26歲，身高5呎10吋嘅宋仲基，唔只面部皮膚白滑，連手臂都白雪雪，唔怪得個朵叫「牛奶仔」，即皮膚好似牛奶白滑。

上週2PM同Super Junior兩隊猛男組合強攻港澳，令一班港女睇肌肉睇到飽晒。壯男睇到滯？不如改吓口味追捧白淨又斯文的花樣美男。
呢期最hit嘅韓國花樣男，一定係家無綫J2台播緊的韓劇《成均館緋聞》男主角宋仲基，特徵係單眼皮cute爆，最煞食皮膚白滑似女人，仲出埋書教護膚秘訣。港女唔只冧爆，簡直要學嘢添啦！


今年26歲的宋仲基，官仔骨骨的他，畢業於韓國名校成均館大學的企業管理學系，由於青靚白淨，當時已被封為校草，大學畢業後即投身演藝界。

扮富二代上位
出道4年的宋仲基，拍戲、拍劇仲做埋主持，前年憑古裝劇《成均館緋聞》走紅，戲中仲基飾演靚仔又玩得的富二代具龍河，引死班韓妹，而仲基最大賣點係白滑到近乎完美的肌膚，上年仲出埋書《美膚男大作戰》傳授美肌心得賺埋錢。

出書教護膚
上年出書《美膚男大作戰》傳授護膚心得，據稱該書嘅韓文版及中文版合共銷量高達20萬本，名利雙贏。

美肌生招牌
出名皮膚靚到跣手嘅宋仲基，上年被韓國護膚品牌Tonymoly睇中做代言，據稱自仲基做生招牌後，該公司業績勁升一成，真係招財貓。

有基味
代表作《成均館緋聞》中，飾演聰明又玩得嘅書生，跟同學劉亞仁玩起上嚟可以攬到實，有啲基味喎！

日飲2杯橙汁
天生皮膚靚的仲基，強調後天保養更加重要，佢話首要條件一定要揀到一隻適合自己皮膚嘅面膜同潤膚液，而仲基自己的美膚習慣、飲食方面就係少食煎炸食物；每日飲兩杯橙汁，既可清腸胃，又可增加維他命C；至於護膚方面，每晚一沖完涼即要全身塗滿潤膚液；而洗面後切忌大力抹面，要用毛巾輕力印乾，防止毛孔變大。扮靚唔只係女人，甚至係花樣男宋仲基終生事業，花咁多心機扮靚，難怪最近韓國綜藝節目《Section TV演藝通訊》搞「完美男星選舉」，仲基打低SJ嘅始源同李準基成為no.1。

玩姊弟戀
26歲嘅仲基，上年尾同大佢4年嘅韓藝瑟合演電影《賺錢羅曼史》，戲中飾演窮鬼嘅仲基，同慳妹韓藝瑟搞姊弟戀。

喊住離場
一直拍劇同拍戲，2010年仲做埋《Running Man》主播，但上年因忙於拍戲，最後被迫辭退做《Running Man》主持，主持最後一集時仲喊晒口同觀眾道別。

做模都掂
清純美男形象入晒屋嘅仲基，間中都會做吓模特兒影硬照，早前就攞埋《亞洲模特兒選舉》嘅「時尚明星獎」。

當旺牛奶仔
宋仲基白滑肌膚靚過女人，其實韓國大把男星都係美肌男，好似2PM最靚仔嘅Nichkhun同《花樣男子》男主角金賢重，啲皮膚靚到做護膚品代言人。

剝殼蛋　Nichkhun
2PM最紅隊員Nichkhun嘅護膚秘訣，盡量避免用熱水洗面，避免毛孔擴大，而飲食方面，則每晚飲熱鮮奶，可使皮膚更加滋潤。

美白男　金賢重
出名青靚白淨嘅金賢重，主要護膚心得係跳舞跳出一身汗，可助排出體內毒素，待沖完涼後要用凍水洗面將毛孔收縮，可使面部肌膚更滑手。金賢重唔只係THE FACESHOP護膚品代言人，更曾為Tonymoly做生招牌，但該產品面膜，曾被台灣爆出含有雙氧水，被傳用後會損害皮膚。 ####


Nichkhun上年開始為男性用品品牌「it's skin」做生招牌。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄