自與何超雲拍拖，陳山聰一直向無綫請假至今。歐遊三個月，齋玩唔做嘢，「潮山聰」變咗「肥山聰」。
Hea慣陳山聰唔想俾人話游手好閒，加上三太開腔力撐：「山聰人品ok，信得過阿女眼光。」於是早前他孖住超雲與無綫高層樂易玲食飯傾前途，之後更落實拍李添勝監製的新劇《天梯》。
不過《天梯》開拍半個月，全劇演員已埋位，但陳山聰復工之日一拖再拖。本刊收到消息，陳山聰本於周二（11日）復工，但當日他以私人理由再向劇組請假，搞到臨時要轉場口，更激嬲埋主角陳豪及黃德斌。繼早前自稱醉酒打電話俾伍詠薇要求絕交惹禍後，陳山聰今次又玩嘢！


陳山聰與何超雲拍拖半年，hea足半年，今年4月甩底古裝劇《回到三國》，被揭發為了與超雲去歐遊後。早前又自稱與友人飲酒玩Truth or Dare遊戲，醉酒後打電話俾伍詠薇要求絕交，激嬲埋契姐。35歲的陳山聰究竟幾時先唔再遊戲人間呢？
幾乎日日微博晒恩愛，全面停工的陳山聰，早前叫超雲出面相約樂易玲食飯。賭王千金開到聲，樂小姐當然俾足面，未幾陳山聰亦落實有份參演新劇《天梯》。監製李添勝仲話角色專為陳山聰度身定做，重視程度比男主角陳豪有過之而無不及。
《天梯》開拍半個月，劇中主要演員包括陳豪、陳茵媺、張可頤、黃德斌、張國強等全部都已開工，唯獨陳山聰仲未見影。記者致電監製添哥，他直認山聰未埋位：「套劇係開咗半個月，的確個個都開晒工，不過山聰就仲未見人。佢啲期係點我都唔理得咁多，都係一樣咁拍啦！（係咪高層有命令凡事要就晒陳山聰呀？）呢啲嘢我唔理喇！」添哥言語間似乎有所暗示。

10月11日　石礦場外景

男角齊表態
新劇《天梯》開拍半個月，劇中演員對陳山聰話復工又冇影都唔敢多講，不過陳豪與黃德斌都承認場口成日改。與山聰唔熟的徐榮則表示：「之前試造型我有見過山聰，但佢唔同我打招呼喎！」

私人理由請假
陳山聰本來周二（11日）返無綫首日復工，在電視城內的民初街取景，但周一晚劇組人員收到佢通知要請假。知情者透露：「有高層下令，劇組上下都知要遷就陳山聰。本來星期二嗰場戲有佢份，但佢突然以私人理由話唔開得工住。都唔係第一次啦，其實山聰喺《天梯》戲份唔算太多，主要都係拍住陳豪，所以佢一唔現身，就會郁到陳豪啲場口，要成組調走嚟遷就佢，總之搞到所有場口亂晒啦！個個演員都話佢未開工就帶來咁多麻煩，就連安排臨記啲時間都亂晒。星期二嗰日佢冇開工，劇組要飛走佢啲戲跳拍囉！」
因為陳山聰請假，本周二《天梯》的外景改在石礦場拍攝。記者所見，陳豪、黃德斌成班男人雖然大汗疊細汗，但現場氣氛不錯。對於因為陳山聰唔開工而要改場口，男主角陳豪似有難言之隱，他說：「對我嚟講拍邊場先冇乜所謂，反正場口成日都會改，最緊要有工開，哈哈！（但係大家要遷就陳山聰喎。）有冇佢都一樣咁拍啦！」黃德斌亦若有所指：「我依家唔會問定過兩日開乜，總之我今日收聽日order就得，反正一早問定下星期拍乜，到時都唔係嗰回事。」
陳山聰雖然一直冇影，但添哥向本刊記者表示，有信心他會於本周四（13日）的開鏡拜神儀式上出現。山聰動唔動身，都要睇佢當日有冇心情，添哥都係唔好抱咁大希望。

Hea 足半年
自4月辭演《回到三國》後，陳山聰隨即與何超雲去歐遊，其間不斷上微博晒幸福。嘆足三個月後凱旋回歸，陳山聰衫都唔換即去三太屋企，與賭王共晉晚餐。其後超雲出席的公開活動，差不多次次都由陳山聰傍住出席，親身力證何家準女婿地位。 ####


心廣體胖
陳山聰半年冇工開，但依然身光頸靚，不時着透視裝示人，食好住好心廣體胖。藝人上鏡忌肥，睇嚟佢復工前都要修身先。


壽辰晒恩愛
陳山聰10月2日35歲生日，何超雲連日在微博公開與男友慶祝，除了悉心打扮食生日飯外，仲自製蛋糕冧男友。


樂大媽撐腰
今年8月尾，超雲與陳山聰相約樂易玲到銅鑼灣的高級意大利餐廳食飯，摸完酒杯底，三人行出門口任影。樂小姐仲叫陳山聰以後俾心機拍劇，真係做騷咁做。《蘋果日報》圖片


據知陳山聰遲遲唔開工，其中一個原因係怕在電視城撞見主持《變身男女chok chok chok》嘅契姐伍詠薇。


本周二（11日），因陳山聰冇到，《天梯》改在藍田石礦場拍外景，當日整天下大雨，眾人匿在一間破廟內拍攝。


飾演鄉下佬的陳豪與黃德斌，在廟內焗到成身大汗，再加埋十幾個老臨逼埋喺間屋入面，可想而知有幾臭？好彩呢日全男班，女主角陳茵媺因為陳山聰唔開工而唔使拍咋！


復工前一日，陳山聰通知劇組要請假，劇組即改通告，周二貼在化妝間內的演員拍攝時間表上沒有陳山聰的名字。


陳豪：冇佢都係咁拍。（真實對白）


黃德斌：場口成日都改。（真實對白）


徐榮：佢唔同我打招呼。（真實對白）


對於陳山聰復工之期一改再改，監製李添勝冇正面回應，佢只係話：「陳山聰嘅角色好囂張，同佢依家個形象好合襯。」


賭王一家親


傍實女友


微博晒恩愛

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄