痛到入心牀上的高鈞賢坐得耐都要轉吓姿勢，見佢用手抬起受傷的右腳時面露痛苦表情。

無綫鬧小生荒之下，不少二線小生花旦都大有機會上位，其中高鈞賢繼早前於《盛世仁傑》飾演鄭則士兒子狄光遠後，近日再接三劇，向一線小生進發。不過高鈞賢周日（6日）打籃球意外拉斷小腿筋，即晚送院打石膏。由於傷勢嚴重，還要做駁筋手術。本周一（7日）本刊直擊高鈞賢轉院過程，他直言：「好唔開心，依家行唔到，好驚變跛佬，仲影響晒拍劇進度……真係唔好意思。」看來他擔心自己變跛之餘，更擔心自己冇工開。  

 
27歲港男高鈞賢05年當選後，演出機會雖多，但大多做閒角行行企企。隨住王維基踩入電視圈搶人，無綫小生買少見少。去年開始，高鈞賢未停過拍劇，今年初先後拍住胡杏兒、周麗淇等人演出《耀舞長安》和《女警愛作戰》，近日更連接三劇。據無綫幕後工作人員透露：「好多監製都鍾意用高鈞賢，貪佢外形唔錯，聽話又準時。佢都撈咗７年，演技成熟咗唔少。」

做手術駁筋
上周仍在長洲為新劇《情越海岸線》開工的高鈞賢，周日晚（６日）到柴灣參加籃球比賽時，意外整斷小腿腳筋。記者周一（7日）早上致電高鈞賢，他講述當晚受傷經過：「我跑跑吓右腳突然好痛，跟住已經跑唔郁。嗰時十一點幾，惟有去公立醫院輪急症。醫生話我係小腿筋斷咗，要開刀做手術駁番。我好唔開心，依家行唔到，好驚變跛佬。唉！我15歲開始做part time，未試過停咁耐工！」高鈞賢周日（6日）晚入住將軍澳醫院的四人房，本周一中午記者去醫院探訪，看見滿面鬚根的他，右腳打了石膏，正在牀上看書，其後他落牀刷牙，腳痛得不時發出呻吟聲。至下午4時許，他轉到九龍城聖德肋撒醫院留醫，準備本周三（9日）做手術。據知高鈞賢手術後最少要休養3個月才可落地行，換言之他一定要全面停工。他現時手頭上的三套劇分別為梁材遠監製的《情越海岸線》、梁家樹監製的《法網狙擊》和處境劇《愛．回家》，而最受影響的，就是與黃浩然、陳茵媺合作的《情越海岸線》。停工令高鈞賢非常擔憂，「已經拍咗十幾日，今次實換人啦！我覺得好唔好意思，影響到劇集嘅拍攝進度，希望可以快啲復工啦！」

監製證實易角
對於高鈞賢斷腳筋令新劇受影響，《情》劇監製梁材遠表示：「高鈞賢喺劇中飾演有錢仔，佢係一條好重要嘅線，影響係有，不過我哋應付到。佢話最快要等幾個禮拜，套劇真係唔等得，依家物色緊人選易角，要重拍佢啲戲。」易角已成事實，高鈞賢大可安心休養啦！

微博say sorry!
高鈞賢出事後深感悔疚，除了因傷要掛靴最少9個月外，已開拍的兩套劇集《情越海岸線》及《法網狙擊》更要臨時易角。高鈞賢本周二（8日）在微博中向劇組say sorry。搞到咁大鑊，佢都唔想，希望佢快啲好番啦！


####

 


刷牙 睇書本周一（7日）中午，記者到訪將軍澳醫院，高鈞賢跛住腳跳埋洗手盆刷牙（上圖），再返上牀睇書打發時間。事後問佢點解冇屋企人照顧，佢話父母正出外旅遊。


停賽一年一屋都係籃球獎牌的高鈞賢向來熱愛打波，可惜未來一年高生都唔可以掂籃球喇！


阿姐護送下午四時半，高鈞賢執番靚個樣，換上短袖T恤和短褲，在友人陪同和兩位醫院阿姐護送下，離開將軍澳醫院。


單腳跳上車高鈞賢話晒都係明星，保險公司經紀朋友親自開車前來接他轉院。唔使友人出手，高鈞賢單腳用力跳上車，力的表現。


愁坐輪椅去到九龍城聖德肋撒醫院，不良於行嘅高鈞賢只好坐輪椅到登記櫃位登記。


戴口罩上房登記完，保險經紀朋友先行一步離開，留下跛腳高鈞賢由阿姐推上房休息，為免被認出，高鈞賢戴番個口罩。


女友擔心據知高鈞賢出事後，第一個就通知緋聞女友葉翠翠。翠翠本周二回應：「我知佢入咗院，我都有安慰佢，叫佢好好休息。（會唔會去探佢？）呢啲我哋自己知就得啦，希望佢快啲好番。」


新劇《情越海岸線》中，高鈞賢與沈卓盈飾演未婚夫婦，因為他佔戲不少，故監製需易角重新拍攝。


高鈞賢在另一新劇《法網狙擊》，與陳煒做兩姊弟，因為未拍到高鈞賢的戲份，所以影響較小，不過高鈞賢錯過咗一個大好機會喇！

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄