三菱 i-MiEV 零排放誘慳妹 @ 娛樂八掛大放送★

依家呢個環保年代，抹嘴用多張紙巾都畀人鬧，有車階級日日燒油，簡直就係同地球過唔去！近日電動車勢頭強勁，用電平過電油，仲係零污染，確實達到環保目的，所以即使現時充電設施仲未完善，三菱（Mitsubishi）i-MiEV已引得模特兒Sansu心癢癢！

售價：$395,000

新牌仔好啱揸！

早年電視劇有「慳妹」角色，對日常開支都精打細算，而Sansu就正正係慳家一族。早前佢考到車牌後準備買車，計完數之後，發覺最大嘅開支係油費，事關佢每日都要來回上水同旺角之間，兩程共約80公里，以一部1.5公升私家車約$1.2/km，開支真係好襟計。後來佢見三菱有電動車推出，除咗慳錢又環保之外，仲覺得車仔細細好吸引。「之前我上網見到呢架i-MiEV，其實我並唔知道佢係一架電動車，但就畀佢個外形吸引，因為佢車身短，第一個感覺係好啱我呢啲新牌仔，所以好有興趣。」

尾箱空間夠大，Sansu話合晒佢心意。

後排空間較小，但勝在座椅可調校。

雖然車仔細細，亦有唔錯嘅空間感。

估唔到咁好力！

試車當日，全車坐咗三男一女，由九龍灣出發前往飛鵝山頂。i-MiEV配備咗330V鋰電池，經由電動馬達推動，可以產生最大64hp馬力同18.4kgm扭力，數值上同一般1.3公升房車相若。雖然車上坐滿四人，但車重只有1,100kg，起步時候力量頗為直接，將駕駛模式由ECO轉到D模式時，加速力就更強，感覺上同一般家庭房車無異，但更優勝嘅係運作非常寧靜，因為架車根本就冇引擎嘛！Sansu試揸過話：「估唔到架車咁好力，特別係喺斜路起步時，坐滿四個人由起步到加速，感覺都同汽油引擎車冇分別！」

設有ECO模式，動力較柔但更慳電。

試車之後，Sansu話喜歡i-MiEV行車夠寧靜。

揸i-MiEV到飛鵝山，空氣都好似清新啲！

充滿電行160km

另外，唔少人擔心電動車冇電，講真句，雖然目前香港的充電配套尚未完善，但係工程師在設計i-MiEV時已經考慮得非常仔細，喺車身兩側分別設有不同充電插頭，其中一個係三相電源插頭，最快可以喺30分鐘內充滿八成電力，而另一個則用於香港250V家用電插，慢充7小時就可以完成充電。充滿之後，i-MiEV最多可以行走160km，咪忘記由上水去旺角來回都只不過係80公里，剩餘電力仲夠你揸車去行街食飯啦！Sansu仲話：「我覺得車廂都好夠用，而行車感亦同一般私家車冇太大分別，最重要係用電平過用電油，但係老老實實，如果車價可以再平啲，我就即時落訂。」

車身左側有三相電充電口，30分鐘就可充滿八成電力。