今年無綫「視后」之爭，外間都將注意力集中在楊怡同徐子珊身上，而憑《護花危情》成為今年最高收視劇集，劇中女主角鍾嘉欣明知自己冇後台、冇高層撐腰，爭「視后」無望，唯有寄望攞到安慰獎「我最喜愛的電視女角色」，點知無綫擺明唔肯俾，連提名都冇份，焗住要輸。
鍾嘉欣備受忽視，只怪她又乖又蠢，去年被氹續約，以為加簽三年，點知簽完之後先知變咗八年，有長約揸手，難怪無綫坐定粒六，唔使俾甜頭氹嘉欣 BB。
最高收視
今年鍾嘉欣共有四部劇集出街，包括《缺宅男女》、《耀舞長安》、《當旺爸爸》及《護花危情》，其中《護》劇更是目前為止全年收視最高劇集，身為女主角的鍾嘉欣，當然有份爭「視后」，入圍「最佳女主角」十強，可惜外間集中力只放在「木偶鼻」楊怡同「姣神」徐子珊身上。
鍾嘉欣明知無機會攞大獎，於是對安慰獎「我最喜愛的電視女角色」抱有期望，點知到公布入圍名單當日，才發現自己被剔出十大，想爭都無份。公司唔撐佢，當得知入圍無望時，鍾嘉欣都感到非常愕然，「今年連角色獎都冇提名，真係有啲失望！（有冇信心攞獎？）今年都係睇多，如果有 surprise就當 bonus。」
被迫缺席
雖然鍾嘉欣與楊怡及徐子珊一樣，都是無綫「親生女」，但待遇卻差天共地，像本週日（十二月二日）在馬來西亞舉行的「 Astro On Demand我的最愛頒獎典禮 2012」，被譽為是每年無綫頒獎禮的前哨戰，鍾嘉欣同徐子珊一樣攞到「十五大我的最愛電視角色」獎，但無綫卻未有安排她前往領獎，甚至本週二（十二月四日）舉行拉票記者會，鍾嘉欣繼續無影，但卻俾盡機會徐子珊及楊怡在頒獎禮前爭取曝光造勢。
被刻意打壓，最主要原因是鍾嘉欣太乖，公司 order，她從不 say no，加上去年被氹簽落八年死約，無綫覺得有長約揸手，無須額外花精神照顧，亦唔擔心鍾嘉欣會扭計玩嘢。
後知後覺
「喺舊年年初，因為王維基挖角，公司係咁叫啲藝員續約，嘉欣都有份，最初傾嘅時候嘉欣話唔想太耐，簽住三年先，公司話無問題，仲加咗佢人工。到合約整好晒，有一日公司叫佢開工前上 office簽埋份約，由於趕時間，嘉欣冇乜睇份約就簽咗，之後睇番先知份約由三年變咗做八年，去到接近二○二○年先完，嘉欣有問番公司點解？
「佢哋話簽長啲先會落力啲捧自己。嘉欣雖然覺得俾人呃，不過都冇辦法，而家要被迫讓位，睇住其他花旦踩住上。」鍾嘉欣身邊人說。
而鍾嘉欣亦承認同無綫簽下長約，「我上年係簽咗好長約，（係咪八年？）幾多年就唔講喇！（有消息話你原本簽三年點知之後變咗八年喎？）唔……其實呢啲嘢成日都有人講，總之幾耐就唔講得。（係咪覺得公司唔錫你？）都錫，但係可以再錫啲囉！」
楊怡贏頭威
留言列表
{{ article.title }}
