栢芝到紐約出席中國電影節，雖然失聲講唔到嘢，不過心情勁靚，仲擺埋成龍個招牌勝利手勢影相放上微博。"
封面
瞞惡拉姑月畀 50萬阿媽 栢芝趕復出貼娘家
2010年09月22日
因為淫照事件被迫停工的張栢芝， 5月產下細仔 Quintus一坐完月即高調復出，除密飛大陸拍廣告同出席活動外，上週感冒病發亦要飛往紐約出席電影節，更盛傳會以千萬身價孖住大仔謝振軒（ Lucas）接拍周星馳的《喜劇之王 2》。
趕住復出，全因惡奶奶狄波拉落晒命令，唔想栢芝與娘家多接觸，更勒令霆鋒唔可以再放水畀老婆益娘家。
老公閂水喉，孝順女栢芝惟有靠自己。一向顧家的栢芝，最近每月豪畀 50萬家用阿媽，本刊亦發現芝媽最近開了間 3千呎火鍋店，更在今年初買入大埔一個村屋單位自住，開鋪又買樓。
拉姑雖然霸得住栢芝同兩個孫，但始終難阻栢芝對芝媽嘅孝心。
一向對屋企人非常照顧的張栢芝，因為 06年 9月同謝霆鋒到菲律賓小島秘密結婚激嬲拉姑。為氹番奶奶，事後栢芝無論大小事都聽晒拉姑話，即使拉姑嫌栢芝外家背景複雜而抗拒新抱同屋企人來往、兼唔畀霆鋒過水畀外父外母，栢芝亦冇怨言。
禁親家入屋
雖然拉姑阻止，不過一向錫家人嘅栢芝就暗啞底撐阿媽，更揼本畀細佬栢文開酒吧，開幕當日仲帶埋老公霆鋒撐場。《蘋果日報》圖片
睇唔起親家，拉姑在淫照事件發生後，據知連芝媽打電話向佢拜年亦唔多客氣，敷衍兩句即刻收線。爭氣栢芝為謝家連添兩名香爐躉，拉姑雖對新抱改觀，但卻未有對芝媽態度軟化。
「拉姑覺得栢芝成家都不事生產，講到明唔想栢芝黐埋去，莫講話唔畀芝媽見吓同抱吓兩個孫仔，甚至連霆鋒兩公婆間屋，都唔畀親家上去坐，搞到栢芝呢兩年約阿媽食飯都要出街食，兩母女見面都要偷偷摸摸！」栢芝身邊人透露。
月畀 50萬
奶奶落晒 order，老公霆鋒又掛住拍戲唔理得咁多，努力維持婆媳關係的栢芝，惟有好女兩頭瞞，一方面低調同芝媽聯繫免拉姑發爛；另一方面私底下塞錢畀阿媽，等佢唔使臨老為錢頻撲。
「其實栢芝不嬲好錫屋企人，就算佢呢兩年冇乜工作，但耐唔耐都會畀啲錢佢啲細佬，栢文之前投資嗰間酒吧都係栢芝有份出錢 o架！前排芝媽因為兩層樓坐咗艇好等錢使，栢芝都即刻出手接濟，家每個月都會畀成 50萬佢阿媽當家用 o架！」
乖女月月進貢，難怪芝媽近期水頭充足。除今年 2月以 102萬買入大埔村屋自住，亦買多部 Benz跑畀男友馮國志代步；芝媽更進軍飲食界，繼 08年在西環開設海鮮酒家後，最近在同區開多間 3千呎火鍋店，再次做老闆娘。
7月︰栢芝復出，連數口精星爺都實，仲想搵佢同 Lucas一齊拍《喜劇之王 2》，早前已搵栢芝兩母子為《長江 7號》動畫版配音兼錄歌。
8月︰栢芝喺國內有價有市， 8月到長沙出席《辣媽評選》活動，笑晒攬住對孖仔影相，證明佢靠潮媽形象完全收復失地。
9月︰內地市場解封，栢芝忙於出席內地活動賺快錢，月頭就飛上海為香港品牌 Moiselle做嘉賓。同品牌太子爺陳柏熹相熟的栢芝只象徵式收少少酬勞，夠晒義氣。
與吳彥祖合演的《旺角黑夜》成為電影節參選電影，栢芝另一套由爾冬陞執導的《忘不了》亦有份參展，栢芝為早前推掉爾冬陞的新片補鑊，「我特別感謝爾冬陞導演，他一直對我很好。」話晒遇過挫折，識做人咗。
內地吸人仔
細佬阿媽輪住開鋪，婚前搵落唔少的栢芝亦曾因要擔起頭家而對傳媒狂呻：「我要養起兩頭家，真係好辛苦！（芝爸鬍鬚勇與芝媽早年離異並各自成家）」嫁作謝家新抱的栢芝受拉姑人肉操控，栢芝惟有諗計復出撲水救濟娘家。
栢芝一度因淫照而被內地封殺，不過今年已獲解封，加上主演的 38集重頭電視劇《天涯歌女》已於內地播出，極受國內廣告商歡迎的栢芝，上月更飛往上海及長沙等地出席活動。對於月畀 50萬娘家，栢芝經理人 Emily回應話：「呢啲唔回應啦，咁無聊！」而拉姑同四哥則至截稿前仍未回覆。
復出電影頭炮有星爺同其他導演出高價搶人，栢芝要吸水養全家話咁易啦！
未嫁謝家前，栢芝經常黐實阿媽，但嫁咗後，因拉姑唔鍾意，二人見面機會甚少。《壹週刊》圖片
08年母女相聚
芝媽對上一次被傳媒影到見外孫 Lucas，已是 08年 6月，當時栢芝正面對淫照事件困擾。
打救阿媽
週日（ 19日）栢芝媽獨自去庵堂拜神，其間更熱到用衫袖抹汗。
芝媽男友
有栢芝大條水喉，芝媽男友馮國志身光頸靚，日日揸 Benz跑落西環舊鋪打躉。
30萬 Mini
有栢芝照顧嘅芝媽，同男友一人一架車，兩架加埋要成 80萬，搵少啲都供唔起。
46萬 Benz SLK
舊鋪
栢芝媽 08年在西環開的海鮮酒家「西環碼頭」，月租要 8萬，不過生意唔錯，栢芝唔使擔心喇！
新鋪 3000呎
雖然乖女栢芝每月上繳 50萬做家用，但芝媽亦食腦錢搵錢，今年 4月以月租 9萬，租下同區西環荷蘭街一個 3千呎鋪位開火鍋店，起名西環浦食天下。
栢芝 08年受淫照事件跌入谷底，同年 2月芝媽即蝕放元朗錦繡花園獨立屋減輕乖女負擔，難得栢芝回勇，今年 2月芝媽用自己名義，以 102萬買入大埔樟木頭村一個村屋單位，平平哋與男友住住先。
芝媽蝕晒
沙田嵐岸高層單位連天台
買入價： 807萬（ 12/06）
賣出價： 708萬（ 11/09）
蝕： 99萬
元朗錦繡花園獨立屋
買入價： 393萬（ 2/08）
賣出價： 380萬（ 5/09）
蝕： 13萬
溫馨冇你份
據知拉姑覺得栢芝媽嗰邊比較複雜，唔想栢芝同娘家太密切，包括埋兩個孫 Lucas、 Quintus，所以經常約埋一大班人聚會飲茶，等栢芝冇時間理阿媽。 Quintus百日宴栢芝、霆鋒冚家出動，惟獨栢芝阿媽就唔見影。
栢芝復出撲水，以後可能會少咗時間陪兩個仔。
栢芝想全面復出撲水，不過一定要問過霆鋒呢關，今年霆鋒生日，栢芝特登去片場為佢慶祝兼煮大鑊飯，做足廿四孝老婆。
愈生愈貴
已經停產 4年的張栢芝，婚前最後一部電影作品竟然係 06年王晶作品、爛到七彩嘅《野蠻秘笈》，唔怪之得大導演爭住請栢芝復出，連栢芝自己都話恨拍戲啦。
貴為香港影后又係話題女王，婚前栢芝電影片酬不過 200萬，內地廣告價叫價 500萬，算係偏低一線港星， 08年捲入淫照事件更遇上絲襪廣告易角、女性用品廣告全國停播、廣告酬勞急跌風波。不過解封後的栢芝，電影、代言價急升，有內地嬰兒床上用品用千萬酬勞斟代言，愈幸福愈矜貴！
06年片酬 200萬
栢芝與古巨基主演的《野蠻秘笈》，片酬只收 200萬。
09年叫價 600萬
爾冬陞以 6百萬利誘栢芝夥拍復出，可惜最後仍然傾唔成。《忽然 1周》圖片
10年叫價 1000萬
栢芝為內地浪莎紡織品拍廣告，代言費達千萬。
採訪、撰文、攝影：娛樂組
留言列表
{{ article.title }}
