比鄭秀文仲要瘦的張曼玉，面乾皮黃，難怪代言的護膚品牌一早換人。
探熱針
食煙送飯張曼玉自暴自棄
天生愛情狂的 Maggie張曼玉，今年六月自爆甩拖，失戀後急瘦變火柴人，但當事人卻死撐一切同分手無關。
冇拖拍冇肥過， Maggie持續中港兩地飛，上週五（十一月二日）到上海出席攝影展開幕，之後搵埋三兩好友到外灘包房食鐵板燒。三個鐘頭飯局，影后一啖煙一啖飯，指手畫腳，碌大雙眼激動吐苦水，一代 fashion icon，頓變成敗犬怨婦。
前後兩個樣
上週五傍晚六時，上海外灘舉行「 Mario Testino上海攝影展」開幕酒會。前一天在香港出席完時裝品牌開幕的張曼玉，差不多七時半才現身。
否認情傷暴瘦的 Maggie，比紙片人鄭秀文仲要瘦一截，手指頭膚色明顯因為吸煙過度發黃，加上 set了一頭亂髮，即使化了妝，面色仍覺暗晦。在布景板前影過相做完訪問，影后匆匆竄入酒會。面對大班老友， Maggie雀躍地滿場飛吹水飲酒，又主動摸住主辦單位外籍高層臉龐，擺出大靚心情。
俾面派對， Maggie逗留一小時離開，返回同樣位處外灘的酒店休息。落車上房，影后變得心事重重，與在酒會上的風騷態度，完全兩個樣。
煙仔當飯食的張曼玉，食到手指頭黃晒。
半百記者採訪，不過大會一早落 order，只談攝影不談感情，影后先肯俾面做訪問。
影展上，張曼玉表現風騷，當住嘉賓面前輕摸大會老外的面龐。
煙仔送飯
晚上九時半， Maggie在三名友人陪同下，到外灘五號二樓的月影鐵板燒日本餐廳包房食晚飯，三個小時的飯局， Maggie相當好胃口，但零儀態，食完一啖煙、再劈大個口吞飯，食相嚇人。
除了煙不離手，影后更不停發表偉論，手舞足蹈，一副敗犬吐苦相。接近凌晨食飽走人，發洩過後， Maggie在友人的護送下返回酒店，未再外出。
本週一（五日）晚七時半， Maggie單拖返港，守候多時的外傭上前為她推行李， Maggie則一支箭標前，跳上○九年買入的 Audi Q7慢慢等。三件行李跟身，但她未有即時返回南灣住所，反而直駛往去年以二千二百萬買入，位於小西灣的藍灣半島見屋企人，直至凌晨二時，才返回南灣香閨。
煙駁煙
零儀態
甩拖的張曼玉胃口不錯，食足全程，但食相嚇人。
張曼玉煙癮極大，食緊飯，不論侍應上菜，抑或吐苦水都煙不離手。
留京搏復合
現年四十八歲的 Maggie，今年六月對外公布與年輕七載的德國籍建築師 Ole Scheeren因聚少離多，五年情玩完。
「以前男朋友要喺北京做嘢，好難成日一齊，我哋傾過決定 break一 break，我有好多自己嘢做，除咗事業仲有我家庭响第二度（香港）。」
當日為男友移居北京，分手後堅持留守當地，無非對這段舊情抱復合希望。
「聚少離多，只係俾外界一個交代啫，兩個人感情轉淡仲有好多因素，不過佢哋又未至於冇彎轉，所以 Maggie唔想 sharp cut離開，睇吓大家仲有冇緣分。」 Maggie的好友透露。
甩拖後忙於做音樂、剪片、拍紀錄片、出席活動，但講到重操故業拍電影，影后似乎唔多情願。
「 Maggie同偉仔一樣，拍戲都會好投入，就因為太投入，好多時要用好長時間先抽離到，精神上負擔好大，況且佢接啲戲要拍幾個月有時甚至成年，點都唔及幾日拍一個廣告，或者幾個鐘出活動咁好搵，換轉你係佢，都唔願拍啦！」一名電影幕後人員說。
上週四張曼玉由北京返港出席時裝店開幕，心情極靚同 Wyman、容祖兒影合照。
本週一張曼玉由上海返港，即趕到小西灣與家人食晚飯。
今年六月出席品牌活動自爆分手，情傷暴瘦的她，心口露出嚇人胸骨。
同細七年的 Ole拍拖五年，即使見晒家長，依然難逃分手宿命。
上月底在北京出席活動，轉行玩音樂的張曼玉，上台與 live band jam歌娛賓。
索女變敗犬
83年 甜蜜期
憑住包包面單眼皮兔仔牙等甜美外形，參選港姐得亞軍，同時獲「最上鏡小姐」名銜，之後被無綫重用，拍攝《新紮師兄》、《畫出彩虹》及《武林世家》等劇集。
92年 變索期
開始箍牙、減肥，眼皮由單變雙，拍電影《家有囍事》時，廿八歲 Maggie連對手周星馳都電暈，經歷過與爾冬陞情變，傳被宋學祺呃錢呃感情，但仍 keep住靚樣。
00年 氣質期
與當時傳有曖昧的梁朝偉拍電影《花樣年華》，二人憑此片橫掃世界各地電影獎項，加上有愛情滋潤， Maggie就算只化淡妝，亦充滿女人味！
10年 膠面期
有傳偉仔與嘉玲結婚，令 Maggie大受打擊，四十有六的她開始現皺紋，為重新振作，趕上膠面潮流。
12年 怨婦期
留言列表
{{ article.title }}
