27歲嘅姬拉麗莉近年少參與大製作，多數都係中、小型電影。 2012年都只係得《末日倒數緣結時》一套咁大把。

來路貨

名媛望族

2012年12月21日 ~~ 第908期忽然１周

睇完《名媛望族》，你會發覺，所謂的「名媛」都係不外如是啫。離唔開爭風呷醋、一哭二鬧三上吊嗰幾度板斧。分別在，佢着名牌我着冒牌之嘛。
正如《貴族孽緣：安娜．卡列尼娜》，貴族人妻背夫偷食嘅劇情，耳熟能詳到喊。好在冇黑絲冇咬唇冇木偶鼻。口味輕一啲，人都健康啲。

話就話劇情老生常談，但《安娜．卡列尼娜》本身改編自俄國大文豪托爾斯泰（ Leo Tolstoy）同名小說。除咗講及婚外情、人性之間嘅選擇，更反映當時俄國嘅政治、社會階級觀念，以至社會風俗，文學價值極之高。

姦夫淫婦一舞訂情（右圖），姦情後來傳遍整個上流社會，兩人受盡白眼，最後移居鄉郊，繼續纏綿（下圖）。

拋夫勾佬

《安娜．卡列尼娜》（香港 2013年 1月 10日上映）係以 1874年嘅俄國做背景，女主角安娜卡列尼娜出身貴族，跟丈夫係社交界嘅模範夫婦。正所謂「食得龍肉多都冇味」，做得少奶奶耐都嫌悶。當安娜啟程去莫斯科嗰陣，就邂逅咗年輕軍官。
孽緣自此一發不可收拾，仲搞到全城皆知。安娜為避開是非，拋夫跟佬一走了之。奈何新歡唔生性，安娜又疑神疑鬼，喺絕望之下，最終跳火車輕生。

電影 11月美國上映，影評認為導演拍攝手法略為賣弄，但一致激讚姬拉麗莉嘅演出。

不過軍官不甘鄉下生活，重返名利場，令安娜疑神疑鬼，懷疑軍官另有外遇。

新歡經常唔喺身邊，令安娜日漸抑鬱。最終睇唔開，跳火車自殺。

安娜跟祖狄羅育有一子，但因姦情被阻止與兒子見面，兩母子被迫骨肉分離。

最慘女主角

飾演安娜嘅，有英國人氣女星姬拉麗莉（ Keira Krightley），成名作《我愛碧咸》，之後有《魔盜王》，令佢成為新一代女神。難得女神有演技， 2005年憑《傲慢與偏見》角逐影后，兩年後嘅《愛．誘．罪》被大讚演技爐火純青。
可惜吖，咁多年有讚冇獎。諗住啱啱公布名單嘅金球獎會有着落啦，點知一個提名都冇。據知好多影評人睇過電影之後，曾預計姬拉麗莉會入圍女主角獎。家下食白果喎，莫講話影評人，當事人都始料不及。不過唔使灰心嘅，最具代表性嘅奧斯卡都未公布名單。到時冇，先再自封「最慘女主角」都未遲。

導演祖韋特跟姬拉麗莉合作過《傲慢與偏見》、《愛．誘．罪》。每次姬拉均有女主角提名，今次二人第三次合作，諗住實冇死，點知食白果，只得「最佳原著音樂」一個金球獎提名。

安娜老公由祖狄羅飾演，兩公婆本來生活美滿，但衰婆抵受唔住誘惑出去勾佬，搞到婚姻破裂。

本身有禿頭問題嘅祖狄羅，今次盡地一煲，將髮線再往後移。其大海景造型，乃本片最重口味一環。

由於安娜哥哥捲入桃色醜聞，搞到老婆要生要死。安娜（右）為挽救哥哥婚姻，特意去莫斯科安慰大嫂（左），旅程上更邂逅年輕軍官。