亞熱帶
So肌 權相佑
最近一年，香港的蘇基為大家帶來不少歡樂；韓國的權相佑亦騷肌上陣，在韓劇《野王》打出 44吋胸肌做舞男，打出男人一雙「冇奶嘅奶」換奶粉錢， amazing！《野王》在韓國收得，證明戲內戲外都靠賣肉養親兒的權相佑，原來都咁得觀眾 like。胸同薑，原來都係老 嘅辣！
36歲賣肉露兩點聽落就好坎坷，不過如果打出個心口的主角是權相佑，就冇晒淒慘的感覺。至少，權相佑公認有副好「波地」，大把人想睇。
權相佑個仔都四歲，難得佢為保飯碗，日日操肌兩小時，又因為他在《野王》飾演下海舞男，要全方位騷肌，他更刻意用兩個月時間加操背肌及臀肌。同時《野王》係悲情復仇劇，權相佑一面騷肌，一面又要催淚， fans真係要集集攞定紙巾。
不過三張幾在韓國娛圈已經係老餅，加上權相佑近年的韓劇《錯愛》及《男版灰姑娘》都遭滑鐵盧，似乎新一代劇迷都睇厭了「佑叔」，令《野王》收視低開 8%。不過，權相佑一身肌肉始終有客路，加上權相佑驚 fans在劇集睇唔真，再為月刊拍谷肌封面，連一班冇睇開的師奶、 OL打書釘都睇到嘩嘩聲，所以劇集由第六集開始收視急升一倍，去到第八集已經有 16.4%收視（約 820萬觀眾）！
有前有後
權相佑為韓文版《 Cosmopolitan》拍封面。佢胸肌大家見得多，不過呢輯相 嘅重點，其實係佢近日苦練 嘅背肌同臀肌。
脫衣冧客
權相佑在《野王》中，為供女友讀大學，被迫在夜場做鴨仔。劇情講佢跳脫衣舞 冧熟女，由於佢背肌發達，仲有個朵叫「背神」。
先愛後恨
在《野王》，秀愛和權相佑住埋兼生咗個女，不過女方後來講金唔講心，最大鑊係秀愛掛住攬新仔，睇唔住個女搞到個女俾車撞死，令權相佑展開復仇行動。
老婆嫌棄
劇組找來權相佑太太孫泰英客串做女嫖客，對他掟蕉皮：「你生到咁似我老公，搞到我乜胃口都冇晒！」笑死唔少觀眾。
新劇改編成人漫畫
《野王》改編自韓國成人漫畫，不過電視版只有騷肌，三級畫面欠奉。權相佑飾演的癡情男主角，愛上了同在孤兒院長大的秀愛，兩人住埋產女，權相佑更打工供老婆讀大學。不過秀愛為富貴搭上富二代鄭允浩，更不認女兒，仲要權相佑為佢頂殺人罪，一直逆來順受的權相佑決心向秀愛報仇……
《野王》大熱，權相佑鯉魚翻身。總結近幾年表現，權相佑話：「 05年拍完《悲傷戀歌》之後，有段時間我陷入低潮，演出的角色總是與大眾脫節，所以近年揀劇本更謹慎。今次拍《野王》，泰英（權相佑太太）有份客串，我都好開心佢重新展開演藝事業。同佢拍拖時，我哋連 K都冇唱過，拍攝時諗起，我都覺對佢唔住！」得喇，知你係愛妻號喇！
瘋迷成龍
同好多韓國人一樣，權相佑一向當成龍係偶像，佢 喺《情迷戇豬男》（上）試過油黑個籃球當酒埕扮《醉拳》，難怪佢同大哥咁 啱 key，喺《十二生肖》（下）合作。
一家三口
權太孫泰英曾經係韓國小姐季軍，兩人 08年奉子成婚。咪以為權相佑大男人，佢平日都有幫手湊仔做家務，試過多次幫傷殘人士做義工做家頭細務。
斷片失禮
好男人都試過失手。 06年，權相佑被日本傳媒拍到佢搵 咗十一名靚女陪唱 K，之後仲醉到 瞓 喺蒲友隔籬。
留言列表
{{ article.title }}
