CC除了工作，大部分時間都選擇留在家中享受天倫樂，「同屋企人喺梳化睇電視同傾偈已經係人生一大樂事。」
星悅居
黑白物室 曹思詩
Profile
曹思詩（ CC）十四歲入行當模特兒，曾改藝名「曹卓榣」簽予馬偉豪旗下公司，同期推出個人寫真集《一個人的初戀》及演出陳柏宇〈你瞞我瞞〉及〈 I will be loving you〉 MV，亦曾在電影《我的野蠻女友 2》飾演黃宗澤秘密情人，和 Bosco更有一場熱吻戲。
〈 I will be loving you〉
《我的野蠻女友 2》
《一個人的初戀》
曹思詩（ CC）去年以 300多萬購入將軍澳一個六百多呎單位，家中由裝修至擺設都由 CC一手設計，結果豪花 40萬裝修安樂窩。身為模特兒的 CC，平日工作離不開影相、行 show，所以她最愛高踭鞋，而鞋櫃可說是她家居的核心。
CC說：「裝修前我第一個要求，就係鞋櫃一定要夠大，因為我鍾意整齊企理，有個大鞋櫃可以將長 boot同高踭鞋分開，整齊又慳位。」這個 6呎乘 8呎高的鞋櫃可放近百對鞋。絕對 user friendly！
CC的儲物癮，還有大廳電視櫃內的小酒杯，原來 CC喜愛旅遊，每去一個地方都會買一隻酒杯回來做紀念。「通常去旅行都係寄番張明信片俾自己，我就習慣買酒杯，一隻杯代表我一份美好回憶。希望有一日可以儲齊世界各地嘅酒杯，完成環遊世界嘅夢想！」
初學彈琴嘅 CC在大廳擺放了一部電子琴。琴邊有張小餐枱， CC同母親及妹妹住，剛好夠用。
鞋櫃接近大門，大門旁掛了一塊黑色花邊鏡，方便 CC每次出門前照一照，確保靚靚。
玄關旁的矮櫃擺放了生果及盆栽，是 CC媽提醒女兒出門口前要食生果而擺放。
呢對高踭鞋 CC好鍾意，但一次都冇着過，因為 5吋斗令踭太高。「我係屋企試着過好多次，但都一仆一碌，唔敢着出街獻醜。」
直入睡房的走廊位以黑白櫃門裝飾，設計師表示黑色一級級代表步步高陞喎！
電視機後面牆身的花卉圖案，是 CC自己加上去的，為硬朗的黑線條添上點點柔和！
這些小酒杯，是 CC每次去旅行時買俾自己的小禮物。
「呢隻係韓國機場買嘅紀念酒杯，記得嗰次臨飛香港至買到，差啲趕唔切班機！」
「大洋洲的斐濟係潛水天堂，當地人非常友善，唔識嘅人都會用『 BULA！』同你打招呼，即係祝你長壽。」
逾二百支香水
不過，以數目計， CC收藏最多的必定是香水，各式各樣不同系列以至迷你版香水，都是 CC的心頭好。「由細到大嘅生日，朋友都鍾意送香水俾我，而我自己每次去旅行都會搵吓當地嘅特色香水。依家我收藏嘅香水超過二百支。啲人話每個女仔都會有自己一種獨特嘅香味，但我噴香水，就可以日日唔同味！」
CC家居以黑、白為主色，裝修以簡約為主。「女仔都鍾意粉紅色，但我就鍾意簡單，令間屋望落去較大及光猛。」
睡房擺放了香水、黑超及相機。「呢排見出咗好多唔同款嘅相框，所以就買咗兩部唔同 size嘅即影即有相機，同朋友影靚相！」
CC的睡房簡單整齊，牀頭櫃擺放了她最新買的香水。「香水數量太多，真係用唔晒，有好多香水我連盒都唔捨得拆，媽咪成日都鬧我買咁多。」
「呢支香水係我一個朋友推介俾我，用落又幾鍾意，唔會太甜，啲味仲 keep得好耐。」
呢兩支 Jean Paul香水係ＣＣ至愛嘅：「鍾意香水樽外形玲瓏浮凸，反而味道一般，好少用。」
「呢支香水嘅味道係我最常用嘅花香味，夠清新。」
CC喜歡收藏香水，單單電視櫃的一格櫃桶，就放了過百樽迷你香水。
CC平時出 job影相要着唔同款式衫，而手上嗰件係佢最性感嘅睡衣。
ＣＣ家中廚房打理得非常企理，而爐頭上嘅廚櫃用咗鏡面。「用鏡面令空間感大啲，而且容易清潔，平時一有時間除咗焗蛋糕，我仲鍾意食西餐，煎和牛我就最拿手！」
單位平面圖
留言列表
{{ article.title }}
