鏡頭前每位綠葉遇到挫折或低潮，機會往往比其他演員多，究竟是甚麼令他們堅持做好自己？多才多藝能文能武的郭卓樺便抱住樂觀心態，早年飾演的角色均是爛仔，近年洗底演正派，就是這份信念及心態，令他一直享受自己鍾情的演藝事業。

撰文：馬建華

郭卓樺不知不覺在娛樂圈打滾22年，觀眾未必講得出他的名字，但必定認得他在電視劇多是演爛仔、黑社會大佬等，鏡頭外的他卻是笑容滿臉。多才多藝的郭卓樺，轉眼間從訓練班到年初離開TVB，再過檔王維基的香港電視拍劇，他回望過去的演藝生涯有起有跌。

■郭卓樺年初離開TVB過檔香港電視拍劇，他回望過去的演藝生涯感慨萬分。攝影：陳慧安
本身性格愛挑戰怕原地踏步的郭卓樺，90年因任職救生員工作太悶，便跟朋友一齊投考訓練班，起初對演戲全無興趣，但經過年半訓練，他尋找到對演戲的火，正當畢業後準備等機會發揮時，他在92年遇上交通意外弄斷左手左腳，被迫停工休養。

■在《酒店風雲》飾雞哥的郭卓樺，跟官恩娜有對手戲。劇照

■郭卓樺擅長演惡霸、古惑仔、放高利貸等，惡形惡相令觀眾印象深刻。
《律政新人王II》劇照

長期演反派

一次交通意外，令滿腔熱誠的郭卓樺被困病床，他說：「當時心情好低落，駁番手腳後要休息好長時間，跟住我就諗一向畀人感覺都唔係乖仔，不如順理成章做欄杆飛，出院後，我就確定咗自己角色類型。」

長時間演反派，每次都在鏡頭前惡形惡相，豈不會悶？郭卓樺分享心得說：「從欄杆飛到之後做吓古惑仔，到有幾個?仔跟尾，直至近年做社團大佬，到《學警雄心》仲做埋軍裝警員，我都算係平步青雲。」

鏡頭前，在主角後走來走去多年，郭卓樺終於等到有對白的角色，他表示不論對白輕重，都會落力演好，直至《西遊記》中飾演羊力國師開始負責單元故事開始，他便逗自己開心，只要每年有一場有質量的戲演便夠：「任何行業都有淡旺季，唔可以要求成日都旺。」而之後《陀槍師姐III》中的口水全一角，也令他擔起單元故事。

■近年郭卓樺成功洗底，在《學警出更》演警員。劇照

■郭卓樺有份演《神探高倫布》，跟視帝黎耀祥合作。劇照

彈無綫政策

正當郭卓樺努力演好每個角色時，公司突然將好的機會留給華南理工受訓或畢業的演員上位，憶述那段時間，郭卓樺仍有不滿說：「以往點都叫做排隊上，點知行政起變化後，不停見到佢哋（華南理工演員）入線，任由我哋點努力都係冇機會，講真如果想做明星一早走晒，唔會再等。」不過郭卓樺的個性，是只要對件事有興趣，便奮鬥到底不易放棄。

在感到不公平的環境下繼續奮鬥，直至今年郭卓樺遇到新機遇，過檔王維基的香港電視，郭卓樺說：「新公司氣氛完全唔同，有好大創作空間同發揮，以前大家係學而冇得用，苦無路數，喺新公司大家可以盡情去做，抱住熱誠去拍好每個鏡頭，做好每個準備。」他笑言自己遇到新公司，如一盞已油盡燈枯的燈，突然有人來添油，立即燃起一團火。