任賢齊“我話晒係天王”－娛樂八掛大放送★

任賢齊“我話晒係天王”

在尖沙咀星級髮型屋的VIP房裡，吹緊頭的任賢齊說：「我係高級勞工。」
本地音樂市場萎縮，歌星靠演唱會食糊，曾經拎住結他冧女仔的小齊也湊熱鬧，佢仲話，一係唔做，一做就要好好睇睇，好台式江湖大佬feel。
吹完頭，他對住我呢個低級勞工，落力講解2月演唱會＋新唱片＋MV，自己墊支幾百萬超支製作費，「我話晒係天王，點可以求其？要keep住自己個股價嘛！」
四十有五，力證有心有力。
單憑堅定眼神、頑強鬥志、自信笑容，今時今日，任賢齊依然係一隻優質藍籌股。

　
Profile
　
Richie Ren
出生日期：1966年6月23日（巨蟹座）
出生地：台灣彰化縣田中鎮
身高：5呎9吋
語言：普通話、英語、閩南話、廣東話。
學歷：文化大學體育系畢業
簡歷：90年，推出首張個人專輯，未獲重視。97年，一首《心太軟》，正式走紅。10年，憑《火龍》於韓國富川電影節奪得影帝。
代表作品：唱片《心太軟》（97），《愛像太平洋》（98），《齊待R.S.V.P. 》（09），《音樂旅行者》（10），《不信邪》（11）。電影《夏日的麼麼茶》（00），《大事件》（04），《火龍》（10），《傾城之淚》（11）。
個人網誌：http://blog.sina.com.cn/richiefire

　我隨和，唔隨便　
小齊愛鬥車——後生嗰陣；家陣，有家室又有番咁上下年紀，自然錫身，男人講體力，好少有佢咁坦白。「踏入中年，體能變了，容易呢度損嗰度傷，青春不再！「我讀體育系，早就知運動員有黃金時期，好似賽車，今時今日，去玩越野賽，我同後生仔鬥一定冇機會贏，個人唔襟跌呀！轉玩房車賽，仲有機會。「少少失落啦！」中、港、台三地拍戲，賺落唔少，卻一直謙稱香港樓市高不可攀，堂堂一個紅歌星，最希望港、台多置物業。有理由相信，開演唱會出新唱片谷人氣，為了搵快錢。小齊均真，不急於一時，省靚金漆招牌才要緊，「平有平做，但觀眾get唔到你個心；「我份人隨和，唔隨便。」唱片公司預留200萬製作費，他已超出至4、500萬，自己墊支，包括坐飛機去沖繩拍MV，買下台劇片頭、片尾主題曲等等，「自己位置高咗，顧慮亦多咗；「出碟驚賣得差，冇面啊！話晒係天王，拍MV點可以咁肉酸，求其搵條街行來行去就算呢？「我唔知可否再創高峯，但起碼努力過。」

　 Richie's tips 　
Q：你有護膚嗎？ A：三個步驟，潔面、補濕同搽eye cream。 Q：屋企最多邊一類衫？ A：有5、60件皮褸，最貴Jean Paul GAULTIER，買嗰陣，睇少咗個零！

　冇女仔埋身　
行內皆知，任賢齊極親民，但好好先生每次出場，4-5個助手圍住，很有派頭，「呢一行難免奢華排場，真係有需要。」他曾在台北天母麥當勞門口跟人打交，「我朋友見對方指指點點，問一句『點解咁冇禮貌？』四個人即刻兇我哋，好暴躁，打過囉！兩個都打贏佢哋！」初入行，脾氣不好，樣又惡，公司力勸他笑多啲，「唔打交，人哋會對自己改觀。」成家後，好老公、好爸爸形象入晒屋，我疑惑，唐僧肉，應該大把白骨精吼住吖？「成日一大班麻甩佬瞓喺廳，點出去偷雞？「冇女仔埋身喎……遇到引誘，我會講『做你阿哥』，傾得埋，做兄妹……費事煩！」 05年，女友Tina為他生個女，08年，再生個仔，一家四口家庭生活，一直守口如瓶，小齊很family man。「工作辛苦，仔女寫張卡安慰我，啲字仔歪歪斜斜，好得意，好過買幾十卡鑽石俾我。「喺屋企，我做好人，小朋友有動物本性，識搵大樹遮蔭，做錯事，罰企門口10分鐘，我覺得已經成個世紀！唔捨得呀！」他朝子女想入行，支持嗎？「又唔識彈又唔識寫，返屋企好過啦！你睇霆鋒，十幾歲入行承受咁大壓力，被人噓都試過……」男人心肉造，軟棉如糖，仔女未叫苦，為父已覺苦，心痛盡寫臉上，這表情，最可愛。

　後記　
在Google搜尋任賢齊，第一個關聯字「心太軟」，講真，都十幾廿年…… 「陳昇講過，每次唱歌，當係呢世人最後一次，聽落好慘，但正係要呢股精神！」即係，我打份牛工，每日都要當係呢世人最後一份工，至識珍惜；突然間，覺得好神，好Steve Jobs。

　 Shop List : 　
Lane Crawford 中環國際金融中心3樓 2118 7683 Louis Vuitton 中環置地廣場地下 8100 1182 Zadig & Voltaire 尖沙咀海港城港威商場2224號鋪 2956 0627 ####

Richie Ren
深藍色針織衞衣 $13,300
白色canvas外套 $24,100
杏色斜布褲 $6,950
all Louis Vuitton