阿叻新寵
阿叻出晒口力捧，令仍未卸任的朱千雪狂接 job兼拍新劇，因此令名銜比她高的亞軍黃心穎眼紅。
一早睇中佢！（真實對白）
我比佢哋行快一步。（真實對白）
娛聞樂
阿叻點名谷朱千雪 黃心穎不屑：鬼叫我冇人撐
無綫正值人才荒，花旦買少見少，惟有培訓新人。應屆港姐季軍朱千雪未卸任，已經大騷、新劇、《勁歌》主持輪住做，早前更獲阿叻陳百祥欽點拍攝《叻哥遊世界》同遊杜拜，恨死隔籬。
有人彈起自然有人眼紅，同是未卸任的港姐亞軍黃心穎，近日孖住冠軍張名雅，周圍唱朱千雪識耍手段 冧叻哥、志偉。黃心穎回應時更句句有骨：「鬼叫我冇人撐！」擺明唔妥。
其實去年參選港姐期間，有工作人員曾爆料指黃心穎鍾意搞小圈子，又籠絡其他佳麗杯葛大熱的朱千雪和湯洛雯，因此黃、朱二人早有心病。決賽當晚，因一人一票選港姐程式 down機，令頂頭大熱的朱千雪失去爭冠機會，卻因禍得福博得全城同情。當時網友更指奪冠的張名雅和亞軍黃心穎名不正言不順，令黃、朱不和升級。
張名雅：我好恨拍劇！（真實對白）
黃心穎：我會靠自己！（真實對白）
黃心穎近日拉攏冠軍張名雅齊齊唔妥死敵，更四圍唱朱千雪未夠班做主持。
當選期間，三甲港姐要四出做訪問，當時已有指黃心穎和張名雅聯手杯葛朱千雪（左），令朱慘變獨家村。
在《叻》節目中，朱千雪雖然要多次 着三點式出鏡，但既然有阿叻欽點，相信她亦唔會 say no。
阿叻：梗係搵個靚
雖然屈居季軍，但朱千雪當選不久，即有幸隨阿叻陳百祥赴杜拜拍攝他自資的旅遊節目《叻哥遊世界》。據知情人透露：「叻哥有跟港姐去倫敦拍外景，成日拉 Tracy（朱千雪）埋一邊傾偈，又私人醒佢 啲對答技巧，所以佢入三甲，叻哥功不可沒 㗎！選完港姐冇耐，叻哥就要拍呢個節目，佢第一時間就點名搵 Tracy一齊去杜拜。不過蕭生（《叻》監製蕭潮順）話 Tracy呢頭選完唔夠一個月，貿貿然搵佢去拍嘢有 啲大細超咁，所以就搭單要埋攞『最上鏡小姐』嘅岑杏賢啦！多個女仔戥吓腳，叻哥梗係冇所謂啦！」
日前，阿叻孖實朱千雪出席《叻》宣傳時大方承認一早睇中女方：「 Tracy選緊時我已經覺得佢係咁多個女仔中非同凡響，有特別留意佢，志偉都讚我有眼光！搵佢做節目係因為佢真係靚，你知我哋節目只可以出叻人同靚人。做完今次之後，我發現 Tracy比我想像中做得更好，佢除咗靚，仲好有主持 talent，遲啲一定掂！（當時有冇考慮其他港姐？）我揀得梗係搵個靚啦！」
黐實最上鏡小姐
同冠、亞軍冇偈傾，朱千雪私底下經常孖實同屆最上鏡小姐岑杏賢出街。早前記者便影到二人在一間平民韓國燒肉料理開餐。
踩千雪黐脷筋
阿叻吹雞力捧，其他監製亦一呼百應。朱千雪近日除了主持《勁歌金曲》，戲劇組監製潘嘉德亦安排未卸任的朱千雪，拍攝重頭劇《 On call 36小時 2》，拍住剛回巢的吳啟華做情侶。未拍過劇的新丁竟一躍成第三女主角，如此筍 job，其他港姐唔眼紅就假。
本刊收到消息，黃心穎近日在人前人後，多次踩朱千雪冇資格上位。知情人說：「 Jacqueline（黃心穎）早排同 Karat（張名雅）做慈善騷，有個 PA見到佢兩個 喺化妝間傾密偈，仲聽到 Jacqueline話唔明點解季軍會多嘢做過冠、亞軍！又踩 Tracy講 嘢黐 脷筋又漏口，做主持根本未夠班，多 嘢做因為識 冧阿叻同志偉。」
千雪：我比其他人勝任
周一（ 18日）無綫製作資源部總監樂易玲出席團拜活動，本刊記者向她求證力捧朱千雪一事，她大方承認：「今年我哋係會全力捧佢，希望佢有好發展。」
對於公司力捧，朱千雪語帶挑釁：「可能公司覺得我比其他人勝任。（即係話其他港姐唔勝任？）又唔好咁講，我只係比佢哋行快咗一步，名雅要選華姐，心穎都要做《決戰一分鐘》。（我 哋知道你哋冇偈傾？）唔……我哋係好少見面，同事囉，好少特登打俾對方！（ Jacqueline周圍唱你識 冧高層？）哦……係咩，我聽唔到當佢冇講過啦！」
至於黃心穎回應時雖然笑笑口，但卻不自覺流露不屑：「只係 timing唔同，不過我信我嘅機會遲早會嚟，一定會輪到我！（會唔會羨慕朱千雪有叻哥同公司撐？）都冇得羨慕嘅，鬼叫我冇人撐！不過我會靠自己。」有冇骨？係人都聽得出。
同人唔同命
應屆港姐張名雅、黃心穎及朱千雪，除了要出席一連串親善的公開活動外，真正的幕前工作卻大不同。有高層撐，論工作量，朱千雪遙遙領先。
季軍朱千雪
•《勁歌金曲》主持
•《 2012勁歌優秀選第三回》司儀
•《星光熠熠耀保良》司儀
•《歡樂滿東華 2012》表演
•拍攝《叻哥遊世界》
•新劇《 On call 36小時 2》演出
亞軍黃心穎
•《星光熠熠耀保良》表演
•《歡樂滿東華 2012》表演
•《決戰一分鐘》主持
冠軍張名雅
留言列表
{{ article.title }}
