41歲童顏師奶
我好易養！真實對白

近期電視台挖角潮，搞到TVB慌失失，連亞視棄將都成目標，前亞姐更是TVB頭號對象。先有96年冠軍陳煒最近高調過檔，參與重頭劇《金枝貳》，可是出動到樂易玲去游說的索腿「馬小玲」萬綺雯，竟然請TVB吃閉門羮。
原來98年憑《我和殭屍有個約會》短裙晒42吋長腿一炮而紅的萬綺雯，十幾年前已拒絕過無綫，如今愛hea過養尊處優生活保童顏的她，更加話之你。


王維基的「城市電訊」新電視台去年展開挖角潮，無綫成重災區，在缺乏演員的危急關頭下，決定向亞視演員招手，首要是甚得觀眾緣的幾位前亞姐如陳煒、萬綺雯等。今年初TVB高層樂易玲更親自出馬，十級誠意請41歲萬綺雯（蚊蚊）出山加盟，豈料蚊蚊依然唔睬無綫。

撬足14年
89年亞姐亞軍萬綺雯，98年在亞視劇《我和殭屍有個約會》飾馬小玲跑出，據知情人士透露：「當年TVB已秘密接觸蚊蚊，不過蚊蚊竟然用自己懶做理由，拒絕無綫好意；幾年後無綫又再搵佢，佢都唔肯過檔。」08年離開亞視後轉戰內地，3年內演過3齣舞台劇，去年12月演完《撒嬌女王》後回港休息。跟她友好及已過檔無綫的陳煒，表示兩個月前聯絡過對方：「蚊蚊講過因為做完內地巡迴舞台劇想唞吓，我諗佢唔係咁懶嘅！」

「食素好易養」
上週四（8日）本刊記者巧遇深居簡出的蚊蚊，就問佢挖角一事，她只輕輕帶過：「暫時全部都係好初步咁傾，暫時未有嘢可以講住，（陳生會否好大壓力？你唞咗咁耐？）佢冇大壓力，佢成日都話我好易養，我又食素。」而蚊蚊老公陳十三（陳耀輝）則在電話回應：「佢（蚊蚊）暫時冇工作，佢怕得罪人唔敢亂講嘢，每間（電視台）都有合作機會嘅。（係咪懶所以唔過TVB？）懶又唔可以咁講，係就唔會上大陸做嘢啦。」唔通人仔真係咁好賺？TVB要出手闊綽啲至得喇！

過檔陳煒賣口乖：TVB係紮實啲
萬綺雯hea爆避世，剛簽約TVB的38歲前亞姐陳煒則非常活躍，有份拍《金枝貳》之餘更頻頻上《五覺大戰》、《玄美人生》等綜藝節目，樹大好遮蔭果然唔同啲！上週二（6日）陳煒對本刊記者表示，無綫及王維基都有接觸過她，最終選擇了TVB：「我5年冇拍劇喇，最初係TVB嘅監製文偉鴻搵我，佢話4月開套時裝劇，一睇個角色就諗起我，所以搵我過去。我考慮過覺得TVB係紮實啲，王維基嗰個始終係新台，所以揀咗無綫。（TVB重金挖你？）價錢唔好講，合理滿意啦！」陳煒出山，繼續避緊世嘅萬綺雯仲要諗咩呢？ ####


19歲亞姐驚艷
萬綺雯19歲選亞姐，當年皮膚白滑，但baby fat，結果輸畀翁虹得亞軍。


27歲長腿最索
41歲童顏萬綺雯上週四（8日）不施脂粉出現旺角，跟14年前的索腿「馬小玲」（圖）相比，雖然keep得算好但都有點師奶味！她表示：「暫時冇諗（拍劇）住。（演話劇）辛苦呀！諗住返嚟休息。」《蘋果日報》圖片


08年同老公以420萬在西貢買入全幢物業，現市值達950萬，都幾富貴！


近年在內地發展的萬綺雯，依然靠騷42吋長腿拍廣告搵食，又演出過3齣舞台劇。


四圍遊


2千年同編劇陳耀輝（陳十三）閃婚，萬綺雯8年後便離開亞視做少奶奶，不肯過檔無綫，網上見她不時與老公開心遊埠，hea到極。


萬綺雯與傭人到旺角帶貓貓睇醫生，未生過BB又食齋的她身材消瘦。


曾貴為亞視icon的陳煒一簽約TVB即勁忙，新節目《五覺大戰》都預埋佢玩，又成晚表現勁high好專業。


攞到TVB新證，陳煒即興奮地在微博寫：「我張職員咭（卡）辦到了！」


拖手行陳煒老公顏志行經營台灣上市公司，經常港台兩邊飛，難得本月3日在港陪老婆睇林憶蓮演唱會，2人拖手入場，非常甜蜜。


調皮打紅館外有人向陳煒兜售螢光棒，陳煒調皮用螢光棒輕打老公額頭。


加入無綫大家庭後，陳煒即接拍《金枝慾孽2》，雖然只屬客串，但話晒係重頭劇，呢鋪明益陳煒。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄