥又唔吸收嘔番晒出嚟，我都唔算自殺㗎！我仲記得有日《人間喜劇》拍街景，同事打緊燈， 我就企喺兩條電車路之間一路等埋位一路諗，我𠵱家企得咁埋又咁虛弱，架電車行埋嚟我咁啱抽搐企唔穩跌落路軌， 都唔算得係自殺㗎……我睇住架電車愈行愈埋，諗到正出神，同事大嗌：「喂……薛凱琪……有車呀，返埋嚟啦！……」 仲有好多次，我特登用酒送安眠藥，唔會增加分量，淨係博一鋪我80幾磅人頂唔頂得順，死得就最好，死唔去咪起身返工囉……諗真啲，我死咗，咁我老豆老母點呀？幫我搞葬禮呀？ 人有責任㗎，一出世個身體其實就唔係只屬於自己，我已經夠衰，更衰就係唔理身邊人感受。 我行到落嚟好慶幸身邊有啲人，當我自己覺得自己係乞兒嘅時候，係佢哋話畀我聽我係公主。每個人生命中都有呢個人。」

人在＝高處
薛凱琪說，最低潮時，是方大同和另一個同樣從抑鬱症裏走出來的圈中人說服她生存下去。
是哪個圈中人，不便透露；至於方大同，薛凱琪說兩個常常徹夜詳談，談話內容兩成是工作、八成是神。
「係囉，點解同大同撻唔着呢？曾經有段時間，我好驚呢個世界，美好嘅嘢太少，當我遇到一個好男人，總覺得太美好太驚失去。
𠵱家，勇敢好多，好嘅唔敢要、壞嘅唔想要，咁咪一世都唔使愛。不過sorry，都唔係方大同。
嗰段唔好嘅經歷，其實幫助咗我好多，𠵱家嘅我就好似喺山頂上面睇所有嘢一樣，所有觀點都有所改變。
冇錯，冇人知上一次係唔係最壞，更加唔知更壞嘅事係唔係會發生、會幾時發生。你諗吓，你每日擔心十年後， 咪浪費咗十年囉……下次再有壞事情發生，我會慶幸佢唔係我人生裏邊第一個大打擊，我唔係講習慣消極，而係你會明白， 人生就係會有起跌，that's life。當然，呢個世界有啲人一世好彩，永遠唔會遇上大風波，但係佢比其他人心裏少一層嘢， 天唔會咁殘忍安排苦痛畀你受，佢嘅安排係畀你喺苦痛當中上到一課。我自己覺得，有啲嘢必然會發生，你得兩個選擇， 好好咁利用佢，令自己好啲，令別人好啲，每樣最唔好嘅嘢都可以有最美好一面。


嗰段要生要死嘅過去，𠵱家可以笑住講，我真係好慶幸。打個比喻，人嘅情緒起落由冇上冇落嘅零，最開心係10， 最唔開心係負十，喺最低潮時，你可以選擇停留喺嗰一刻，或者徹徹底底咁走出嘅。既然選擇咗走出嚟繼續生存， 你會選擇日日食飯瞓覺得過且過，定還是更識愛、識得快樂，識得改變人，活得更有意義呢？」

藉着涼瓜說愛你
8年以來訪問薛凱琪五次，該問的都問了、能說的都說了，薛凱琪每一次訪問都放開了一點，同時，還是再保留一點。這一次談得興起時說到感情，她突然沉默轉過頭看正在扒飯盒的助手：「你食緊咩呀？涼瓜飯？畀嚿涼瓜我吖！」好一招藉着涼瓜攤凍話題：「有啲人擁有過再失去，怨天怨地話嬲到想爆粗…… 咁佢至少擁有過呀！有啲人搵咗一世都搵唔到，都想爆粗囉……」 8年來看着薛凱琪長大，下次見面，我希望你找到了那一個，而不是找到盒涼瓜飯。 ####


 


08年與王祖藍在電車路上拍攝《人間喜劇》時，正受抑鬱症煎熬：「諗過跌落電車路被車死。」


04年出道，一首〈奇洛李維斯回信〉唱得街知巷聞，薛凱琪說從23歲等到31歲終於開個唱：「再等把聲老啦！」


父親破產又身體不適，父母也已分開多年，愛報喜不報憂的薛凱琪說不願多談。《忽然1周》圖片


2010年的《分手說愛你》，為薛凱琪奪得越南影展及香港演藝人協會評選的影后殊榮。


7月8日，薛凱琪將在紅館舉行一連兩場《filicious》個人演唱會：「只係緊張又多嘢諗，但今次唔使睇醫生，我真係好番。」


最新動向是被拍到與音樂人湯駿業夜店門外親熱，薛凱琪說識湯駿業嘅人都知冇可能！大家知乜事！《壹週刊》圖片


與方大同共度不少時艱、又常被拍到行街食飯，仍然堅稱二人冇可能。


入行不久即與房祖名傳緋聞，薛凱琪至今死口唔認二人拍過拖。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄