余文樂一心諗住借I.T沈氏兄弟幫手打入潮人殿堂，可惜自家品牌頭炮未如理想，想再添食有難度。

潮人余文樂近年成功埋到上市潮鋪I.T老闆沈嘉偉兩兄弟堆，令佢有野心仿效死敵陳冠希（Edison）出自家品牌，取代Edison潮界達人地位。幾經游說，於上年成功冧掂沈氏兄弟出資成立個人品牌Common Sense（CMSS），更成功借I.T效應拉攏日本潮牌Luker crossover。開波係威係勢，但事隔大半年卻再冇新貨出街，據知上次余文樂主理的潮服滯銷，但佢仍然未死心，最近不斷死沈氏兄弟再出資，可惜沈嘉偉見過鬼怕黑，將余文樂的CMSS新系列一拖再拖。樂仔想做潮神，打多幾次邊爐先掂喎！


余文樂同死敵陳冠希由爭女鬥到落潮界，上年余文樂終得嘗所願，上年四月成立的自家品牌CMSS，有I.T老闆做後盾，出面搵到Luker by Neighborhood及Bape搞聯乘，當時余文樂更說：「Common Sense同Luker係一樣新嘢，咁Luker隻藍色又同Common Sense隻藍色好似，所以我覺得好合襯。」擺明想長做長有。

自稱家人
黐到沈氏兄弟呢對富豪朋友，余文樂當然唔敢怠慢，平時跟出跟入做傍友，更於facebook開咗個叫”family day!!!”嘅相簿，專放同沈嘉偉細佬阿B（沈健偉）一齊嘅生活照，真係一家親。

潮貨變死貨
但據知余文樂上年聯乘的CMSS潮貨，其實銷情並唔理想，賣剩唔少變死貨砸喺倉。據知情者透露：「其實阿樂一直都想好似Edison咁有自己品牌，近年佢埋到沈嘉偉堆，佢同阿B（沈嘉偉胞弟沈健偉）最friend，最終冧掂阿B出錢出面幫佢搞品牌CMSS，仲搭埋路搵Neighborhood主腦瀧澤伸介同Bape嘅Nigo聯乘搞大CMSS，不過上次批貨反應麻麻，剩低啲死貨喺倉。」自去年6月CMSS×Bape出tee後，CMSS便一直未有新搞作，但據知余文樂仍未死心，可惜沈嘉偉未肯落搭之餘，連I.T內部職員都怕咗佢。知情人士續說：「雖然事後阿樂一直想再出新嘢，又提議食住上次同Nigo條水，想再同Bape搞crossover，不過I.T都只係一路拖字訣，加上佢批貨嘅設計搞到好亂，阿樂對設計冇乜概念，成日唔知想點，啲設計改完又改，搵I.T班人嚟搞，所以個個都怕咗佢，唔多急同佢再搞產品。」而I.T傳訊部經理Gloria則回覆：「未知幾時再出！」睇嚟余文樂想做潮神，仲有一段距離喎！

醒黐潮人
於10年尾的izzue×Neighborhood派對上，余文樂不斷mark實Neighborhood主腦瓏澤伸介（右一）大談時裝經，同神級潮人做friend，果然半年後就推出CMSS×Luker by Neighborhood系列。

死貨砸倉
余文樂上年首批出品的「CMSS×Luker」的產品，主打兩款服裝單品，包括有黑、白、灰三色的pocket tee及牛仔褲，售價為$699及$2,699，當初余文樂話以實用性為主，可惜班90後潮唔多buy。

猿人造勢
余文樂經沈健偉介紹識到Bape主腦Nigo，即於上年6月成功與Bape聯手推出別注T-shirt加CD的組合，成組boxset盛惠$999，仲得Nigo幫佢首〈給我一杯〉整remix版，余文樂本來諗住食住個勢再同Bape搞合作，可惜I.T始終唔落搭。

I.T多搞作
I.T旗下品牌搵名人做代言都唔夠，玩crossover食住明星效應，有時noise更勁。

izzue+sui
I.T旗下的izzue去年5月請來徐濠縈為客席設計師，有衫、褲外，更有鞋、皮帶及黑超，反應甚佳。

Miriam×Jeffrey Campbell
I.T代理的鞋牌Jeffrey Campbell去年5月邀得楊千嬅參與設計，及推出以楊千嬅洋名Miriam為名的限量別注系列。

b+ab by Gaile
09年11月，I.T旗下少女品牌b+ab，搵嚟「天王嫂」樂基兒作客席設計師，服飾由$999-$5,999不等，雖然偏貴，但反應仍然理想。

b+ab×Angelababy
10年9月，b+ab與Angelababy（楊穎）合作，推出一系列26件以「Paris」為主題的服飾，大獲好評。

水鬼升城隍
余文樂同沈嘉偉兩兄弟、郭富城、張智霖等年紀差至少10年，成班人大纜都扯唔埋，但幾年前，致力加入潮界的余文樂，不惜豪擲150萬購入寶馬5系，成功加入沈嘉偉的「玩車兵團」，以名車打入沈氏「兄弟幫」，即刻升呢！


沈嘉偉　飯局陪食以百萬貴車成功埋堆，余平時亦經常被傳媒拍得跟沈嘉偉、沈健偉兩兄弟飯局及跟出跟入的相片。


郭富城　孖住篤波為了投其所好，余常約天王郭富城結伴夜蒲兼打桌球。


張智霖　約埋開賭身為「三劍俠」之一的張智霖、余文樂當然要應酬一番，上月25日張智霖喺微博上載一幅同余玩poker的相片。 ####

 




I.T一向有贊助周柏豪同陳偉霆等人，據知不少潮童跟風入鋪買。


《蘋果日報》圖片



 
去年4月CMSS開賣時，余文樂即場喺tote bag上玩潑墨，十足設計大師。


















《蘋果日報》圖片



arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄