Faddy在廣東道打滾半世紀，見證廣東道的變遷，他頭頂那塊新金島魚蛋王的招牌仍在，鋪位卻已租予溥儀眼鏡，現正進行裝修。

壹個人在商場

新金島「太子」細數廣東道

2012年11月08日 ~~ 第1183期香港《壹周刊》

名店林立的尖沙咀廣東道再起風雲。繼蘋果電腦以一千一百萬天價租下彩星大廈地下至三樓，踢走食肆「糖朝」後，開業六年的「新金島魚蛋王」亦不抵租金誘惑，自動離場，將自置地鋪以月租一百八十萬租予溥儀眼鏡。
人稱「太子」的業主兼餐廳老闆馬德發（ Faddy），立即成為風頭人物。馬家原在廣東道賣花梨木傢俬，並用二十萬買下自住的唐樓，七十年代末與鄰居聯手重建，成為現今市值數十億元的海威大廈，家族財富亦水漲船高。八十年代已在廣東道開餐廳的 Faddy，見證這裡由傢俬街變成夜店街、名店街。為迎合時勢 Faddy搞過夜店，賣過燒味，再轉做魚蛋牛雜，但最後發達原來靠「磚頭」，一鋪養活三代人，才是金科定律。

新金島粥麵小廚於上月廿三日開張，由主打魚蛋牛腩變為小炒蒸飯等。「以前地鋪主要做遊客生意，流量快，粉麵上菜最快。依家上咗樓，以寫字樓、街坊客為主，流量慢咗，牛雜擺得耐會變黑､柴皮，唔新鮮，所以就轉型，做啲襟擺嘅嘢，例如柱侯牛腩､焗飯等。」 Faddy說來頭頭是道，做了二､三十年餐廳，已是半個老行尊，不過雄心壯志就沒有了，反而經常把父親掛在口邊﹕「我同阿爸講，搬上樓上地方仲大咗，生意會做得更大，佢先肯租個地鋪出去。」
今年初，蘋果電腦以天價租下糖朝鋪位後，一鋪之隔的馬氏見勢即主動以一百二十八萬放租地鋪。地鋪只有六百呎，四樓全層有逾三千呎，馬家持有三分二業權。四月，夾在糖朝與新金島之間的卓悅亦一度被「逼遷」，馬氏「唔執輸」，六月時曾叫價至二百萬，最後以一百八十萬租予溥儀眼鏡， Faddy瞪大眼笑說：「每日要賣二千碗魚蛋粉，仲要唔計成本先賺到（新租金），我覺得租市已經到頂。」

九倉帶挈　重建致富

忙完午市， Faddy走出閣樓休息，望着廣東道說﹕「五十年代呢度好多鋪頭都係賣傢俬嘅，附近大多係四層高嘅唐樓。我老豆白手興家賣花梨傢俬，那時尖沙咀較多外國人遊客。」 Faddy指着對面的海運大廈再補充﹕「九倉係尖沙咀嘅大地主，以前對面都係佢哋嘅貨倉。」翻查資料，九倉於六二年取得港府資助，將第一號碼頭重建為海運大廈。六六年三月，海運大廈落成，由瑪嘉烈公主剪綵揭幕，第一艘停泊的貨輪名「坎培拉號」。近水樓台， Faddy家族亦開始參與物流運輸行業。「以前廣東道呢邊又叫『細番區』，因為好多潮州苦力聚集，聲大夾惡，俾人形容為野蠻無文化嘅紅番。九倉那邊有條街叫『水師街』，出晒名三不管，係九倉自己話事。呢啲係獨家料嚟㗎！」 Faddy招積道。後來他父親以二十萬買入當時居住的唐樓。
七十年代初，在葵涌貨櫃碼頭相繼建成後，香港航運進入貨櫃化時代，尖沙咀碼頭運輸式微，九倉遂策劃重建，打造今日的海港城。馬氏和鄰居「有樣學樣」，聯手重建，「當時老豆問親戚､朋友借錢，又抵押晒物業，再和其他業主聯手同銀行借咗一千五百萬，大廈係八五年起好，業權由三戶人平分。」地鋪亦一分為三，馬家分得 A鋪，並用鋪位繼續經營傢俬鋪。

Canton Disco是八十年代最具代表性的夜店，門口的 C字正是其標誌，現位是時裝店 Joyce。

八十年代不少明星喜到 Canton Disco，身穿黑衣的梅艷芳在此慶祝生日，不少明星到賀，包括身旁的曾華倩、台下穿黃衣的張學友等。

歌舞昇平　八十年代

Faddy年過五十，留有一頭鬈髮，外表較實際年紀年輕，電話待聽鈴聲是譚詠麟的《愛在深秋》，現時餐廳內兩部電視播的也是譚詠麟及已故巨星 Michael Jackson的演唱會錄影。原來，他八十年代已獲父親打本開設餐廳「珍寶」，夜晚為酒吧，播的正是譚詠麟等當時得令歌手的歌。「當時好興 Disco，廣東道成條街都係酒吧，最出名係 Canton Disco，梅艷芳、陳百強等明星好鍾意落去玩，後來仲有 Hot Gossip､ Apollo 18等，可以話係歌舞昇平。」珍寶就開在 Canton Disco對面，白天做飲食，夜晚鋪上枱布做夜店，請人現場唱歌。「初出道嘅劉德華都來唱過，唱得麻麻，反而呂方唱得幾好。」 Faddy笑着憶述，大家都知他是「少爺」，便稱他做「太子」，他亦過了幾年紙醉金迷的生活﹕「飲酒､『砌』車，玩到累就去廣東道間明煌芬蘭浴揼骨，瞓醒再返工。」
雖貪玩卻堅稱不入黑道，「黑白兩道都識，亦有人叫我一齊搞生意做酒吧，我話﹕『錢可以借俾你，借幾多還幾多，但生意唔好預我了』。」幾年後，珍寶因業主收回鋪位而結業，「依家你講太子或 Faddy Ma，呢條街好多人都知係我﹗」 Faddy攤開雙手說。

廣東道最新形勢

廣東道鋪租如坐穿梭機，早前 Giorgio Armani進駐海威商業中心對面的中港城地下，該地段的鋪租即時幾級跳。

九億物業　衣食無憂

隨着遊客增加，九五年，父親將傢俬店搬往樓上，將地鋪交予 Faddy做飲食，開設新永豐燒臘粉麵，只賣燒味及米粉。「因為係獨市，生意好好，一日可以賣二、三十隻燒鵝､四十隻雞，有好多明星幫襯，三樓有間錄音室，沈殿霞錄完音鍾意落嚟食叉燒。」至○五年， Faddy為「一啖氣」，將餐廳關閉。「有個做咗十年嘅女工追討假期賠償，其實請佢那時已講好俾多啲人工少啲假，但法庭判佢贏，我唔忿氣，問咗律師､會計師，俾完第一期賠償金，就執咗間鋪，咁就唔使再賠。」事件只是導火線， Faddy指當時已留意到愈來愈多餐廳做燒味，「好似大家樂､中國廚房，生意愈來愈難做。」 Faddy指，要繼續做遊客生意，就要有香港特色，於是三個月後，開了新金島魚蛋大王。

海威商業中心（黃圈）樓高十六層，地下鋪位一分為三，數月前， A鋪仍為新金島魚蛋王，隨着糖朝年底遷出，很快就有一番新景象。

海威大業主

「因為老豆以前好鍾意幫襯金島潮州酒家，所以改呢個名。」 Faddy解釋。開鋪後，生意暢旺，七成來自內地遊客。但生意再好也不及租金升幅，他指就算月做八至九十萬生意，對比租值，仍是蝕本。現時，馬氏仍是海威大廈的大業主，物業市值逾九億元，就算「繑埋雙手」，亦夠養幾代人。有當時參與重建的家族早早賣掉物業， Faddy指他和兄弟姊妹們都尊重父親的決定，不會賣鋪，並多次提到﹕「所有物業仲係老豆揸住，佢好保守，當初佢睇到珍寶因業主收鋪而結業，更加覺得做生意一定要有鋪揸手。」

新金島粥麵搬上四樓，花了二百萬裝修，面積由六百呎增加至三千呎，食客主要為附近的辦公室工作人員及街坊。

早年尖沙咀廣東道大多是三至四層高的唐樓，圖為廣東道及梳士巴利道交界。