娛樂八掛大放送★

《大太監》自從開播以來，一直口碑和收視理想，平均有超過30點收視，網友柴台挑釁算是較少的劇集，據知無綫食髓知味，有意原班人馬開拍續集。該劇監製羅永賢接受本報訪問時，坦言確有此打算，因為該劇結局時，只講到同治皇帝（梁烈唯飾演）駕崩，男女主角李連英和慈禧，只是步入中年，絕對有空間拍續集。對於有望再合作，一班演員包括黎耀祥、米雪和胡定欣都齊聲讚好，但梁烈唯角色早已死，他接受本報訪問時笑言要為拍續集要即時投胎，還提議可以演出「光緒」一角。

撰文：杜淑霞　攝影：吳君豪
場地：MM/H（皇室堡15/F）

近年無綫劇集被彈多過讚，難得《大太監》讚多過彈，令監製羅永賢感到相當安慰，亦有意向公司提出開拍續集，「我係有咁打算，因為依家先講到李連英同慈禧去到中年，而李連英性格亦受到咁多打擊有所改變，仲有好多空間可以再寫落去，其實今次準備呢個劇，編審佢哋搵咗好多資料，有好多都未用到，如果開拍續集，就可以用得着。」

胡定欣死過翻生

不過由於無綫2013年劇集計劃，已大部份定案，羅永賢認為最快可能要2014年先可以開拍，但希望可以原班人馬，「我依家已經籌備緊另一套劇，暫時未有時間再搞。如果開拍當然希望係原班人馬，定欣同唯唯死咗，咪諗番個方法畀佢哋翻生囉！定欣可以做佢個妹，啲觀眾可能會接受，不過呢啲細節到時可以再度，希望可以成事啦！」

對於開拍續集一事，一班演員反應相當雀躍，身為男主角的祥仔就話：「我梗係想啦！呢班人合作得咁開心，就算再到橫店拍都無問題。」女主角米雪亦大表贊同，「好呀！大家都咁專業，一定要預埋我一份。」至於被監製欽點可以死過翻生的胡定欣就特別開心，「多謝監製，死咗都預埋我一份，不過如果開拍續集，咁我又唔想死住啦！倩蓉可以繼續喺連英身邊。」

恨頒獎禮再度奪獎

剛在馬來西亞「Astro On Demand我的最愛頒獎典禮2012」憑《缺宅男女》中「關二哥」一角奪得「最有潛質男演員獎」的梁烈唯，對於開拍《大太監》續集亦舉腳贊成，還笑言：「咁我呢個同治死咗，都要即刻投胎先得！到時拍續集我咪可以做光緒囉！呢個角色跟同治好唔同，佢畀慈禧壓迫得仲緊要，應該會有好大挑戰。」

唯唯坦言參與這個劇獲益甚多，既可以同陳國邦合作，又可以向師父級黎耀祥偷師，更跟米雪建立了母子情，當然希望跟他們再度合作，「好似米雪姐咁，我只要望住佢對眼，就好自然入咗戲，好厲害。」唯唯最難忘是結局時同治病死的一場戲，「嗰場戲得我、米雪姐同祥仔三個，我望住佢哋已經忍唔住喊咗出嚟，真係好感人。」唯唯今年先後在《缺宅男女》、《飛虎》及《大太監》等劇集有出色表現，問他可有信心再奪獎，他坦言：「難得今年角色咁平均，我對飛躍進步獎比較有信心，我希望可以恨到啦！」