財爺出「雙辣招」遏樓市炒風後，住宅市場即時「冰封」。然而熱錢大舉殺到，始終要「搵嘢炒」，於是衝入未受政策打壓的工廈和商舖。

過去兩星期，工廈商舖幾乎每天都有投資者掃貨消息，個別單位更創下全港呎價新高。由於湧港資金未有停止迹象，在熱錢囤積下，勢令工商舖市場火上加油，隨時炒到爆煲才罷手。難怪財爺上周撰文表明，不排除出招遏非住宅市場炒風。

炒風熱火朝天，不少散戶初哥想入市博發達，準備拼命入貨撈一筆。其實資深炒家「舖王」鄧成波、「小巴大王」馬亞木，以及「新進摸王」廖偉麟，早於兩年前政府第一次出招後伺機出動，低位密密掃貨，成為工商舖狂潮下的大贏家。

馬亞木舖位 賺5億

鄧成波勁賺10億

廖偉麟商廈賺過億

任職基金經理的譚先生，一向炒開住宅，兩年前政府推出額外印花稅（SSD）後，他聞到「燶味」，馬上轉戰工廈市場，頗有斬獲。「現時隨身帶着支票簿出街，遇上啱心水單位即刻落票，怕蘇州過後無艇搭。」

上月底，財爺再度出招打壓樓市，譚先生聞訊後，即時致電經紀，將自己放售的工廈單位加價兩成。「全部業主都心雄，政府未出招前，我洽購的火炭路喜利佳工業大廈單位，業主二百三十萬肯沽，財爺出招後，他即時提高叫價至二百九十萬，反價足足兩成六！」

同樣兩年前開始炒工廈的梁小姐，對後市更樂觀，揚言無懼炒「爆煲」。「唔擔心喎，無可能會蝕。工廈太低水，用途又多元化，既可做寫字樓、飲食工場、藝術場地，政府又提倡活化工廈，客源廣，好有升值潛力。」

譚先生旗下數個工廈放盤已即時加價二至三成，價好先賣。

熱錢喪炒

工商舖如何炒到癲，翻查過去兩年工廈的摸貨數字便可知。一○年十月住宅市場尚未實施SSD前，當時工廈摸貨（即未完成交易前將物業轉手）的比率，只是百分之五點七，上月已大幅飆升至百分之十六點六。而寫字樓的摸貨比率，亦升穿百分之十一。

以觀塘開聯工業中心A座十四樓二十一室為例，短短半年已四度轉售，市價炒高近三成。該單位今年一月才以二百五十九萬元成交，四個月後以二百八十二萬元摸出，不足一個月再以二百九十八萬摸出，最後由公司客以三百三十萬承接，一個月摸足兩轉！

同區商廈一樣喪炒，年初入伙的敬業街皇廷廣場，今年已錄得一百一十五宗成交，當中三十一宗屬於摸貨，比率高達二成七。

大孖沙大手買全幢工廈，小炒家則集中炒散單位，火炭區工廈便是小炒家熱炒天堂。