蘇卡達陸龜
由於天生欠缺殺傷力，唯有靠鋒利盾殼及車胎紋硬粒盔甲護體，逃避獸口。
動植物公園
最馴對最惡
2010年06月17日
凡事總有兩面，如陰陽平行，如蜃樓倒影，渾然相對論。
蘇卡達陸龜，又名非洲盾臂陸龜，是世界第三大陸龜之一，亦是陸龜中體積最巨。據目前已知世界紀錄，背甲直徑達 104cm。但其實自出娘胎只吃齋，全宇宙都知佢品性至馴良。
凸背鱷魚龜，屬鱷龜科，為美洲體形最大淡水龜，嗜吃肉，背甲直徑可達 80cm。在原產地沿河流域天不怕地不怕，惡霸到呢，只驚天敵美洲鱷。
一個陸上最馴；一個水中最惡，兩種為適者生存由恐龍時期演變成家陣龜樣的物種，在元朗竟然是同一條村一牆之隔的左鄰右里，喂乜咁啱嘅！
愛熱唔愛凍
相由心生，原來，真係有樣睇。
影凸背鱷魚龜過程中，縱然明知得個驚字，一樣氣氛十足標冷汗「 V嘩鬼叫」——仲要係一班男人喎。可想而知，嗰種攝人震撼力，幾大壓迫。一過隔籬屋，野生動物頻道焦點換上樣子得意又溫馴過綿羊的蘇卡達陸龜，即刻唔同晒，場面溫馨好多，大家都爭住摸，證明可愛永恒有市場。
原產地非洲乾旱內陸，鬼都唔多隻水都唔多滴，形成自破殼而出，得豉油碟咁大，食物鏈就要朝向茹素發展。物競天澤適者生存，這點，似熊貓。因為＋所以，最鍾意食儲水能力極高的多汁仙人掌，連刺喎！怕濕更怕，龜房是必要長明暖燈，耐力強極粗生，唯一要小心消化系統。避免蛋白質代謝物過量積存膀胱，形成結石就手尾長。
交配期長達 9個月，牠們會挖掘約 20cm深的泥穴，以便安置多達 30顆或以上的龜蛋。
07年這對初為父母的陸龜曾經生過一次，最終只有七隻存活，咩呀算好喇！
蘇卡達陸龜習慣早睡早起，天都未黑，就會一隻跟一隻返入龜房大覺瞓，抵錫！
陸龜主人為滿足一班寶貝口福，成個花園種滿一盆盆仙人掌，當 snack，真正一日三餐九成食菜。
郁親手就聽咬
講惡，凸背鱷魚龜正式第一。
咪以為龜殼硬負磅重等於鈍，頸以上十足鱷魚頭粗皺兼長滿㓤手三角形息肉嘅佢，例外。表面兩棲，但不能離水太久，身乾會死。似貓夜行性，會獵食比自己體形小的動物，偶然會隊草食生菜清腸胃。疑似狩獵型，實際不，根本係龜版守株待兔古仔。擘大口一動不動，阿姜太公只擺動好似紅蟲一樣的小脷，誘魚上鈎。待目標送上門就落閘合口，以鸚鵡一樣的啄形嘴，配合恐怖蠻力，將之夾碎分屍。
呢個角度，完全將凸背鱷魚龜特徵表露無遺，背甲鋸齒狀；嘴形似鸚鵡；上下顎橫粗，總結兩個字：樣衰！
龜口一點紅，就係疑似紅蟲的龜脷。至於那片白色塊狀，兩端會向中間對合，超騎呢，呢種史前「設計」，我喺《侏羅紀公園》睇過。
邊個話鱷魚頭一定老襯底，鱷魚龜極唔好老脾，掂吓屁股咋，手都未縮佢就回馬槍作勢要噬，快到，識跑添呀！
俾龜咬，雷公劈都唔開。真 o架！你睇 Uncle Chan隻拖鞋——最終仲要拯救失敗，扯到龜反轉都唔肯開口。
要滿足成打食肉獸， Uncle Chan話每個禮拜都要買廿公斤牛肉至夠成班食一星期。
留言列表
{{ article.title }}
