橫看豎看，鄭則士怎樣都不像快要六十一歲。

他於一九七六年參加無綫第一屆「聲寶片場」比賽獲得冠軍而入行，遊走香港影視圈，既創作了「肥貓」一角，成為了他的標記，也當過兩次金像獎影帝（八六年《何必有我》及九七年《三個受傷的警察》）。雖然早於七九年已在TVB劇集《四眼神探》首次擔任男主角，但到九三年重拍電視時，卻因為不受重用，令他要跳槽亞視兼轉移北上發展，兜兜轉轉○六年又再回到TVB。

他亦曾試過活得很風光，一家六口老婆仔女和父母住又一村千呎豪宅，有兩個傭人服侍，出入揸平治，但也試過因為開設的電影公司倒閉，令他欠債千萬，一鋪輸清光。

起起伏伏三十四年，佔了大半人生，失去的只有歲月，卻沒有磨滅他的意志，更沒有減淡他對演戲的熱愛程度。

「我到依家仲有新人初入行嗰種fighting spirit！有呢種動力，係因為我真係好鍾意呢行，我當呢行係我一個好愛嘅人，愈嚟愈愛佢！」他哈哈哈笑着說。「依家啲新一代演員，成日都叫我做『老前輩』，我話，大家都係學習緊啫，其實我係個『厚底新人』就真！」

如果，演技是需要從真正的人生經歷中感受出來，以下鄭則士最深刻的那些，已經「厚」到足夠他拍很多齣戲。

/ 盧押道 21號 /

我喺東華東院出世。我有記憶以嚟，最先係住登龍街，然後搬咗去莊士敦道，跟住就搬咗去盧押道21號住天台，嗰度樓下有檔水兵最鍾意食嘅fish & fry。

童年嘅嘢，我都幾入腦，因為嗰陣嘅生活，每樣嘢都要經過自己嘅努力，先可以攞到返嚟，屋企根本冇多餘錢去買玩具，一個鐵皮公仔，我可以玩足幾年，一係就用雪條棍砌架飛機出嚟，一係就上山捉「金絲貓」（小蜘蛛），不過我阿媽通常都唔畀我哋去，我惟有人哋畀隻唔要嘅我，擁有到一隻我已經好開心！

我又試過偷偷地攞斗零買咗兩條金魚，用個鐵嘜嚟養，結果畀阿媽發現就話我：「你咁會整死佢哋o架！」跟住老竇就用一蚊買咗個細細個嘅魚缸返嚟。

我到依家都好鍾意呢行，雖然喺呢三十幾年嚟，我試過好好，亦都試過有兩、三年輸到乜都冇晒。

/ 父母的管教 /

我細個時，老竇喺香港仔警察學堂做廚師，基本上一個禮拜先返嚟一次，加上潮州男人比較大男人，所以我同佢好少接觸，反而喺我成長過程裏面，阿媽影響得我好犀利，亦都管得我哋幾個好嚴！

五十年代嗰陣，我同細佬喺駱克道讀私校，叫國光小學，一個仔每個月學費十幾蚊，兩個就成三十蚊，當時大家嘅人工都係講緊幾十蚊一個月，老竇每個月要用成起碼三分一人工去供仔女讀書，都試過冇錢交學費，但就算幾辛苦，佢哋都好希望啲細路將來可以成材。

我哋嗰陣喺學校，一個先生睇成四十幾個學生，我哋要聽先生話，要服從先生，一曳唔乖，就要見家長，然後阿媽就會好緊張好勞氣：「吓？見家長？你個衰仔，一定係你做咗啲曳嘢，唔聽話！」嗰個年代啲父母，可能都唔識教，但一定會比依家好多父母更加注重家庭教育。

八六年，憑《何必有我》成為金像獎影帝，影后則為王小鳳。

九七年，憑《三個受傷的警察》再度成為金像獎影帝。

/ 最愛馮寶寶 /

我細個時屋企窮，冇錢裝電視機，咁啱麗的呼聲喺告士打道海邊，門口擺咗部黑白電視機，我有時行過，都會企喺度睇一陣間，睇得多，就覺得呢個行業好得意！

老竇偶然都會帶我哋去睇戲，一個大人買一張飛，可以帶一個細路哥，我同我細佬就每個禮拜輪流去，如果阿爸阿媽一齊去睇就最好，兩兄弟都有得睇！

就係因為咁，我間唔中就會睇到馮寶寶，佢做嗰啲乜嘢《夜光杯》呀、《小俠紅蝴蝶》呀，一來、我覺得佢靚女，二來、我見到佢今日做乞兒妹，聽日做小公主，又覺得好過癮、好好玩！嗰陣幾乎所有同我差唔多年紀嘅童星，都做咗我偶像！尤其是馮寶寶，不過我就從來唔會儲佢哋啲相，因為明星相係奢侈品，邊有錢買？

跟住有次學校要寫作文《我的志願》，我就寫咗「我要做明星」，先生一睇，就撕鬼咗：「貪慕虛榮！」要我再寫過。其實嗰陣我並唔係諗要乜嘢明星嘅光環，只係當時大家講呢個行業，都只係叫「明星」，冇分演員唔演員。

八五年，自編自導自演《何必有我》，「肥貓」自此成為他的標記。

與張衛健（右一）曾有錢銀轇轕，解決後，兩人仍是好友。

/ 輸咗會還凸 /

七六年入咗行以嚟，「肥貓」呢個角色可以話係我嘅商標，尤其是內地人，一講「肥貓」，都會指定係我；反而喺香港，啲觀眾會將我撥入去「演技派」。

我到依家都好鍾意呢行，雖然喺呢三十幾年嚟，我試過好好，亦都試過有兩、三年輸到乜都冇晒——

九三年嗰陣，公司（他與朋友合夥的滙川電影公司）大概蝕咗千七萬，我都還咗一千萬出去，啲媒體朋友同我講：「你傻嘅咩，有限公司嘛，咪當唔好彩囉！」但我仲想喺呢個圈抬起頭見人，所以我一定要負責任落去。

當時除咗我老婆、仔女同父母賣唔到之外，我嘅樓、車，賣得嘅都賣晒出去；應承咗拍嘅戲，我都會攞定片酬用嚟還債；有錢嘅時候，銀行嗰四百萬貸款，就算未到期，我都照還咗佢，點知麥嘉原來識嗰個銀行家，仲講笑咁話我：「吓，你都有鋪還錢癮嗰喎！」

其實間公司我只係佔四成，但我就還足五成，係還凸咗，不過我起碼賺咗個信譽！

與黎耀祥拍檔的新劇《盛世仁傑》，拍於○八年。

八六年，在《何必有我》慶功宴上，（左起）譚詠麟、周潤發和曾志偉齊齊到賀。

/ 泥鯭牛肉粥 /

嗰段時間，我賣咗又一村間屋之後，都有揦番住三百萬買個細啲嘅單位畀我屋企人，點都叫做有個竇口畀佢哋。當時就算想同佢哋飲餐茶，我都要計數，五、六百蚊太貴，就買兩斤泥鯭、三十蚊牛肉返嚟，百四蚊整個泥鯭牛肉粥，成家人食得開開心心，都唔會好委屈啫！

最感動係，當時我老婆仲好支持我咁話：「唔緊要啦！一家人慢慢捱啦，實有辦法嘅！」另一樣令我安慰嘅，係我兩個仔女從來都冇要求過要名牌，我個女依家廿一歲，我都好appreciate佢唔會去買名牌，因為佢覺得好貴，亦都唔會用A貨，因為佢覺得自己用唔起咪唔用囉。

九一年與妻子林燕明在大會堂結婚，來賓星光熠熠，鄭則士的左邊是他人生中最要感謝的母親。

鄭氏一家四口，女兒（左一）現在已廿一歲，正讀大學二年級，細仔（前排）則十六歲，經常父子檔去打保齡球。

可能因為我屋企冇人會用名牌，我兩個細路哥，十一歲前啲衫，冚巴爛都係喺九龍城獅子石道買，二十蚊、三十蚊、四十蚊，過年嗰件會靚啲，百幾，都一樣乾淨企理啫。我成日都覺得，你本身唔係名牌，身上件件名牌都冇用，你睇吓發哥，佢咪照樣牛仔衫褲，成身加埋可能唔使三百蚊，都係咁去九龍城街市，佢冇錢咩？我只不過係個圈中小藝人，如果成身加埋成三十萬，你估人哋會點睇呢？