兩個人彈一支，慳番！

85年組成嘅太極樂隊，上周五（4日）喺紅館開咗場《Back Of The Town演唱會》，太極七子真係算有face，譚詠麟、草蜢、蘇永康、許志安等都嚟晒做嘉賓，就連唔捱得夜嘅林子祥（阿Lam）都俾面上台撐佢哋。阿Lam仲話好鍾意同佢哋唱歌，「因為佢哋好大聲，我聾㗎嘛……好多謝佢哋俾我第一個（嘉賓）出嚟！」主音雷有暉就笑住話：「我知你好早瞓吖嘛！」


演唱會中途，發生一段小插曲。太極同Mr.、Rubber Band齊齊jam歌時，Rubber Band嘅阿正彈彈吓結他，發覺冇聲，即時向Joey Tang（鄧建明）求救。呢位音樂教父二話不說將自己支結他俾咗佢，自己就拎支壞嘅落台俾工作人員，之後佢同阿正就表演兩個人一齊彈一支結他，直頭功架盡現。嚟捧場嘅伍詠薇、劉美君呢，high到有位都唔坐，企足全場吶喊。伍姑娘仲趁混亂時衝咗出去想同太極握手 ，點知跑得慢，就俾實Q姐姐趕返埋位。唔緊要，半年內會開Part 2㗎。伍姑娘，練跑呀！

驚嚇君如
當晚播出N年前嘅《紅色跑車》MV，吳君如係MV嘅女主角，化咗一個粗眉濃妝，依家睇番真係笑死！就連佢喺預錄片段中都忍唔住話：「拍呢個MV係我嘅童年陰影！」


阿倫笑七年無上台嘅雷有曜（小圓圖）表現唔自然：「好似唔關你事咁！」而佢就high到企上欄杆同歌迷jam歌唔願走（右圖），唔知仲以為係「校長」開show㖭。


林子祥其實都係夾band出身，呢晚捱眼瞓jam歌，依然興奮到暈！

伍姑娘咗！
high爆嘅伍姑娘想衝上台前握手，可惜俾實Q截住，惟有住走返轉頭。 ####


Joey Tang知道Rubber Band嘅阿正支結他壞咗，即刻轉身俾自己嗰支佢彈住先。然後二人一結他，繼續表演。呢啲咪前輩囉！

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄